1 Timotius
Paulusdi peterepupa, teka tenepu ngebo, Timotius tep, menmena taru sekeipu upu
Asurat seku deiyo ngeboda, Paulus kuramu. Paulusdi Efesus mutu peterep embeu taru, menmena taru ngeda, Timotius cap bereiya tep (Rasul 19:22), Paulusdi, ‘Timotiusda, Efesus mutu teka tenepi nesala melipra peteremkamre’ tenen, Timotius dopra, kange di ton cap Efesus mutu dokotepupa bendopu (1 Timotius 1:3). Paulusdi, Timotius tep, ‘Ukupkurume, aupu peterepkamrum,’ pepnyopda, ‘Er dipu peterepkamre’ tenen, asurat sekra, Timotius damai dokotepu.
Timotiusda, pio telep pel don ngebo kuramu. Paulusdi Listra mutu peterepu taruda, Timotius gekepudi teka tenepka cadi, Paulusdi Timotius tep, “Ne mi sisa utopu kurume,” peramu (1:2). Timotius cap, Paulus cap, sun kikiman peterep embaramrei mutuda, Makedonia tara mutu yuma cap, Akaiya tara cap (Rasul 17:14-15; 18:5), tonda Efesus mutu cap, Korintus mutu cap, peterep embaramrei. Tonda, Paulusdi teka tenena nesala tep, surat weike sekra dokotemamu taruda, Timotius cap melipra sengamu. Asurat sida: 1-2 Korintus, Filipi, Kolose, 1-2 Tesalonika, Pilemon.
Abuku neitamaida, Paulusdi, mambul upu sekra deipseu ngeda, ake. “Mok upu peteremna nengdi penge upuda, gekena gume. Aupu tep, sundi upu sekrume,” pepu (1:3-7; 4:1-8). “Efesus mutu teka tenena nengdi Allah er si ereipkamenge taru kunkamenge cap, sun kikiman kunkameng taru, kunkameng keca tep, melipra peterepkamrume,” pepra Timotius tep pepu (2:1-15). Tonda, “Efesus mutu teka tenena neng, sun deiyo neng wepra deipkamrume,” pepu (3:1-13; 5:17-25).