2 Timotius
Paulusdi peterepupa, teka tenepu ngebo Timotius tep, butene taru sekeipu upu
Abuku 2 Timotiusda, Paulusdi, Timotius tep sekra dokotepu. Paulusdi Timotius tep, asurat butenenge sekra dokotepkada, Roma mutu ila nimi deiyo ngebo Nerodi, Paulus ateng koupra wenemna ati pumbon dongopupa, dakuramnganen, ataru neitamai di, asurat sekra Timotius damai dokotepu. Ataruda, Paulusdi, ‘Gume, ue taru yambulanun ton konum kupyopda, ne popkamnenge’ tenen, konum kael keamu. Ange tep, mambul kange doupudi, ‘Timotiusda, menmena ne damai yatupa, kange di ton cap, antapteneme’ tenen, “Timotiuso, ne damai menmena yarume,” pepra, asurat seku (2 Timotius 1:4; 4:9,21).
Timotius cap, Paulus cap kikiman pel doramreia cadi, Paulusdi Timotius tep kange deipu (Filipi 2:19-22). Abuku neitamaida, Paulusdi, ‘Timotiusdi, Efesus mutu nesala makuna tep, ila mambul upu peterepkamrenge cap, ake’ tenen, sekra deipseu ngeda, ake. “Mok upu peteremna nengdi penge upu deiki di, Yesus er kai telep upu, nimi lyemna upu mali kupserura tep, peterepkesi upuda moupra talepmemdi, kalengkamrume,” pepu (1:14, 3:14). Tonda, “Allah upu peterepmempa, mali nengdi ikin keca kan nong deiki deipkenga peda, dipru ketenemnapu kunkamrume. Peteremnada, tamna pio gume,” pepu (1:3-7; 4:1-8).