Ananías ne Safira
5
Peru uyuu stobi hombre lá Ananías.
Laa ne Safira xheela bitoo ca ti layú.
2 Ulee be tindaa lú ni ne yené be ni ra nuu ca apóstol,
gudixhe be ni xa ñee caꞌ.
Ne nanna xheela be xi biꞌni be.
3 Para na Pedru rabi laabe:
―Ananías,
xiñee bidiiu lugar chuꞌ binidxaba ndaani ladxidóꞌ lo para usiguiiu Espíritu Santu ne guiaana neu tindaa lu ni bitoo lo ca.
4 Dxi napu ni,
ñee cadi stiuꞌ ni la?
Ne dxi ma bitoo lo ni que,
laca stiuꞌ saca ni para ñuni neu ni racalaꞌdxuꞌ.
Xiñee canatidi lu xquenda biaani lu guꞌnu zacá.
Cadi binni di nga ucalaꞌdxu nusiguiiuꞌ,
sínuque Dios.
5 Ora bina diaga Ananías ni na Pedru que,
biaba guti.
Nabé bidxibi irá cani gunna ni.
6 Ne bidxiña caadxi hombre huiiniꞌ,
ucuaa ca laabe,
bichenda ca laabe lari,
para yeucaachi ca laabe.
―Ñee biaꞌ ri bitoo to layú stitu la?
―Biaꞌ cá,
na.
9 Oraque na Pedru:
―Xiñee uca tu tobi si para guꞌya tu pa zanda usiguii tu Espíritu sti Dios.
Biaa guꞌyuꞌ ma zeda yuu cani yeucaachi xheeluꞌ.
Ne laca ziné ca lii.
10 Oraqueca biaba be xa ñee Pedru,
guti be.
Ora biuu ca hombre huiini que,
biiya ca ma guti be,
para ucuaa ca laabe yeucaachi ca laabe cueꞌ xheela be.
11 Nabé bidxibi ca xpinni Cristu ne irá cani bina diaga ni uca que.
Ra uca stale milagru
12 Biquiiñe Dios ca apóstol para biꞌni stale milagru,
ne bisihuinni enda nandxóꞌ sti lade ca binni que.
Irá cabe ridxiña cabe ra corredor ni rabi cabe sti Salomón que.
13 Ca xcaadxi binni la?
bidxibi ca ñuu ca lade cabe,
peru irá binni guidxi que cudxiiba laacabe.
14 Ne jma rusi cadale cani runi cre Cristu,
cásica hombre zaqueca gunaa.
15 Biiya binni irá ni cayuni ca apóstol,
para bizulú ca ulee ca binni huará.
Nuu ni nexhe lu luunaꞌ,
lu camilla.
Ne udixhe ca laacabe lu calle ti ora tidi Pedru raqué,
neca bandá si sti tidi luguiá cabe.
16 Dede ca binni guidxi nuu gaxha Jerusalén bedané ca binni huará ne ni caguite binidxaba ique,
ne irá cabe bianda cabe.
Ra yeguyoo ca apóstol
17 Peru biasa sacerdote gola,
laa ne ca saduceu ni nuu né laa,
bidxiichi ca purti ma zinanda binni ca apóstol.
18 Para unaaze ca ca apóstol biseguyoo ca laacabe ndaani lidxi guiiba sti guidxi que.
19 Peru lu gueela beeda ti ángel sti Dios bixhele puerta sti lidxi guiiba que,
ulee laacabe ne na rabi laacabe:
20 ―Laché lachiuzuhuaa ndaani yuꞌdu roꞌ.
Lagüíꞌ né binni stiidxa enda nabani ni cudii Dios yanna riꞌ.
21 Nga si bina diaga cabe biree cabe.
Ne siadóꞌ roꞌ biuu cabe ndaani yuꞌdu roꞌ,
bisiidi cabe.
Laga cayaca irá nga la?
gupa sacerdote gola ne cani nuu né laa ti junta,
ne guridxi ca ca justicia ne irá ca binni gola sti ca judíu.
Oraque biseenda cabe tu chi ndee ca apóstol ndaani lidxi guiibaꞌ,
guedané laaca ra nuu cabe.
22 Peru ora yendá ca gendarme que ra lidxi guiibaꞌ,
qué nidxela ca ca apóstol,
para bigueta ca yetidxi ca laacabe,
23 na caꞌ:
―Yegu chaahui lidxi guiiba que yendá du,
ne zuhuaa cani cayapa ni,
peru ora bixhele du ni la?
iruti nuu ndaani ni.
24 Ora bina diaga sacerdote gola ne xaíque sti cani rapa ra yuꞌdu roꞌ ne ca xaíque sti ca sacerdote xi na ca gendarme que la?
na caꞌ:
―Nanna xi gueda iluxe irá ndi yaꞌ.
25 Peru óraque beeda tobi,
beda tidxi laaca xi cayaca,
na:
―Ndaani yuꞌdu roꞌ nuu ca hombre biseguyoo to que,
cusiidi ca binni.
26 Para biree comandante ne ca gendarme,
yecaa ca ca apóstol peru sin ñuniná ca laacabe,
purti cadxibi ca uchá ca binni que guie laacaꞌ.
27 Bedané ca laacabe ne bizuhuaa ca laacabe nezalú ca justicia.
Oraque na sacerdote gola rabi laacabe:
28 ―Ñee cadi biduꞌnda ca du lú tu cadi usiidi ru tu stiidxa Jesús la?
Yanna biaa xi ma biꞌni tu.
Ma bichá tu stiidxa be idubi naca Jerusalén ne cudxiiba ru sica tu donda luguiá du,
ma na tu laadu biiti du laabe.
29 Oraque na Pedru ne ca xcaadxi apóstol que:
―Jma naquiiñe uzuꞌba du stiidxa Dios que stiidxa binni.
30 Dios sti ca bixhoze gola nu undisa Jesús ni biiti tu ra bicaa tu laa lu cruz que.
31 Ma undisa Dios laabe ne bicuí laabe cueꞌ para aca be xaíque sti iráꞌ ne ulá be binni,
ti pur laabe ma zanda gaca perdonar ca binni Israel ra inaba ca perdón Dios.
32 Ne cayabi du laatu dxandí irá ndiꞌ,
ne cadi laasi du sínuque ne Espíritu Santu ni rudii Dios cani ruzuuba stiidxaꞌ.
33 Nabé bidxiichi ca binni que ora bina diaga ca xi na ca apóstol,
ne ucalaꞌdxi ca ñuuti ca laacabe.
34 Peru óraque biasa tobi de ca justicia lá Gamaliel.
Naca fariseu ne rusiidi ley,
ne irá binni rucaa diaga laa.
Bizuhuaa ne unaba iree ca apóstol ti ratu.
35 Ne óraque na:
―Binni Israel caꞌ,
laguuya xii nga chi guni tu ca hombre ca.
36 Purti chiqué biasa ti hombre lá Teudas,
na laa nga tuuxa.
Ne yenanda stale binni laa,
biaꞌ tapa gayuaa hombre.
Peru qué nindaa de ngue biiti cabe laa ne birá xpinni bireeche,
ne raqué biluxe ni.
37 Bigueta dxi cayaca censu biasa stobi lá Judas,
binni Galilea.
Bitopa stale binni para sa nanda laa.
Peru laca guti,
ne birá xpinni bireeche.
38 Nga runi cayabe laatu cadi guni tu ca hombre ca gastiꞌ.
Laudii lugar che cabe.
Purti pa binni gudixhe ni zinanda cabe ca la?
qué zandaa ibiá ni.
39 Peru pa de Dios zeeda ni la?
qué zanda di uchiá tu ni.
Ne pa uyubi tu guni tu ni la?
zacá zucaa lú tu Dios.
40 Ne irá cabe ucuaa cabe stiidxa Gamaliel,
para guridxi cabe ca apóstol,
gudiñe cabe laacaꞌ ne gudxi cabe laaca ma cadi güi ru ca stiidxa Jesús.
Oraque ru bindaa cabe laacaꞌ.
41 Ne biree ca apóstol de ra nuu ca justicia que,
ziyeche ca purti bidii Dios lugar usituí binni lú ca purti xpinni Jesús laacaꞌ.
42 Ne qué ñaana dxí cabe de ñuiꞌ cabe stiidxa Cristu.
Irá dxi bisiidi cabe ni ndaani yuꞌdu roꞌ ne ralidxi binni.