Ni zanda guni ti apóstol
9
Naa naca apóstol sti Señor Jesucristu ne cadi caya yaga lu ná iruti binni guidxilayú.
Biiya piaꞌ Jesús,
Señor stinneꞌ,
ne laatu nga ni bine ganar lu dxiiña stibe.
2 Zándaca chuꞌ tu qué guni cre pa apóstol naa,
peru laatu huaxa nanna tu naca ni,
purti ra bini cre tu Cristu bihuinni dxandí apóstol naa.
3 Ndi nga ni rabe cani racalaꞌdxi ganna pa dxandí naca ni o pa coꞌ.
4 Lácaxa qué gapa du derechu idóꞌ do ne idéꞌ du.
5 Ñee qué gapa du derechu ichaganá du ti hermana ne sa né du laa,
casi bichaganá ca xcaadxi apóstol ne ca biꞌchi Señor ne Pedru la?
6 Lácaxa naa siaꞌ ne Bernabé qué gapa du derechu usaana du xhiiña du para guni du xhiiña Señor.
7 Lácaxa ni rie guerra ngue ca uyubi ni iquiiñeꞌ.
Ñee nuu tu rudxiiba ti yaga cuananaxhi ne qué go xcuananaxhi ni la?
Lácaxa nuu tu rigapa vaca ne qué reꞌ leche stime.
8 Ñee ruluíꞌ de naa siaꞌ biale ni canié ri la?
ñee cadi laca zacá na ley la?
9 Sicarí cá lu ley sti Moisés:
“Cadi cuꞌ lu guixhe xii ruaa buey ora cayuni dxiiñaꞌ.”
Ne cadi uníꞌ Dios zacá purti si rizaalaꞌdxi ca buey,
10 sínuque uníꞌ be ni casi ti ejemplu para laanu.
Ni rucaa zurcu la?
nanna ziaxa saca cayuni dxiiñaꞌ.
Ne zaqueca ni riguibi semiá,
laca nanna ziaxa saca cayuni dxiiñaꞌ.
11 Zaqueca pa ma bidxiꞌba du ni reeda de Espíritu Santu lade tu la?
ñee cadi jneza icaa du xiixa de laatu ni acané para ibani du la?
12 Pa ruluíꞌ jneza acané tu ca xcaadxi la?
ñee cadi jma rusi jneza acané tu laadu la?
Peru qué huanaba du ni laatu purti rabi du zaa gua du irá ni laca laadu,
ti cadi cuaqui du xiixa ni ucueeza stiidxa Cristu.
13 Ñee qué ganna tu pa endaró ni nuu ndaani yuꞌdu sti Dios nga ro cani runi dxiiña ndaani yuꞌdu que la?
Ne zaqueca cani runi dxiiña lu altar,
laca ro ca ni nexhe lu altar.
14 Zacaca nga gudixhe Señor ni para cani canayuíꞌ de evangeliu,
ibani ca de evangeliu.
15 Neca zacá ni la?
peru qué huayune pur icaa ni,
ne cadi para udii tu ni yanna cucaa ni raríꞌ.
Purti para naa jma galán ñate que ñaxha cabe naa enda nayeche ni napa riꞌ:
cayune xhiiña Señor sin guiaxaꞌ.
16 Pa ñaxa saca cayué stiidxa Cristu la?
ma cadi cayune gastiꞌ,
purti cuchiiña naa güe ni.
Ne pa qué güe ni la?
nanna xi gueda iree xaꞌ yaꞌ.
17 Pa de naa ñale ñune ni la?
ñanda nicá lua niguixe cabe naa.
Peru cadi de naa biale gune ni,
sínuque biaana ni ladxi nayaꞌ.
18 Zacá nga laani.
Ni riaxa la?
nga enda nayeche napa ra cayué stiidxa Cristu sin guiaxaꞌ,
sin nicaa irá ni nicaa saca cayué ni.
19 Neca cadi caya yaga lu ná irutiꞌ,
peru laca naa bine pur icaya yaga lu ná irá para gune ganar jma stale binni.
20 Lade ca judíu la?
bibane casi judíu para gune ganar ca judíu.
Ne lade cani nabani xaꞌna ley la?
laca bine irá ni na ley para gune ganar cani nabani xaꞌna ley,
neca ma cadi caya yaga lu ná ley.
21 Zaqueca ra nuu cani nabani sin ley,
bine casi ñaca qué ganna ley para gune ganar cani nabani sin ley.
Peru rune ni na Dios ne nabane xaꞌna ley sti Cristu.
22 Lade cani huaxiéꞌ riene rune sica huaxiéꞌ rieneꞌ.
Rune zacá lade irá cabe tílasi zacá ganda ulaꞌya caadxi.
23 Rune irá nga tílasi guni cre binni stiidxa Cristu,
ti zacá laca ne naa guieche nia ni.
24 Ñee qué ganna tu pa irá ni rie carrera ruxooñeꞌ,
peru tobi si ricaa premiu la?
Nga runi lauyubi uxooñe tu para icaa tu ni.
25 Irá cani cuyubi guni ganar la?
rapa ca laacaꞌ,
ne runi ca ni para icaa ca premiu neca chupa chonna si gubidxa chi iquiiñe ni laacaꞌ.
Peru laanu la?
zacaa nu tobi ni qué ziuu dxi initilú.
26 Nga runi rune tirá ruxooñe casi tobi ni cá ique guni ganar,
ne laca rune casi tobi ni rucaa,
ni qué runi si invite.
27 Rucueeza laca naa purti rune mandar naa,
quenquita bisiide xcaadxi binni ne naa piaꞌ qué iree nduaꞌ.