Ca diidxaꞌ ni bidii Diuxi David
Diidxariuundaꞌ rusisacanécabe Diuxi ra ziguiꞌbacabe.
132
Bietenalaꞌdxiꞌ David, Tata Diuxi,ne guiráꞌ ca xizaa xtiꞌ;
2 bietenalaꞌdxiꞌ ni bidii xtiidxaꞌ peꞌ,
ni nadxóꞌ xti Jacob lii:
3 «Qué ziuaadiáꞌ ndaaniꞌ yoo,
ne qué zatadiáꞌ guiziiladxeꞌ,
4 qué zutaagualuáꞌ
ne qué zasediáꞌ nin caadxi huiiniꞌ,
5 laga caꞌruꞌ guidxelaꞌ ti yoo
ra cueza Tata Diuxi, ni nandxóꞌ xtiꞌ Jacob.»
6 Ndaaniꞌ guidxi Efrata binadiagadu
nuu ti guiña ra gaꞌchiꞌ ca diidxaꞌ ni bitaaguné Diuxi ca xpinni,
bidxéladu ni ndaaniꞌ ca layú xtiꞌ Jáar.
7 ¡Chuu ndaaniꞌ yuꞌduꞌ xtiꞌ Tata Diuxi!
¡Chigusuxibinu xañeebe!
8 Biasa, Tata Diuxi, ne guiña nandxóꞌ xtiuꞌ,
ne gudáꞌ lu dani riꞌ ra guiziiláꞌdxiluꞌ.
9 Ca gueꞌdxeꞌ xtiuꞌ guzuchaahuinecaꞌ guendajneza;
ne ca ni nadxii lii gucaacaꞌ ridxi nayecheꞌ.
10 Biꞌniꞌ ni pur David, ni runi xhiiñaluꞌ,
cadi gudxiiluꞌ xaique ni guliluꞌ.
11 Tata Diuxi bidiibe ti diidxaꞌ David,
ti diidxaꞌ ni qué zucuí sa laabe:
12 «Zucuéꞌ tobi de ca xiiñiluꞌ lu banguꞌ xtiuꞌ.
Pa ca xiiñuꞌ qué gucheené naa
ne guzuubacaꞌ diidxaꞌ ni chi gusiideꞌ laacaꞌ la?
laaca zuneꞌ ca xiiñicabe xaique,
zucuéꞌ laacaꞌ lu xpánguluꞌ ne qué ziuu dxi guiasacaꞌ.»
13 ¡Tata Diuxi gulibe dani Sión!
¡Gulibe ni para cuezabe luni!
14 «Ndiꞌ nga dani ra racaladxeꞌ cuezaꞌ dxi ne gueelaꞌ;
raríꞌ nga cuezaꞌ, purtiꞌ zacá racaladxeꞌ.
15 Zuguaaꞌ stale ndaayaꞌ ca guendaró xtini,
ne zuchayaꞌ ndaaniꞌ ca binni nazíꞌ xtini.
16 Zulayaꞌ ca gueꞌdxeꞌ xtini,
ne zuneꞌ ca ni que rucheené laacabe guguaꞌcaꞌ ridxi nayecheꞌ.
17 Ne racá gale stipa xtiꞌ David sti bieque.
Maꞌ napaꞌ ti biaaniꞌ roꞌ
ni guicaa xaique ni maꞌ guliéꞌ.
18 Zusutuéꞌ lú ca ni nanalaꞌdxiꞌ laabe,
peru laabe la? zugahueꞌ laabe ne guendanandxóꞌ.»