Diuxi, ni rulá Israel
Diidxariuundaꞌ rusisacanécabe Diuxi ra ziguiꞌbacabe. Ni bicaa David.
124
Pa Tata Diuxi qué ñaca tobi si ne laanu—guiníꞌ Israel ni yanna—,
2 pa Tata Diuxi qué ñaca tobi si ne laanu,
dxi biasa ca binni que luguianu,
3 ñábicaꞌ laanu nabani nabánicanu
ra niguiꞌbaꞌ xiana xticaꞌ luguianu.
4 Ora que nixubiyú ti nisa gueꞌlaꞌ laanu;
¡ne nidiꞌdiꞌ ti guiiguꞌ nundaahuaꞌ laanu!
5 ¡Ora que nidiꞌdiꞌ ti nisa
cuxooñeꞌ nadipaꞌ luguianu!
6 ¡Nandaayaꞌ gaca Tata Diuxi,
purtiꞌ qué nusaana laanu xa láyacabe nuxuuxecabe laanu!
7 Bilanu lu xaléꞌ xtícabe
sica rilá ti maniꞌ huiiniꞌ lu náꞌ ca binni guuzeꞌ;
bixá xaléꞌ xtícabe, ne gunda bixóꞌñenu.
8 Tata Diuxi nga bilá laanu,
laabe bizaꞌbe guibáꞌ ne guidxilayú.