Rasul 12

Peterus wenemna ati pumbon di loptapra beu upu

Ataruda, amutu ila nimi deiyo ngebo, Gubernur ngebo, er sida Herodes, erdi gonga keprapudi, Yesus teka tenepi neng tenpu-tenpu tep, ikin keca sun nong deiki deriramu. 2 Herodesdi aneng tep, ikin keca deriramnganen, erdi jen neng peipupa, sundi parang ya doprapidi, Yohanes er du Yakobus popi. 3 Yakobus popipa, Yahudi yala deiyo neng epidi, ‘Walito popmange’ tenen, kange deipi. Yahudi yala nesala, sun deiyo neng kange deipya cadi, Gubernur Herodesdi er jen neng tep, “Peterus ateng koupso,” pepu. Aupu pepu taruda, ada sun Nena Gum Roti kwaneng kalemna kalemami tarupu.

4 Herodesdi jen neng tep peipupa, Peterus ateng kouprapidi, wenemna ati dongopi. Dongopidi gung dumbaripu, nimi dumbari-dumbari kepra, jen nengdi, ‘Peterus berur’ tenen, kalekmaidi dinmai. Herodes er tenepu ngeda, ‘Peterus wenemna ati dongopmanyanen, dopra katuai deipnepa, amutu nesala bulupra upu talepmengedi, “Nun nimi poipseo,” pepkamneng’ tenen, Peterus wenemna ati dongopu. Ada, sun Yahudi yala nesala Kaplemna Kailya Kalemna konum kalepropmengopda, ‘Ukupkamne,’ tenepu.

5 Atep, Herodes er jen talena nengdi, pio kalekmaidi dinmaipa, Peterusda wenemna ati pum tup kunmau. Sun dinmai dinin, sun Yesus teka tenepi nengdi, Peterus tep Allah pio tupa-tupa moronapu kunmai.

6 Peterus wenemna ati pum tumito mapmaua berekupa, ambutumitoda Herodesdi, ‘Peterus er upu boknedi, upu pepra deipkamane,’ tenepu lukundapu mapu. Rantai tapu di Peterus buru gerekdongopra, jen neng buru dana-dana gerekdongopra, Peterus neitamai mapupa, sun kikiman akati pumbonpu kunmai. Tonda, yuk jen nengdi bura tara buplan dam kalengmai. 7 Peterus cap, sun kikiman mapmarei jen neng cap, mapmaipane, Allah er im deiki kai melimna ngebo, malaikat dato-dato di awenemna ati pumbon belepra tengyaupa, dirine weik kupu. Allah er im deiki melimna ngebo malaikatdi, Peterus er nong yana dupudi bukeipu. Bukeipudi Peterus tep pepu. “Menmena tekroyo,” pepupa, Peterus buru ngantangai di rantai tapu gerekdongopmaiya lopsaku.

8 Ukupupa, Allah er im deiki melimna ngebo malaikatdi, Peterus tep pepu. “Kan deiki opkal kenekra deiyoteng deipmemdi, sandal kepo,” pepu. Upepupa, er peipmautopu Peterusdi ukupu. Ukupupa, im deiki melimna ngebo, malaikatdi ton cap pepu. “Kan deiki tara kenengna opkal kenekmemdi, ne menepra bane bisipu kan amenda domyakankurume,” pepu. 9 Upepupa, wenemna ati pumbon di, Allah er im deiki pel don ngebo, malaikat menepra baupa, Peterus amenda dombeupa bura tara berei. Peterus bura tara beu dinin, ‘Tek sisi ben do, gum do?’ tenepdaudi, ‘Gume ken deiki dipu bura bene,’ tenepudi tenimtonapu kupu.

10 Utenepupa, amalaikat cap, Peterus cap bereidi ati pum bisi neitamai butene buplan dam nimi butene kalekmareipane, aneng bisipreidi, bura tara besi keca buplan dam yareipa, er yuk di paktapupa, bura tara berei. Abura tara buplan bisipreidi, sun ati arum domyai neitamai bereidi, tenpu bisi banmarei dinin, bisi neitamai di Peterus atapra, Allah er im deiki melimna ngebo, malaikat adipapu dimpepupa men epu.

11 Arup Peterus wang-wang pepmau dinin, Allah er im deiki melimna ngebo dimpepupa, ‘E, tek sisi bura bene,’ moupra tenepu. Ton tenepu. ‘Ukuda ne kaele, Allahdi er im deiki melimna ngebo, im deiki di malaikat dokotepmanerpa, Gubernur Herodesdi, ‘Ukupkamane,’ tenepmanunge cap, tonda, ‘Sun Yahudi yala deiyo nengdi ne tep, ukupkamepe,’ tenepneinge cap, ambutumi kupkamanetenge dinin, atumi konum lyepnera tep, men kupkamanenge,’ tenepu. 12 Ayuma tenepudi, kange doupra yo pepudi, tek sisi teneprap kaele kepu. Kaele kepudi, nimi weik bulupra Allah moronmaiyai Yohanes, ada Markus perami ngebo tep, er nin Maria atida, Peterus akati dam beu.

13 Akati dam beudi, bura tara bena tekudi, buplan gogo pepupa, akati melimna ner, er sida Rode erdi, ‘Ware ngebo yana buplan gogo pepmar do?’ tenen, ati pum di tekrap dirbeu. 14 Dirbeudi, Peterus penmau upu gekepudi, ‘E ada Peterus er pua,’ tenepudi kange deipu. Rode kange deipka tep, mankau di buplan men paktapudipu, Peterus acapu tapra, adipapu Allah moronmaiyai lap perbeudi, “Anengo, Peterus buplan dam yana tekmare,” pepu.

15 Upepupa, awekmai nengdi tamupra pepi. “Kandi pepmarem ngeda, men kupmanto cadi, kanda mutana nerdi penmarem adano,” pepi. Upepi dinin, aner Rodedi, “Gume. Peterus tek sisi buplan dam bura tara yana tekmare,” pio penmaupa, sun anengdi pepi. “Uo, ada Peterus er yuk embarur sambala yana tekmar adano,” pepi. 16 Upenmai taruda, Peterus pio buplan gogo penmaupa, sun anengdi kaukepronmai dinin, amenda buplan pangdirbei. Buplan bena paktapidi, dindeipa, Peterus atekmaua epi dingeda, sun lukdaidi buma teling pepu.

17 Ukupipa, Peterusdi, ‘Upu dimpepkununga’ tenen, buru bata deipu. Buri bata deipudi aupu lap pepu. Wenemna ati pum di, Allahdi Peterus lyepmaunge yuma aupu lap pepu. Ange lap pepudi ton cap pepu. “Yakobus cap, nun weite-du utopu kunup neng yuma tep, aupu yuma lap perberume,” pepudi akati tapra yukai beu. 18 Yukai bena mapmaua berekupa, awenemna ati jen neng kalekmai nengda, ‘Peterus dan benmar do?’ tenen, mali kange doupra kwepdanen, embeidi ergiringmai. Ukupipa, “Peterus ware kupmau do?” pepra asimdanmai. 19 Ukupipane, Gubernur Herodesdi pepupa, sundi Peterus tep pio ergiringmaiyanen, men epipa, Herodesdi akalekmai jen talena neng tep weika di asipterepu. Herodes asipterepudi yuk neng tep pepu. “Akalekmangu jen talena nengda poipneso,” pepu. Upepudi, Herodes Yudea tara tapra, Kaisarea mutu bena metekanun ton kunmau.

20 Uda, Herodes men di Tirus mutu nesala cap, Sidon mutu nesala cap tep, yu weik kuramnga tep, ataruda sun aneng, ‘Erdi nun upu gekepkamser do?’ tenen, nimi tenpu-tenpu wepra dokotepipa, er damai peryai. Herodes er ati pum keca taleamu ngebo Bilastus, amutu nengdi sun teneraminge yuma Bilastus damai lap pepipa gekepudi, er peda teka tenepka tep, Herodes damai beidi moropi. Herodes taleamu mutu neitamai di sun jen kunumyakaramya tep, deremdana gum di, ‘Telep kupra wisipra kutepe’ tenen, moropi. Sun jen kecada, Gubernur Herodesdi taleamu mutu neitamai dipu dororamya tepa.

21 Atep, Herodesdi wepra deipu tumi di, sun ila nimi deiyo neng pio telep opkal kemamitopu, Herodes aopkal keprapudi, er nimi upu bongdina deiyo ngebo bungamnga deiki bukudi, nimi weike bulupra wekmaiyai erdi upu pepu. 22 Herodesdi upu penmaupa, sun agekenmai nengdi pio tupa-tupa, “Angeboda nimi utopu ngebodi penmaser guma. Allah utopu ngebodi penmasere,” pepra ila di penmai. 23 Anengdi upenmaipa, Herodesdi, ‘Gume, ne telep kunmanada, ne puto deiki dipapu kunune,’ tenepudi, Allah er si men ereipka tep, adipapu im deiki Allah melimna ngebo, malaikatdi Herodes tep pu deiyo keca karepupa, kwali weika di er deiplyu jepropupa, menmena adipapu depu.

24 Gubernur Herodes depu dinin, yuk nengdi ton Allah upu peterepipane, yuk neng ton gekenmaidi, weik ton cap kupbarami. 25 Antiokia mutu nesaladi bulupra deipi co boda, Barnabas cap, Saulus capdi, Yerusalem mutu yana, Allah teka tenerami neng, sun deiyo neng karepreidi, sunda tamupra Antiokia mutupu berei. Sun benkureia tep, keteneprei taruda, Yohanes, ada Markus perami ngebo kikiman wisipra bei.