Siampi Puante
28
1 "Kei tunga siampi nasem dingin Israel-te lak panin na sanggampa Aaron in a tapate Nadab le Abihu, Aleazar le Ithamar na kiangah tonpihsak in. 2 Amah zahtak a baangsak ding le pahtawi nadingin na sanggampa Aaron puansilh siangthote bawlsakin. 3 Amah in kei ading siampi na a sep theih nading le amah a ki-aptuam theih nadingin hih bang nate a bawl dinga pilna ka guat mite tungah Aaron puansilhte a bawlsak dingun gen in. 4 Amaute in hih kizepnate: awmtuam khat, siampi puan-ak khat, puantualpi khat, a kigan puantungsilh khat, dialkhip khat le dial kawnggak khat a bawl ding uh hi. Na sanggampa le a tapate in ka siampi na a sep theih nadingun amaute in hih puansilh siangthote a bawlsak ding uh hi. 5 Tuate kham, adum, adupsan, a- ausan khau le hoihtaka kigan puan zangin bawlsak in.Siampi Puan-ak
6 "Siampi puan-ak, kham, adum, adupsan, a-ausan khau le hoihtaka kikhuk-a kigan puan tawh - khutsiamte bawl hi ding hi. 7 A liangko-a khihkip nadingin a kiu nihte tawh kizomin liangkaih nih nei ding hi. 8 Khutsiamte gat kawnggak zong tua mah bang hi dinga - siampi puan-ak tawh sa khat hi-in, kham le adum, adupsan a-ausan, khau le hoihtaka kikhuk-a kigan puan hi ding hi.
9 "Onyx suang nih la inla, Israel tapate’ minte khuakin gelh in, 10 amau suah hun tawh kizui-in - suang khat tungah min guk, suang dang khat tungah min guk mah gelh in. 11 Suang manpha at pa in seal a khuak bangin Israel tapate’ minte tua suang nihte tungah khuakin gelh in. Tua ciangin khamin a geivial bawl inla, 12 Israel tapate mualsuang ahi dingin siampi puan-ak liangkaihna tungah khihkip in. Aaron in phawk tawntungna ahi dingin TOPA mai-ah tua minte a liangko tungah pua ding hi. 13 Kham geivialin zem inla, 14 khau banga kihual kham khainiang kiphek nih bawlin tua suang bulhnate tungah na bulh ding hi.
Awmtuam
15 "Thukhensatnate bawl nadingin awmtuam khat zem in - khutsiampa bawl hi ding hi. Siampi puan-ak bangin: kham, adum, adupsan, a-ausan khau le limtaka kikhuka kigan puan tawh bawl in. 16 A ningkim hi dinga - khap aa khat sau-in khap khat zai-in - khep nihin kikhep ding hi. 17 Tua ciangin a tungah suangmanpha gual li-in suang in. A gual masa pen ah ruby khat, topaz khat, le beryl khat; 18 a gual nihna ah turquoise khat, sapphire bb khat, le emerald khat; 19 a gual thumna ah jacinth khat, agate khat, le amethyst khat; 20 a gual lina ah chrysolite khat, onyx khat le jasper cc khat hi ding hi. Kham geihualte sungah tuate suang in. 21 Suang sawm le nih hi dinga, khat Israel’ tapate’ min khat gelhna hi-in seal bangin kikhuakin nam sawm le nihte min khat ciat kigelh ding hi.
22 "Awmtuam-a dingin khauhual bangin kham citak khainiang kiphek bawl in. 23 Tua adingin kham kual nih bawl inla tuate awmtuam kiu nih ah khihkip in. 24 Awmtuam kiu-a kham kualte ah khainiang nihte khihkip inla 25 tua khainiang mong langkhat pen siampi puan-ak liangkaihna a ang lampanga, a liangko-a kaisuk pen tawh zom in. 26 Kham kual nih bawl inla siampi puan-ak tawh kizom awmtuam sunglam kiu nihte ah bulh in. 27 Kham kual nih mah bawl inla, siampi puan-ak anglam a, a liangkaih na taw-a apang khuina kiang kawnggak pek tung santakah bulh in. 28 Awmtuam sikkualte le siampi puan-ak sikkualte khaudumin khihkhawm inla, awmtuam pen siampi puan-ak pana kiveikhiat loh nadingin kawnggak tawh khihcip in.
29 "Mun Siangtho ah Aaron a lut peuhpeuh ciangin TOPA mai-ah phawkdenna ahi, thukhensatna awmtuam tunga Israel’ tapate’ minte a lungtang tungsan takah a pua ding hi. 30 TOPA omna sungah a lut peuhpeuh ciangin Aaron lungtang tung san taka om dingin Urim le Thummim zong awmtuam tungah koih in. Aaron in TOPA mai-ah Israel-te ading thukhensatna a bawl theih nadingin a lungtang tung santakah tua bangin a pua gige ding hi.
Siampi Puan dangte
31 "Adum bekbek tawh siampi puan-ak tualpi bawl inla, 32 a laizangah lu khum nading vangsak in. A kikek loh nadingin a vang kimkotah gawl-an dd bangin a gei zimna kigan ding hi. 33 Puantualpi mong kimkotah adum, adupsan le a ausan khau tawh mangkawlsing gahte bawl inla, tuate kikalah kham longte khai in. 34 Kham longte le mangkawlsing gahte puantualpi mong kimkotah kikalhelh dimdiam ding hi. 35 Aaron in biakna na a sep ciangin tua silh tektek ding hi. Amah a sih loh nadingin Siangtho Mun TOPA mai-ah a sungtum ciang le a pusuah ciangin tua longte gin kiza ding hi.
36 "Kham citak pek khat bawlin seal tunga a kuaka kigelh bangin: TOPA TUNGAH SIANGTHO ci-in a tungah a kuakin gelh in. 37 Dialkhip tunga khih nadingin khaudum a tungah khih in; tua pen a dialkhip mailamah om ding hi. 38 Tua pen Aaron taltangah om dinga, Israel-te in bang khatpeuh letsongin a piak uh a, amau ap letsong siangthote a paubanna khat a om leh aman khu ding hi. TOPA in tuate a san theih nadingin Aaron taltang tungah tuate om gige ding hi.
39 "Khau hoih tawh puantungsilh gan inla, hoihtaka kigan puan tawh dialkhip bawl in. Puan kawnggak pen khutkhuisiamte bawl hi ding hi. Amaute a zahtak baangsak ding le a pahtawihuaisak dingin 40 Aaron tapate ading puantungsilhte, puan-kawnggakte le dialkhipte bawlsak in. 41 Hih puansilhte na sanggampa Aaron le a tapate na silhsak khit ciangin amaute sathau nilh inla siansuah in. Kei ading siampi na a sep theih nadingun siangthosak in.
42 "Pumpi tuam nadingin kawng pan a phei ciang a ban puan hoih kigan pheituam sungten khat bawl in. 43 Aaron le a tapate kimawhsak-a a sih loh nadingun, Kikhopna Puanbuk-a a pai ciang uh ahi a, Mun Siangtho-a biakna nasem dinga biakna-tau a naih ciang uh ahi zongin amaute in teng pelmawh ding uh hi.
"Hih in Aaron le a suan-le-khakte adingin a tawntunga khang kivai-khakna thuzek hi ding hi.