Filipi
Paulusdi, Filipi mutu teka tenerami nesala tep, sekeipu upu
Abuku seku deiyo ngeboda, Paulus kuramu. Abukuda, Filipi mutu kuramidi, teka tenerami nesala tep sekra dokotepu.
Paulusdi abuku seku taruda, Roma mutu neitamai dinin, wenemna ati dongopmemeipa, asurat sekra, Filipi mutu teka tenena nesala tep dokotepu. Filipi mutuda, Roma mutu ila deiyo neng taleami. Filipi nesala kan-kan neitamai, jen talen neng weik kurami. Sunda jen talena pel dorami dinin, ange tapra, amutu yana kurami. Roma mutu deiyo nengdi, ajen talen neng tep, amutu tu karepipa, atu talepra amutu kurami. Tonda, yuk tali nesala ton, amutu neitamai kurami. Amutuda ila ati arum domi mutu gume.
Abuku neitamaida, Paulusdi, ‘Aupuda ila mambule’ tenen, sekra deipseu ngeda, ake. Ton ngeda, yuk nesala amutara kuna cap; kange dipru bouna di kuna cap; ‘Allah karepneu pel donkamne’ tenen, pio pe deipra, puto di pel dona cap; ‘Uo, ware kupkamne do?’ tenena gum dipapu, kange deipra teka tenen kuna cap; ‘Allah er puto deiki di melimnerepane, erdi karenere pel yuma doptene’ tenen, kuna cap tep, ato upu pepra seku. Tonda, Kristusdi, akeca-keca deiki tara kuramu dinin, ange yuma tapra, nimi nong utopu daudi, nun damai tuai mutu neitamai yana, depka deiki di lyepsuenge tep, aupu pepra seku.