Titus
Paulusdi peterepka deiki di, teka teneramu ngebo, er sida Titus tep, asurat seku
Paulusdi, Yesus er kai telep upu peterepka deiki di, Titus gekepra teka tenepu (1:4). Amenda taru, Paulus peterep embenamu taru neitamai, Titusdi Paulus tep, telep kupra melimamu. Paulusdi Antiokia mutu tapra, ‘Ne peteremnun upu lap perbenkun’ tenen, Yerusalem mutu beu taruda, Titus cap berei (Galatia 2:1-3). Titus cap bereiya tep, Paulusdi, Yahudi yala nesala tep, “Gume, Titusda Yunani ngebo kurur dinin, Yesus tep teka tenepkada, akonuma. Erda den bam bol deiki tara sengnada men putarure. Angeda dakwapye,” pepu. Upepka deiki di, Yerusalem Yahudi yala nesaladi, ‘E, Yesus tep, teka tenepmepyopda, adeiki dipu Allahdi kange deriserure’ tenen, moupra kael kepi (Galatia 2:3-5).
Paulusdi, ‘Titusda, Korintus teka tenenge nesala tep, makunkamre’ tenen, Titus dopra, Korintus mutu dokotepu. Amenda taruda, Paulus cap, Titus cap, Kerit mutu peterep emberei. Kerit mutu nesalada, pio mali-mali kuramya cadi, pel dona gum, tali-talipu kuramidi, jen keca weika di jerami. Mok upu weik ton perami. Ukuramya tep nengeda, ‘Kerit mutu teka tenepi nesala melipra peteremkamre’ tenen, Paulusdi Titus dopra, Kerit mutu deipu (1:5, 2:15; 3:12-13).