ཡི་ཤུ་ ཧུ་ སོན་པོ་ ཞང་།
24
ཟ་ཉི་མེ་ ཞག་ལ་ ང་མོ་ ང་ཏོག་ནི་ པོ་མོ་རྒུན་ ཀྲལ་འགྲིག་ ཅོ་ཀ་ནེ་ ཏྲི་ཞིམ་ཅེན་ མར་ རྡང་ མར་ནག་ ཁུར་རྡེ་ སྤུར་ཧང་ངེ་ འདུན་ལ་ ལེབ་རྦེ་རྡང་, 2 སྤུར་ཧང་ལ་ ཀབ་ཏེ་ ཡོ་ཀ་ནེ་ ཁེ་རྡོ་ ཐེན་འདེ་ ཐོང་། 3 ཁོང་རྒུན་ སྤུར་ཧང་ངེ་ན་ ཞུ་རྡེ་རྡང་ ཙོབོ་ ཡི་ཤུའི་ སྤུར་ མ་ཐོང་། 4 ཁོང་ ཧན་ཧོན་ སོང་འདེ་ འི་ ཧོར་ལ་ ས་མེན་ ཡོད་ཏུའི་ ཧུན་མེད་ལ་ མ་ འདང་ཤེན་ ཀོའེ་ལག་ ཀོན་ཀ་ནེ་ མི་ ཉི་ ཁོང་རྒུ་ནི་ འདུན་ལ་ ཞྃ་རྡེ་ ཞུའུ་།5 ཧོཔ་ འཇིའི་རྦེ་ པོ་མོ་རྒུ་ནི་ འགོ་ རྒུའི་རྡེ་ ཐང་ཀ་ ལྟོའེ་, འིན་ན་ ཁོང་ ཉ་ཧེ་ ཁོང་རྒུན་ལ་ མོལ་, “ཁྱི་ཞི་ ཤི་ཀན་རྒུ་ནི་ ཕྲོ་ སོན་པོ་ ཅེ་ ཙལ་ལེ་ཡོད་? 6-7 ཁོང་ འེ་ཀ་ མེད་, ཁོང་ སོན་པོ་ ཞྃ་རྡེ་ འིན་། འགཱ་ལིལ་ལེ་ ཡུལ་ཞོང་ངེ་ན་ ཡོད་ཟ་ནི་ ཁོང་ངེ་ ཁྱི་ཞ་, ‘མི་རིག་རྒེ་པུ་ རྡིག་ཅེན་རྒུ་ནི་ ལག་ལ་ ལྟེད་ཏེ་, རྐྱང་ཤིང་ངེ་ཀ་ རྐྱང་ངེན་ ཡང་ ཞག་ སུམ་པེ་ ཞག་ལ་ སོན་པོ་ ལང་ངེ་ ཛེ་རྡེན་’ མོལ་ཧེན་འབོ་ འི་ཏུ་ ཅོའེ་།”
8 ཏེ་ནི་ ཁོང་རྒུན་ལ་ ཁོང་ངེ་ མོལ་ཧན་རྒུན་ འི་ཏུ་ ཡོྃ་། 9 སྤུར་ཧང་ནི་ ལོག་ཏེ་ ལེབ་རྦེ་རྡང་ ཧུ་ཚབ་ ཅུ་ཤིག་ ཏང་ ཞེན་ མི་ཚང་མ་ལ་ སོང་ཀན་ ཚང་མ་ ཤེད་། 10 ཧུ་ཚབ་རྒུན་ལ་ ཏེ་ ཁྲིན་ ཁྱོང་ཀན་རྒུན་ མར་ཡམ་ མ་ཧ་འདལ་ལེན་མ་, ཡོ་འན་ན་ རྡང་ ཡ་ཀུབ་རྦེ་ ཨ་མ་ མར་ཡམ་ འདང་ ཁོང་ངེ་ ཁྲོ་པ་ པོ་མོ་རྒུན་ འིན་འབེན་། 11 ཏེ་ སྤེ་ར་རྒུན་ ཏོན་མེད་ ཚོར་རྦེ་ ཁོང་རྒུ་ནི་ རྡེན་ མ་ཆེ་། 12 འིན་ན་ པི་ཏྲར་ ལྃ་རྡེ་ སྤུར་ཧང་ལ་ རྒྱུག་ཏེ་ སོང་, རྒུའི་རྡེ་ ལྟོའེ་རྦེ་ སྤུར་རེ་ རེ་རྦོ་ ཅིག་པོ་ པོར་རྡེ་ ཐོང་། ཏོ་རྒུན་ ཅི་ སོང་འདེ་ འིན་ སམ་མེན་ ཁོ་ ཧན་ཧོན་ སོང་འདེ་ ཁང་པ་ ལོག་ཏེ་ སོང་།
ཨེ་མ་འུ་ ཆ་ཀན་ མི་ ཉི་།
13 ཏེ་རྒ་ ཞག་ལ་ ཁོང་རྒུ་ནི་ ཕྲོ་ནི་ ལོབ་ཀྲུག་ ཉི་ ཡེ་རུ་ཤ་ལེམ་ནི་ ཀྱེ་ལོ་མི་ཀྲར་ ཅུ་ཤིག་ ཐག་རིང་ལ་ ཡོ་ཀ་ནེ་ ཨེ་མ་འུ་ ཟེར་ཧ་ནེ་ ཀྲོང་ཁྱེར་ལ་ ཆ་ཡོད་པེན་། 14 ཁོང་ ཉ་ཧེ་ སོང་ཀན་ ཚང་མེ་ ཧོར་ལ་ སྤེ་ར་ ཏང་ངེ་ཡོད་པེན་། 15 སྤེ་ར་ ཏང་ངེན་, ཁྲོའེ་རྡུར་ ཅོ་ཟ་ནི་ ཡི་ཤུ་ ཁོང་ངེ་ རྒྱབ་ནི་ རྐྱོད་ཏེ་ ཁོང་རྒུན་ ཉམ་པོ་ འགྲུ་ལེ་ ཛེད་, 16 འིན་ན་ ཡི་ཤུ་ འིན་ཀན་འབོ་ ཁོང་ལ་ ངོ་ཤེ་ ཆ་ཅུག་རྒེ་ མ་ཛེད་།
17 ཁོང་ངེ་ ཁོང་རྒུན་ལ་ མོལ་, “ཁྱི་ཞི་ ཆེན་འདང་ ཅི་ ཧོར་ལ་ སྤེ་ར་ ཏང་ངེ་ཡོད་?”
ཁོང་ ཐུབ་ཅིག་ སྲུྃ་, ཡང་ ཁོང་རྒུན་ ཚེར་རྡེ་ འདེད་པེན་། 18 ཁོང་ངེ་ ཕྲོ་ནི་ ཀི་ལེ་འོ་པ་ ཟེར་ཧན་འབེ་ ཁོང་ལ་ ཟེར་, “འདང་ཏི་རིང་ངེ་ ཡེ་རུ་ཤ་ལེམ་མེ་ན་ སོང་ཀན་རྒུན་ རྒྱུའི་ མེ་ཀ་ནེ་ པེ་སྤ་ ཉེ་རང་ ཅིག་པོ་ འིན་ནེ་?”
19 ཁོང་ངེ་ ཁོང་རྒུན་ལ་ འདྲི་ ཛེད་, “ཅི་ སོང་ཀ་?”
ཁོང་རྒུ་ནི་ ལེན་ཏྃ་, “ཡི་ཤུ་ ན་ཙ་རེད་པེ་ ཧོར་། ཁོང་ནི་ ལུང་རྟོན་པ་, ཧ་ལེ་ཤེ་ ཛེད་པ་ ཛེད་ཀན་ ཡང་ ཀོན་འཇོག་ ཏང་ མི་ཚང་མེ་ འདུན་ལ་ ཝང་ཆ་ ཉམ་པོ་ ཧ་ལེ་ཤེ་ ལབ་ཞ་ སལ་ཧན་འབོ་ འིན་འབེན་། 20 ལ་མ་ འུ་རྐྱོང་རྒུན་ འདང་ ཡ་ཧུ་འདཱ་པེ་ འུ་རྐྱོང་རྒུ་ནི་ ཁོང་ལ་ སྲོག་རྒེ་ ཆེད་པ་ ཏང་ངེ་ལ་ ལྟེད་ ཡང་ ཁོང་ རྐྱང་ཤིང་ངེ་ཀ་ རྐྱང་། 21 འིན་ན་ ཁོང་ ཨིས་ར་ཡེལ་པ་རྒུན་ ཐར་ཤུག་རྒེ་ ཛེད་ཅེ་ལ་ རྐྱོད་ཏེ་ འིན་ཀན་འབོ་ ང་ཞི་ རེ་ཝ་ ཡོད་པེན་, ཏོ་རྒུན་ སོང་འདེ་ ཏི་རིང་ ཞག་ སུམ་པེ་ ཞག་ལ་, 22 ང་ཞི་ ཕྲོ་ནི་ པོ་མོ་ ཁ་ཅིག་རྒེ་ འི་ ནེ་ཚུལ་རྒུན་ ཤེད་ཏེ་ ང་ཞ་ ཧ་ལེ་ཤུག་། ཁོང་རྒུན་ ང་ཏོག་ནི་ ཁོང་ངེ་ སྤུར་ཧང་ལ་ སོང་, 23 འིན་ན་ ཏེ་ན་ ཁོང་ངེ་ སྤུར་ མེད་ཅེ་ཀ་ནི་ ང་ཞ་ས་ ལོག་ཏེ་ ཡོྃ་རྡེ་ ཁོང་རྒུན་ལ་ ཞལ་ཟི་རྡེ་ན་ ཕོ་ཉ་རྒུན་ འཇལ་རྡེ་ ཡི་ཤུ་ སོན་པོ་ ཞྃ་རྡེ་ ཡོད་ མོལ་ལེ་རག་ ཟེ་རེན་ ཤེད་། 24 ང་ཞི་ ཕྲོ་ནི་ ཁ་ཅིག་ སྤུར་ཧང་ལ་ སོང་འདེ་ པོ་མོ་རྒུ་ནི་ ཤེད་ཀན་ ནང་ཞིན་ ཡི་ཤུའི་ སྤུར་ སྤུར་ཧང་ངེ་ན་ མེ་ཀན་འབོ་ ཐོང་འདོག་།”
25 ཏེ་ནི་ ཡི་ཤུའི་ ཁོང་རྒུན་ལ་ མོལ་, “ཁྱི་ཞ་ ཙམ་ཤིག་ ཧ་འགྲང་ ཡང་ ཁྱི་ཞི་ ཀག་སྤོ་ ཉམ་པོ་ མ་ནི་ ལུང་རྟོན་པ་རྒུ་ནི་ མོལ་ཧན་ ཚང་མ་ རྡེན་འབའ་ ཅོའོ་ མི་འདུག་། 26 མ་ཤི་ཀ་ ཏེ་ རྡུ་ངལ་རྒུན་ ཉུང་འདེ་ མ་ནི་ སྤལ་ མི་ཐོབ་ མོལ་ཧན་འབོ་ རྒྱུའི་མེད་རྡེ་?” 27 ཏེ་ནི་ ཁོང་ངེ་ ལུང་རྟོན་པ་ མོ་ཤེ་ནི་ འགོ་ཟུག་ཏེ་ ལུང་རྟོན་པ་ ཚང་མེ་ ཁོང་ངེ་ ཧོར་ལ་ ཏམ་པེ་ སུང་རབ་ ཚང་མེ་ན་ འབྲི་ ཛེད་ཀ་ནེ་ ཏོན་ ཁོང་རྒུན་ལ་ ཧ་ཀོ་ཅུག་རྒེ་ ཛེད་།
28 ཁོང་རྒུན་ ཨེ་མ་འུ་ ལེབ་ཅེ་ རྡང་ པེ་རྦོ་ ཚར་ཤེ་ ཉེ་མོ་ ལེབ་རྦེ་རྡང་, ཡི་ཤུ་ ཁོང་རྒུ་ནི་སང་ ས་ཅ་ ཐག་རིང་ལ་ རྐྱོད་ཅེ་འབོ་ ཐོང་། 29 འིན་ན་ ཁོང་རྒུ་ནི་ ཁོང་ལ་ འུ་ཙུག་ ཏྃ་རྡེ་ ཟེར་, “ང་ཞ་ ཉམ་པོ་ ཞུ་རྡེ་ ཛེད་ ཅེ་ཟེར་ནི་ ནམ་ཅུ་ རུག་ཏེ་ ཚེན་ ཆ་ཀྱི་འདུག་།” ཏེ་ནི་ ཁོང་ ཁོང་རྒུན་ ཉམ་པོ་ ཞུ་ཤེ་ལ་ ནང་ལ་ རྐྱོད་། 30 ཕི་རོ་ ཚལ་མ་ འདོན་ནེ་ ཅོག་ཙེ་ འདུན་ལ་ ཞུ་རྡེ་རྡང་ ཡི་ཤུའི་ འདོན་ཀྱིར་ ཆག་ལ་ ནམ་འདེ་ ཐུག་ཞེ་ཆེ་ ཞུའི་རྡེ་ ཅག་རྒེ་ ཛེད་, ཡང་ ཁོང་ལ་ སལ་། 31 ཏེ་ནི་ ཁོང་རྒུ་ནི་ མིག་ པེ་རྡེ་ ཁོང་ སུ་ འིན་ཀན་འབོ་ ངོ་ཤེ་རྡེ་རྡང་ ཁོང་ ཁོང་རྒུ་ནི་ འདུན་ནི་ ཏོག་རྐྱལ་།
32 ཁོང་རྒུ་ནི་ ཅིག་ ཏང་ ཅིག་ལ་ ཟེར་, “ཁོང་ངེ་ ལམ་ལ་ ཨ་ཧོ་ ཞལ་ཏ་ ཛེ་རྡེན་ ཏམ་པེ་ སུང་རབ་རྦེ་ ནང་ནི་ ཧ་ཀོ་ཅུག་རྒེ་ ཛེད་ཟ་ནི་, ཨ་ཧོ་རྒུ་ནི་ ཉིང་ངེ་ན་ མེ་ འབར་ཧན་ ཙོག་སེ་ མ་ཚོར་རེ་?” 33 ཏེ་རྒ་མ་རྒ་, ཁོང་རྒུན་ ལྃ་རྡེ་ ཡེ་རུ་ཤ་ལེམ་ལ་ ལོག་ཏེ་ སོང་ ཡང་ ཧུ་ཚབ་ ཅུ་ཤིག་པོ་ ཞེན་ ཁྲོ་པ་རྒུན་ ཉམ་པོ་ ཛོམ་འདེ་ ཡོ་ཀན་འབོ་ ཐོང་། 34 ཁོང་ ཉ་ཧ་ ཁོང་རྒུ་ནི་, “ཙོབོ་ རྡེན་འབའ་ སོན་པོ་ ཞྃ་རྡེ་ ཤི་མོན་ནེ་ འཇལ་རྡོག་” ཟེ་རེན་ ཚོར་། 35 ཏེ་ནི་ ཁོང་ ཉ་ཧ་ལ་ ལམ་ལ་ སོང་ཀན་ ཚང་མེ་ ཧོར་ རྡང་ ཁོང་ངེ་ འདོན་ཀྱིར་ ཅག་རྒེ་ ཛེ་རྡེ་རྡང་ ཁོང་ ངོ་ཤེ་ཧན་འབོ་ ཤེད་།
ཡི་ཤུ་ ལོབ་ཀྲུག་རྒུན་ལ་ འཇལ་།
36 ཏེ་ ཉ་ཧེ་ སྤེ་ར་རྒུན་ ཤེད་རྡེན་ ཡོད་ཟ་ནི་ ཧུན་མེད་ལ་ ཡི་ཤུ་ ཁོང་རྒུ་ནི་ རྐྱིལ་ལ་ རྐྱོད་ ཡང་ མོལ་, “ཀོན་འཇོག་རྒེ་ ཞིའི་རྡེ་ ཁྱི་ཞ་ ཉམ་པོ་ ལུའི་ཤིག་།”
37 འིན་ན་ ཁོང་རྒུན་ འདྲོའོ་ ཡང་ འཇིའི་, ཁོང་ལ་ ལན་འདྲེ་ཞིག་ ཐོང་འདེ་ ནོག་ སམ་། 38 ཡི་ཤུའི་ ཁོང་རྒུན་ལ་ མོལ་, “ཁྱི་ཞ་ ཅི་ འཇིའི་རྡེ་རག་ ཡང་ ཁྱི་ཞི་ ཉིང་ངེ་ན་ ཐེ་ཚོམ་ ཅེ་ རྐྱེ་རག་? 39 ངེ་ ཧང་པ་ ལག་པ་རྒུན་ལ་ ལྟོའེ་རྡང་, ང་རང་ འིན་། ལག་པ་ སེ་རྡེ་ ང་ ཉུག་རྒང་, ལན་འདྲེ་ ཤ་ རྡང་ རུའི་སྤ་ ཡོང་ངེ་ མག་ འིན་ན་ ང་ ཏོ་རྒུན་ ཡོད་།” 40 ཏོ་ མོལ་རྡེ་ ཁོང་ངེ་ ཁོ་རང་ངེ་ ཆག་ ཏང་ ཞབ་རྒུན་ ཁོང་རྒུན་ལ་ ལྟན་ནེ་ ཛེད་། 41 ཐེད་པོ་ རྡང་ རྒ་མོ་ ཆ་རྡང་ ཏ་རུང་ ཁོང་རྒུ་ནི་ རྡེན་ མ་ཆེ་རྦེ་ ཡི་ཤུའི་ ཁོང་རྒུན་ལ་ མོལ་, “ཁྱི་ཞི་ ལག་ལ་ ཟ་ཅེ་ཞིག་ ཡོད་རྡེ་?”
44 ཏེ་ནི་ ཁོང་རྒུན་ལ་ མོལ་, “ང་ ཁྱི་ཞ་ ཉམ་པོ་ ཡོད་ཟ་ནི་ ངེ་ ཡུ་རྒུན་ ཟེར་རྦེན་, ‘མོ་ཤེ་ ཀཱ་ཁྲིམ་, ལུང་རྟོན་པ་རྒུན་ འདང་ སུང་འགུར་རེ་ སྤེ་ཆ་རྒུ་ནི་ན་ ངེ་ ཧོར་ལ་ འདྲི་ཧན་ ཚང་མ་ འདྲན་འདྲ་ ཀྲུཔ་རྒོའེ་།’” 45 ཏེ་ནི་ ཡི་ཤུའི་ ཁོང་རྒུན་ལ་ ཏམ་པེ་ སུང་རབ་རྦེ་ན་ འབི་ ཛེད་ཀན་རྒུན་ ཧ་ཀོ་ཅེ་ ཁྱུད་ སལ་། 46 ཁོང་ངེ་ ཁོང་རྒུན་ལ་ མོལ་, “ཡུ་རྒུན་ འབྲི་ཛེད་ཏེ་ འདུག་,
‘ཀོན་འཇོག་རྒེ་ འདམ་མེ་ ཛེད་ཀ་ནེ་ མ་ཤི་ཀ་ རྡུ་ངལ་ ཉུང་ངེན་
ཡང་ ཞག་ སུམ་པེ་ ཞག་ལ་
ཤི་ཀན་རྒུ་ནི་ ཕྲོ་ནི་ སོན་པོ་ ཞང་རྡེན་།
47 ཡེ་རུ་ཤ་ལེམ་ནི་ འགོ་ཟུག་ཏེ་ རྒྱལ་ཁབ་ ཚང་མེ་ན་
རྡིག་པ་ནི་ སེམ་འགྱུར་ཤེ་ རྡང་ རྡིག་པ་ སེལ་ཅེ་ཕི་
ཁོང་ངེ་ ཚན་ནེ་ཀ་ ཆོའེ་ཤེད་རྡེན་།’
48 ཏོ་ ཚང་མེ་ སྤང་པོ་ ཏང་ངེན་ ཁྱི་ཞ་རྒུན་ མི་ཚང་མ་ལ་ ཤོད་། 49 ངེ་ ཡབ་རྦེ་, ཏམ་པེ་ ཐུག་ཡིད་རྡེ་ ཞལ་ཆེཏ་ ཛེད་ཀན་པོ་ ངེ་ ཁྱི་ཞ་རྒུན་ལ་ ཀ་ལེན་། འིན་ན་ རྡེ་བ་ཅན་ནེ་ ཏམ་པེ་ ཐུག་ཡིད་ རྐྱོད་ཏེ་ ཁྱི་ཞ་རྒུན་ ཁྱུད་རྡེ་ ཀང་ཀང་ཚུག་པ་ ཁྱི་ཞ་ ཡེ་རུ་ཤེ་ལེམ་ རྒྱལ་སེ་ན་ འདོད་།”
ཀོན་འཇོག་རྒེ་ ཡི་ཤུ་ རྡེ་བ་ཅན་ལ་ ཁྱེར་རེ་ ཛེད་།
50 ཏེ་ནི་ ཡི་ཤུའི་ ཁོང་རྒུན་ ཕི་ལོག་ལ་ འབེད་ཐཱ་ནི་ ཀྲོང་ཁྱེར་རེ་ ཉེ་མོ་ཞིག་ལ་ ཁྱེར་རེ་ ཛེད་, ཡང་ ནམ་ཀ་ ཆོག་ལ་ ཆག་ རྐྱང་ངེ་ ཛེད་ཏེ་ ཁོང་རྒུན་ལ་ ཅིན་ལབ་ སལ་། 51 ཁོང་རྒུན་ལ་ ཅིན་ལབ་ ས་ལེན་ ཡོད་ཟ་ནི་ ཁོང་རྒུ་ནི་ ཕྃ་རྡེ་ ཡི་ཤུ་ རྡེ་བ་ཅན་ལ་ ཁྱེར་རེ་ ཛེད་། 52 ཁོང་རྒུ་ནི་ ཁོང་ལ་ ཅོལ་ལེན་, མ་ ཐེད་པོ་ ཉམ་པོ་ ཡེ་རུ་ཤ་ལེམ་ལ་ ལོག་ཏེ་ སོང་། 53 ཞག་ཏང་ ཁོང་རྒུན་ ཀོན་འཇོག་རྒེ་ ཁང་པ་ལ་ རྐྱོད་ཏེ་ ཀོན་འཇོག་ལ་ རྟོད་པ་ པུ་ལེ་ཡོད་པེན་༎