Modo raca xhiiña Dios
3
Hermanu caꞌ,
qué huayanda inié nia laatu casi rinié nia cani runi ni na Espíritu Santu,
sínuque huanié nia laatu casi rinié nia cani runi ni na ique,
purti nahuiini ru tu lu stiidxa Cristu.
2 Bisiide laatu puru si ni qué igana,
purti caꞌru chuꞌ tu para iziidi tu ni nagana chiqué,
nin de yanna,
casi runi cabe badu huiiniꞌ,
leche si rudii cabe gue ora caꞌru chuꞌ para go.
3 Ne cadi caniisi tu lu stiidxa Dios,
purti nabani ru tu modo na ique tu.
Nin tobi de laatu qué riná tidi stobi lú,
ne ridinde diidxa tu,
ne cadi nuu tu tobi si.
Ne laga cayuni tu irá nga,
ñee na tu cadi cayuni ru tu ni na ique tu la?
Lácaxa cadi zacaca runi cani caꞌru guni cre Cristu.
4 Purti nuu de laatu na:
“Naa xpinni Pablu naa.”
Ne stobi na:
“Naa xpinni Apolo naa.”
Ne zacá cayuni tu casi runi tutiisi binni.
5 Tuu nga Pablu pue,
ne tuu nga Apolo.
Biquiiñe si Dios laadu para bini cre tu.
Cada tobi biꞌni dxiiña modo bidii Dios ni laa.
6 Casi ñaca naa bidxiibaꞌ,
ne Apolo bizee,
peru Dios bisiniisi ni.
7 Nga runi nin ni rudxiibaꞌ,
nin ni ruzee,
iruti naca,
purti Dios nga rusiniisi ni,
ne laa si nga risaca.
8 Ni rudxiibaꞌ,
ne ni ruzee la?
tobi si laacaꞌ,
ne cada tobi ziaxa biaꞌ dxiiña biꞌniꞌ.
9 Laadu la?
tobi si runi né du Dios dxiiñaꞌ,
ne laatu naca tu casi ti ñaa stibe.
Ne laca naca tu casi ti yoo ni cucuí be.
10 Ucané be naa gundaa cimientu casi runi albañil.
Peru ma adxé tu cucuí yoo luguiá cimientu que.
Ne cada tobi naquiiñe guꞌya chaahui ximodo ucuí yoo luguiá ni.
11 Cimientu que ma nuu,
ne iruti zanda indaa stobi jma que ni ma gulaa ca,
purti cimientu que nga Jesucristu.
12 Peru ziuu tu ucuí yoo de oro luguiá cimientu que,
ne nuu tu zuni ni de plata o de guie risaca,
de yaga,
de ziña,
o de guixi.
13 Ne zahuinni ximodo biꞌni cada tobi dxiiña,
dxi gueeda Señor.
Purti dxi ganda dxi que,
napa cani xidé tidi cani lu gui,
ne pur gui que zahuinni pa risaca dxiiña ni biꞌni cada tobi.
14 Ne tu qué chaqui ni bicuí lu cimientu que la?
zacaa premiu.
15 Peru pa chaqui ni biꞌni be que la?
zaree uniti be,
peru zalá be,
neca casi rilá binni ora riaꞌqui irá xixé stiꞌ.
16 Ñee qué ganna tu pa laatu nga yuꞌdu sti Dios,
ne nabeza Espíritu stibe ndaani ladxidóꞌ to la?
17 Ne pa chuꞌ tuuxa unitilú yuꞌdu sti Dios la?
zunitilú Dios laa,
purti ma ulee chu Dios yuꞌdu ca para laa,
ne laatu nga yuꞌdu ca.
18 Cadi quite tu laca laatu.
Pa nuu de laatu na nuu xpiaani casi na binni guidxilayú la?
jma galán gaca nahuati para laacabe,
purti zacá ziuu xpiaani nezalú Dios.
19 Purti ni rabi binni guidxilayú enda biaani la?
enda huati ni para Dios.
Casi cá ni lu Xquiꞌchi Dios:
“Cani nuu xpiaani la?
rinaaze be laaca lu enda nexhená sticaꞌ.”
20 Ne cá ni sti lugar sicaríꞌ:
“Nanna Señor irá ni riníꞌ ique cani nuu xpiaaniꞌ.
Ne nanna be qué iquiiñe ni.”
21 Cadi udxiiba tu laca laatu tisi zinanda tu tuuxa hombre,
purti dede dxi bini cre tu Cristu ma stitu irá xixé.
22 Naca ni Pablu,
Apolo,
Pedru,
guidxilayú,
enda nabani,
enda guti,
ni nuu yanna,
ni chi aca ruꞌ,
stitu irá xixé ni.
23 Ne sti Cristu laatu,
ne sti Dios Cristu.