2 Peterus
Yesusdi wepra deipu ngebo, er si Peterusdi, butene taru sekeipseu upu
Abuku seku deiyo ngeboda, Peterus kuramu. Asuratda, Peterusdi butene taru seku surat cadi, er sida 2 Peterus penupe. Peterusda, Yesusdi wepra deiamu neng, sun 12 neng kankan ton kuramu. Yesus cap embaramreidi, Yesus er upu gekepra teka tenepudi, dombaramu. Tonda, amenda taru Peterus cap, Paulus cap, antapdareidi, Peterusdi Paulus cap, er sengamu surat yuma cap, ila di kael keamu (2 Peterus 3:15-16, Galatia 1:18; 2:1-21). Peterusda, Yahudi yala ngebo kuramu dinin, Yunani upu ton kael keamu. Asuratda, er butene taru di seku. Ton suratda, menmena taru seku. Asurat butene taru seku taru ngeda, Peterus konum wisi deiamu (1:12-15).
Peterusdi, asurat butenenge sekra, teka tenena nesala damai dokotepu. Asurat seku deiyoda, weik akapu dinin, ton ngeda, mok upu peteremna nengdi inipra, teka tenena nesala sun kan-kan konum wekya tep, ‘Tek sisi kurami nesaladi, mok neng sun upu gekepkamnung’ tenen, asurat seku. Ton ngeda, Peterusdi, ‘Nun deiyo ngebo Yesus, menmena tamupra yankamre,’ tenepka cadi, asurat dopropi nesaladi, ‘Dipru ketenepra, pio dinapu kunkameng’ tenen, asurat seku. Tonda, ‘Anesala sun dipru wisipkamre’ tenen, asurat seku.