Ra zuhuaa Pedru ne Juan nezalú justicia
4
Cayuíꞌ né ru Pedru ne Juan ca binni que diidxa ora biuu ca sacerdote ne xaíque sti cani rapa ra yuꞌdu roꞌ,
ne ca saduceu.
2 Cadxiichi ca xiñee cusiidi cabe binni zabani gueꞌtu purti bibani Jesús.
3 Ne unaaze ca laacabe biseguyoo ca laacabe.
Ne biaana cabe raqué gueela que,
purti ma huadxí ngue.
4 Peru stale de cani bicaa diaga laacabe bini cre,
biaꞌ gaayu mil hombre sin igaba gunaa.
5 Sti dxi que guca ti junta Jerusalén.
Bidxiña ca xaíque sti guidxi que ne ca xaíque sti ca sacerdote ne ca maistru de ley,
6 ne Anás sacerdote gola ne Caifás ne Juan ne Alejandru ne irá ca familia sti sacerdote gola.
7 Para bisenda caa cabe Pedru ne Juan,
bizuhuaa cabe laaca galahuiꞌ ne rabi cabe laacaꞌ:
―Tu gudxi laatu guni tu ni cayuni tu riꞌ o tu biseenda laatu guni tu ni.
8 Dxá ladxidóꞌ Pedru de Espíritu Santu para na rabi laacabe:
―Laucaa diaga,
xaíque sti guidxi ne xaíque sti ca sacerdote.
9 Yáquexa yanadxí canaba diidxa tu laadu ximodo ucané du hombre nachita ñee riꞌ,
o ximodo bianda be la?
10 zabi du ni laatu para ganna tu,
laatu ne idubi naca guidxi Israel.
Jesucristu ni bicaa tu lu cruz que,
undisa Dios laa de lade gueꞌtuꞌ,
ne laabe nga bisianda be hombre zuhuaa lú tu riꞌ.
11 Ni biꞌni tu Jesús ca zeda gaca casi ñaca nusaꞌbi tu ti guie ra cucuí tu yoo,
ne nidxiña dxi ma guie que pe ninaaze yoo que.
Purti yanna ma bidxiiba Dios laabe.
12 Ne laasi be zanda ulá be laanu,
purti iruti ru stobi ndaani guidxilayú ni huaguixhe Dios ulá binni,
sínuque laasi be.
13 Ora biꞌya cabe cadi cadxibi Pedru ne Juan para iníꞌ,
ne nanna nda cabe huaxiéꞌ napa ca scuela ne iruti naca ca la?
nabé bidxagayaa cabe.
Ne bietenalaꞌdxi cabe uzá né ca Jesús.
14 Peru qué ñanda niníꞌ cabe gastiꞌ purti zuhuaa dxa hombre ni bianda que raqué.
15 Oraque gudxi cabe laaca iree ca de raqué,
para uníꞌ stiidxa cabe laasi cabe,
16 na cabe:
―Xi guni né nu ca hombre ri pue,
purti dxandí milagru ni biꞌni cabe ca,
ne irá binni Jerusalén nanna ni.
Qué zanda gabi nu cadi dxandí ni.
17 Peru para ma cadi ireeche ru ni lade binni la?
uchibi nu laacabe ti ma cadi lica uzeete ru cabe lá Jesús.
18 Para uridxi cabe laaca sti tiru ne biinda cabe lú ca ma cadi usiidi ca stiidxa Jesús nin uzeete ca lá.
19 Para na Pedru ne Juan rabi laacabe:
―Laguuya si laatu pa jneza nezalú Dios uzuꞌba du stiidxa tu ne cadi uzuꞌba du stiidxa Dios.
20 Purti qué zanda usaana du de güi du ni biduꞌya du ne ni bina diaga du.
21 Bichibi si cabe laacaꞌ,
bindaa cabe laaca purti qué ñanda ñuniná cabe laaca pur irá binni que.
Irá cabe cusisaca cabe Dios pur ni guca que,
22 purti ma napa hombre ni bianda que jma de cuarenta añu.
Ra caníꞌ né ca xpinni Dios laa
23 Biree si Pedru ne Juan biyubi ca ra nuu ca xcaadxi de laaca que ne byuíꞌ né cabe laaca xi na ca xaíque sti ca sacerdote ne ca xaíque sti guidxi.
24 Ora bina diaga ca xi na cabe la?
irá cabe tobi si uníꞌ né cabe Dios na cabe:
―Dios,
lii runi mandar lu iráꞌ.
Lii bizáꞌ lu ibáꞌ ne guidxilayú ne nisadóꞌ ne irá ni nuu ndaani cani.
25 Ne laca lii uníꞌ lu ra bisiníꞌ Espíritu Santu David ni biꞌni xhiiña luꞌ,
ra na:
Xiñee cayasa cani cadi judíu,
caguixhe ca guni ca ni qué zanda guni caꞌ.
26 Uyuu ca rey de guidxilayú tobi si,
laaca ne ca xaíque sti ca guidxi,
para bicaa lú ca Dios ne Cristu ni ulí be.
27 Ne dxandí zacá pe nga uca ni ndaani guidxi riꞌ.
Herodes ne Poncio Pilatu ne cani cadi judíu ne ca judíu,
irá ca uca ca tobi si uyé ca luguiá Jesús Xiiñi lu ni nayá ladxidóꞌ,
ni ulí lu que.
28 Ne zacá biꞌni cabe irá ni maca gudixhe lu gacaꞌ.
29 Yanna,
Señor,
biiya modo racalaꞌdxi cabe uchibi cabe laadu para guiaana dxí du,
ne ucané laadu,
cani cayuni xhiiña luꞌ,
para güi du stiidxa lu sin idxibi du.
30 Ne laga cayuni du ni,
lii gudixhe ná luguiá cani huará para guianda caꞌ,
ne ucané laadu guni du milagru ne seña pur enda nandxóꞌ sti Jesús Xiiñi lu ni nayá ladxidóꞌ.
31 Ora biluxe uníꞌ né cabe Dios,
biniibi dxacha ra nuu cabe que ne bidxá ladxidóꞌ cabe de Espíritu Santu ne jma rusi ma qué nidxibi cabe byuíꞌ cabe stiidxa Dios.
Tobi si naca ca xpinni Cristu
32 Stale binni ma runi cre Dios,
ne irá ca nuu ca tobi si.
Tobi si ni caníꞌ ique cabe,
tobi si ni racalaꞌdxi cabe.
Ne iruti cadi caníꞌ sti si ni napa,
sínuque sti irá cabe ni.
33 Cadi cayaana dxí ca apóstol de güi né ca binni dxandí biiya ca ma bibani Señor Jesús,
ne nabé cahuinni enda nandxóꞌ sti Dios luguiá caꞌ,
ne caguu Dios ndaaya irá caꞌ.
34 Nga runi nin tobi de laacabe qué ñaadxa gasti purti irá cani napa layú ne yoo bitoo cani ne bedané ca saca ni,
35 gudixhe ca xa ñee ca apóstol para biaazi ni lu cada tobi biaꞌ caquiiñeꞌ.
36 Lade cabe uyuu tobi lá José.
Ulee lá ca apóstol laabe Bernabé.
Stiidxa cabe riníꞌ ni Tobi ni Rusiecheꞌ.
Binni Chipre laabe,
ne za be de Leví.
37 Gupa be tindaa layú.
Bitoo be ni ne bedané be saca ni,
gudixhe be xa ñee ca apóstol.