Rasul 23

Paulusdi Sandeheren deiyo neng tep, pepu upu

Paulus tekrapudi, aYahudi yala neng, sun upu bongdina deiyo neng, ila neng, ada Sandeheren perami neng tep, kange deiprapudi, sun urasinaipu menmena dinmau. Dinmauanen, aupu pepu. “Ne kayapu, Allahdi dinerepa, ne gam kune taru yuma pe, ukutaru pape, pio dumsisipu kunune. Allahdi, ‘Ukupkamrume,’ peipneu pel yumada, konum telep kupra doramsidi gawal dakmane. Atep, ne kange neitamaida, ‘Mali kupsi do, gum do?’ tenen, pio men tenimtonerure,” pepu. 2 Upepupa, sun Yahudi yala Allah karena deiyo neng, sun ila deiyo ngebo gekepudi, adipapu, Paulus damai tekmai neng tep pepu. “Paulus katum bongopso,” pepupa sun anengdi Paulus si borum gweki.

3 Bongopipa, Paulusdi, “Er katum bongopso,” pepmau ngebo tep pepu.

“Allahdi, kan wenepra popkamkere. Kanda, pun deiamu co dinin, ‘Urasin telep kupkamre’ tenen, kurun co pe kwemameng dela utopu kurume. Ada, nong bol deikida, urasin telep utonun kurum dinin, kan dipru neitamaida, mali weik akwapmakere pepkene! Allahdi peipupa, Musa sekeiamseu mem upu perserya utopu, ‘Angeboda upu bokeipkun’ tenen, abukmarem dinin, kandi ‘Er katum bongopso,’ pepmarema deiki di kan peda Allah er upu yanipmarema de!” Paulusdi pepu.

4 Upepupa gekepidi, Paulus damai tekmai nengdi pepi. “Uo! Allah er karena tep ila deiyo ngebo, er tep mali upu pepra derinmarem adano! Ware deiyo tep balila kupmemdi aupu pepmarem do?” pepi. 5 Upepipa, Paulus tamupra pepu. “Uo, ne kayapu, arupda, ‘Angebo ake,’ tenen, moupra men kael kepsa tep, ‘Erda, Allah er karena tep ila deiyo ngebo kurure,’ men tenepmanue. Uda, Allahdi peipupa, er upu lap pena ngebo Musadi sekamngada, ake.

‘Sun nimi deiyo neng tep, mali upu peprap men derinkamrume.’ (Keluaran 22:28)

Ukupra sekamnga cadi, arup nedi pepmanu upu deiki di, mali kupmanua tep, sundi walito wenepmanerume,” Paulusdi pepu.

6 Upepudi, awekmai neng dipterepudi, ‘E ton tara neng Saduki neng wekmange, ton tara Farisi neng wekmange’ tenen, kael kepka tep, aSandeheren neng gekenmaiyai aupu ila di pepu. “Ne kayapu, ne apu yapu Farisi neng kuramitopu, ne peda, Farisi ngebo kunune. Neda, kange tenimtona gum di, pio dimpepra, ‘Allahdi konum deamenge neng gam bukra deipkamre taruda, dan taru kupkamre do?’ tenen, kange deipra dinapu kunune. Ange teka tenenuna tep nengeda, atumi sun upu lepsikra bongdinmanurume,” Paulusdi pepu. 7 Upepu pangeda, Farisi neng cap, Saduki neng capdi, sun yuk-yuk teneramya tep, ila upu deiki di pedanmankapidi, awekmai neng yuma bokra deipdai.

8 Uda, Saduki nengdi sun teneamyada, ‘Allahdi konum deamenge nengda men gam bukra deipkamre. Tonda, Allah er melimna neng, im deiki kunung neng malaikatda, pio men kununge. Angeda gume,’ tenerami. Tonda, ‘Konum deamenge neng, sun sambalada pio men kununge,’ tenerami. Saduki neng uteneramidi peteremami dinin, Farisi nengda, ‘Gume, Allahdi konum deamenge nengda tek sisi gam bukra deipkamre. Tonda, Allah er melimna neng, im deiki kunung nengda, malaikatda tek sisi dakununge. Akeca yuma akurure,’ teneramidi peteremami.

9 Awekmai neng pedanmankapidi bokra depdaepa, Farisi neng dinin, Yahudi yala neng, sun mem upu peteremna deiyo neng tekrapidi, upu puto di pepi. “Pio lepra deipmapdi tenepmapada, ‘Angebo Paulusda mali men kupke,’ tenepmape. Uda konum deamenge neng sambaladi do? Allah er im deiki melimna neng, malaikatdi do? Angebo Paulus tep, aupu pemtenge teptoda, ware kupra kuptepe do?” pepi.

10 Sun upu pio pedanapu kunmaipa, yu pio weik kupupa, kwemdanmaipa, ajen talen neng sun ila deiyo ngebodi, ‘Paulus nong popra sikname buktapnung’ tenen, kware kupka tep, er nyapu tep peipupa, sundi awekmai neng neitamai bena puto di dopropyopda, Paulus sun ati dubei. 11 Dubeipa, ipropkopda, alukunda dipu nun nai bo Yesus Paulus damai tengyaudi pepu. “Kwar dangna gum di, puto dipu kunkamrume. Yerusalem mutu kuramremdi ne tep telep kupra lap peramneremtopu, Roma mutu peda bememdi adipapu lap penkamnerume,” pepu.

Yahudi yala neng denge weik bulupra, ‘Paulus popkamep’ tenen, sisingami upu

12 Mapmaiya berekupa, Yahudi yala neng denge weik bulupra upu sisingamyanen, konum kupidi Allah tep peipi. Ada, “Paulus kapul popkamep taru yumada, jen cap, me cap pio men jenkamepe,” pepi. 13 Aupu sisingami nengda, denge weike 40 neng cap, tonda yuk neng cap, kikiman “Ukupkamepe” pepi. 14 Ukupidi, aupu sisingami nengdi, Allah karena tep ila deiyo neng sun damai cap, Yahudi yala deiyo neng, sun upu bongdina deiyo neng, wisi neng sun damai cap, perbei.

“Nunda Paulus kapul popkamep taru yumada, jen cap, me cap pio si teprapu kunkamepe. 15 Atep ukutaruda, sun cap, sun Sandeheren neng capdi, ‘Paulus nun damai deseo,’ pepra jen talen neng, sun deiyo ngebo tep moroprume. Ada, ‘Paulus kupu keca kange di moupra lepterepkamapa tep,’ pepra, domona upu deiki di upepkamrume. Nunda, Paulus ati men yanaprepane, bisaipu yakare panenda, konum keteneipmupka tep, bisi neitamaipu angebo popkamepe,” pepi.

16 Upepi dinin, Paulus er mal ner, er midi, “Paulus popkamepe,” pepra sisingami upu gekepudi, ajen talen neng, sun ati wekrapudi, “Paulus popkamkenga tep upu sisingkununge,” pepra lap perbeu. 17 Upepu pangeda, Paulusdi jen talen neng sun deiyo ngebo tenpu ngebo tep pepu. “Akaber ngeboda, kan ila deiyo ngebo tep, ‘Upu ton pepkaman,’ tenepmara tep, er dopra kan ila deiyo ngebo damai duberume,” pepu.

18 Paulusdi upepupa, angebodi Paulus er mal ner, er mi dopra, jen talen neng sun ila deiyo ngebo damai dubeu. Dubeudi ajen talen neng, sun ila deiyo ngebodi pepu. “Akaber ngeboda, kan damai, ‘Upu ton peipkukene,’ tenepmakera tep, nun men di ateng koupmupu ngeboda, ne tep erdi ami doprap, ‘Kan damai debenkamre’ tenen, moropneu. Ada, amidi pepkuker upuda akwapmara tepa,” pepu.

19 Upepupa, ajen talen neng, sun ila deiyo ngebodi, akaber ngebo buru taleprap yukai derirbeudi, “Kan tenipmarem upu dano. Aupu pepnerume,” pepra asipterepu. 20 Asipterepupa, akaber ngebodi pepu.

“Yahudi yala neng denge weik di, ‘Ukupkamepe,’ teneprapidi, ‘Paulus er upu lepterepkamepe,’ pepra domon upu pepkamakengada, ‘Paulus kupu keca kange di moupra lepterepkamapa tep, Paulus dopra Sandeheren neng damai dopra debenkurume,’ upepra yana moropkamakenge,” pepu.

21 Sun anengda, denge weik 40 neng cap, tonda yuk neng cap, ‘Paulus popkamep’ tenen, kalekmangdi, bisi bungmanga tep, sun upu gekeprap men kunupkurume. Sundi, ‘Yuk keca yuma tenena gum, Paulus popkamapada, adipapu poptepe’ tenen, “Paulus kapul popkamep taru yumada, jen cap, me cap pio men jenkamepe,” peprap, Allah tep konum pepra deipi. Ada janji kemna tep apedina upu pepra deipi. Ukutaruda, konum keteneipmangdi, ukupra tenenmange. ‘E, nun upu gekepserdi, “Ada walito, ukupkurume,” pepra, telep pepkaser do?’ tenen, “Dinapu kunmange,” pepu.

Akaber ngebodi jen talena neng sun ila deiyo ngebo tep aupu pepu. 22 Upepupa, ajen talen neng, sun ila deiyo ngebodi pepu. “Kandi aupu katuai lap pepmaneremada, yuk neng damai ton men pepkarume. Atep telepe daberume,” pepu.

Paulus dopra Kaisarea mutu neitamai, Gubernur Feliks damai dokotepi upu

23 Ajen talen neng sun ila deiyo ngebodi upepupa, er jen talen neng, ada deiyo neng utopu neng, butene neng tep peipu. “Nun jen talen neng denge weik 200 neng cap, kuda bali tara bukra embange neng, 75 jen neng cap, uda, co dula mar dopra embange neng, denge weik 200 neng cap keteneipkurume. Alukunda konum mapmenge taruda, Kaisarea mutu benkurume. 24 Tonda, ‘Paulus popnung’ tenen, kalekra meliprumudi ‘Gubernur Feliks damai telep kupra dubenkup,’ tenena tep nengeda, Paulus er bungne kuda ton wepra deipkurume,” pepu. 25 Ton ajen talen neng ila deiyo ngebodi surat sekrap deipu upu ake.

26 Neda Kelaudius Lisiasdi, nun pio telep ila nimi deiyo ngebo, Gubernur Feliks tep, “Telepe,” pepkene.

27 Angebo, ne dokotepmaken ngeboda, Yahudi yala nengdi popmanto kupi dinin, neda konum lepterepsidi, ‘Angeboda Roma mutu ngebo kurya’ tenen, kael kepsa tep, ne cap, ne nyapu jen talen neng capdi lyepra dopropmupke.

28 Sun Yahudi yala nengdi, “Er mali kupke,” penmaiyada, ‘Deiyo dano,’ tenepsidi, ‘Kael kepkun’ tenen, putapneupa, sun upu bongdin neng, ila deiyo neng, ada Sandeheren penung neng damai Paulus dopra deipsi. 29 Deipsidi, ne lelepra asipterepsidi, sundi, “Er mali kupke,” penmaiya deiyo kecada, Musa sekeiamu upu, Yahudi yala nesala, sun mem upuda, amsepu men teneramya cadi, ila upu di pedanmaiya deiki di, Paulus tep aupu pepi. Atep, asipterepsidi, ange kael kepsi.

Ange kael kepsi dipunen, erda amali kupka deiki di, nun nimi deiyo nengdi, yuk neng poptepya deiyo keca pio men kwapmare. Tonda, nun nimi ateng koupra wenemna ati dongoptepya deiyo kecada, men epsi. 30 Uda, amenda taru, tenpu ngebodi, “Sunda, ‘Paulus popkamepe’ tenen, upu sisingmange,” pepra, katuai lap pepmanerpa, adipapu Paulus dopra kan damai dokotepmakene. Tonda, Paulus tep, “Mali kupke,” pepi neng tep nedi pepsi. “Paulusda mali kupu ngeda ake-ake, tenepmarum upuda, Gubernur Feliks damai lap perberume,” pepsi.

Telepe, akonum pepkene.

Aupu yumada, jen talen neng, sun ila deiyo ngebodi surat sekra deipudi, Gubernur Feliks tep dokotepu.

31 Ange tep nengeda, ajen talen neng, Lisias peiputopu, Paulus doprapidi, alukunda neitamai dipu dubanmaiyanen, Antipatis mutupu dubei. 32 Bena mapmaiya berekyopda, sun kuda bali tara bukra embarami neng dipu, ‘Paulus dopra ordubenkameng’ tenen, sun tali jen talen nengdi abena tapra, sun ati tamupra bei. 33 Uda kuda bali tara bukra embarami neng banmaiyanen, Kaisarea mutu konum beiyopda, sundi Gubernur Feliks tep Lisias sekra deipu surat cap, Paulus cap, ‘Erpu dopropredi, dinkamre’ tenen, karepi.

34 Karepipa, Gubernur Feliks asurat dopra pepterepudi, Paulus tep asipterepu. “Kanda dan mutu nengdi deipkei do?” pepra asipterepu. Asipterepupa, Paulusdi tamupra pepu. “Neda, Kilikia tara nengdi deipnei,” pepu. Upepupa, Feliks gekepudi, ‘E ada Kilikia tara ngebo’ tenen, kael kepu. Kael kepudi upepu. 35 “Kan tep, ‘Mali kupmumada ake-ake’ pepkei nengda, sun yangedi pepkamkeng upuda, ne gekepkamane,” pepu. Tonda, Gubernur Feliksdi er jen talen neng tep pepu. “Sunda, Paulus dopra, ila nimi deiyo ngebo Raja Herodes, er ila ati, pio telep ati dongoprumudi pio moupra kalekrumudi dinkamrume,” pepu.