Rasul 9

Saulus er mali kuramu ngeda tapra, teka tenepu upu

Ayuma kuramu taru neitamaida, Saulusdi, “Uo, ‘Yesus er kurya utopu kuptepe’ tenen, putarepa piripra kael kemenge neng yuma, Yesus tep teka tenenung neng yumada, ne popkamne,” pio tupa-tupa uperamu. Atep, Saulusdi sun Israel neng Allah karena tep pel dorami neng, sun deiyo ngebo damai surat dorona tep mororbeu. 2 “Kandi upu pepnetumdi surat weika di sekra deipnutumopda, asurat deiki di dopra, Damsyik mutu neitamai Yahudi yala neng Allah upu peteremna ati betenedi, Yesus er upu tep, teka tenepidi, er bisi baramenge neng yumada, ateng koupraptenedi, Yerusalem mutu wenemna ati dongoptene. Ada nimi pe, nerapu pe yuma, Yerusalem mutu wenemna ati dongoptene.” Saulusdi angebo damai beudi moropu.

3 Moropupa, angebodi, “Telepe,” pepra asurat sekra karepupa, Saulusdi asurat doupra, ‘Damsyik mutu benkun’ tenen, gonga kepra banmau. Banmauanen, bisi neitamai Damsyik mutu ati damai baupane, im deiki di Allah dirine puto di Saulus damai menmena dokotepupa, er nong dana-dana tara yuma melangdan pepupa, Saulus tu deiki loktadepu.

4 Saulus tu deiki loktadepmaupane, nimi upu utopu upu di pepu. “Saulus Sauluso. Warya tep ikin keca ne nong deiki derinurum do?” pepupa, gekepu. 5 Gekepudi Saulusdi pepu. “Naio, kan ware ngebodi pepnerem do?” pepra asipetepu. Asipetepupa, Yesus im deiki di, nimi upu utopu upu deiki di aupu ton pepu. “Kandi ikin keca ne tep derinememnyada, Yesus ne tepa,” pepu. 6 Upepudi aupu ton pepu. “Tekroyo. Tekromemdi, Damsyik mutu ati dam neitamai bemempa, kan kunkamrum keca pepkengepa gekepkamrume,” Yesusdi Saulus tep pepu.

7 Upepupa, Saulus er cap kikiman sun yuma yakanmai nengda, apepmau upu sun gekepi dinin, sun nimi nong men epmaiya tep, lukdaidi pio dimpepra tekmai. 8 Tekmaipane, Saulus tekroudi asuru laprou dinin, akeca-keca yuma men epmanto kupu. Men epmanto kupka tep, er cap kikiman yakanmai neng, sun anengdi er buru talepra Damsyik mutu ati damai dubei. 9 Dubeipa, Saulus erda weneri tumi neitamaida, asuru pun ngebo utopu kunmaudi, ataru yuma jen cap, me cap, men jenmau.

10 Uda, Damsyik mutu neitamai tenpu ngebo er sida Ananias, Yesus tep teka tenepka tep, Yesus er kuramu keca yuma doprapudi, piriprap kael keamu. Ananias tup bukmaupane, nun nai Yesusdi ken deiki utopu di yana Ananias tep peipu. “Ananiaso,” pepupa. Ananias gekepudi, ‘Gekepkaman ja’ tenen, tamupra, “Jo naio,” pepu. 11 Upepupa, nun nai Yesusdi pepu. “Sun bisi sida, Kwiri Bisai si deipra perum bisida, abisi dam Yudas dopu ati dam bememdi, Tarsus mutu ngebo, er sida Saulus tep, ‘Saulus yarume,’ perbenkurume. Ukutaruda, Saulusdi ne moronmanere. 12 Ada, ken utopu deiki di, er dinmaudi tenpu ngebo er si Ananias yanmaudi buru talepmaupa, ‘Asuru laipkuner’ tenen, epmaue. Angeda Ananias kandi kapul men kupmarum dinin, ange kupkamruma tep, pepkene,” pepu.

13 Yesusdi upepupa, Ananiasdi tamupra pepu. “Kan tep teka teneramkei neng, Yerusalem mutu kunung neng tep, angebodi ikin keca weik deriramu. Tonda, er kuramu keca yuma sundi pepipa gekepsi. 14 Tonda, men taruda, Allah karena deiyo neng tep surat moropupa, sundi upu peipipa, angebodi kan si pepra moronung neng yumada, ‘Wenemna ati dongopkamne’ tenen, amutu yau,” pepu.

15 Ananiasdi aupu yuma pepu dinin, nun deiyo ngebo Yesusdi tamupra pepu. “Gume. Kan berume. Angeboda nedi wepra deipsi. Atep, ne si dopra, yuk-yuk mutu kunge nesala, Yahudi yala gum nesala cap, sun deiyo neng cap, ton Israel nesala cap tep, peterem benkamra deiki di, ‘Ne pel donkamre’ tenen, nedi angebo wepra deipsi. 16 Ne si dopra peteremberepa, amenda yuk nengdi ne si tep tulum kuprepa, kange mun keca angebo tep karepkamemenga tep, nedi benepkamemene. Erdi kael kepkamre ja,” pepu.

17 Yesusdi upepupa, Ananias gekepudi, Saulus er ati kuramngai bena weku. Akati wekudi, er buru tang Saulus nong deiki deipudi pepu. “Ne kabo Sauluso, amutu yankamuma tep, bisi yakamumpa belepku ngeboda, nun nai bo Yesus. Erdi, ‘Neda kan asuru laipkamker’ tenen, tonda, Allah Lek Sambala dokoteprepa, ‘Dipruai wekrepa dekpepkamker’ tenen, ne dopra kan damai konum dokotepmanere,” pepu. 18 Ananiasdi aupu pepra dimpepupane, adipapu mekina kalkal bol utopu keca, Saulus er asuru du deiki di sakupa, Saulus er asuru telep kupupa, akeca-keca yuma ka di ton epu. Epudi bukroupa, Ananiasdi Saulus me dongopu. 19 Me dongopupa, Saulus men di puto boun kwamu dinin, jen jepupa puto kupu. Puto konum kupupa, ue tumi wenerito, dumbarito neitamaida, Saulus cap, sun Damsyik mutu teka tenerami nesala cap kikiman kurami.

Saulusdi Damsyik mutu cap, Yerusalem mutu cap neitamai kuramu keca tep, pepu upu

20 Saulus er me dongopu tarupu gonga kepra, sun Israel nesala Allah upu geken ati yuk-yuk wekra embaramudi, “Yesus erda, Allah mi tek sisi kurure,” pepra peterep embaramu. 21 Peteremamupa, sun gekerami nengdi lukdaidi asipetepi. “Yerusalem kunge nengda, Yesus si pepra mororami neng tep, ikin keca deriramu ngeboda angebo be? Angeboda yuk ngebo do? Tonda, Yesus teka tenenung neng ateng kouprap, Allah karena deiyo neng kungai dubenkamre ngeboda, angebo do? Yuk ngebo do?” pepra upu talepdai.

22 Dinino, Saulus puto weik ton cap kupupa, “Ne kayapu, ‘Nesala yuma lyepredi talenkamre’ tenen, Allahdi wepra deiamu ngeboda, ada Yesus er pua,” pepra peteremau. Tonda, ‘Tek sisi tenepkameng’ tenen, kwar dangna gum, puto di, “Deiyo ake,” pepra peteremupa, Damsyik mutu akurami Israel neng, er upu gekepidi, er upu bisina tep, ‘Ware upu tamupra peptepe do?’ tenepidi, sun kange wang-wang pepupa, teniptopi.

23 Uda tumi-tumi yuma weik kuramyanen, er tupa peteremamu. Aneitamaida, yuk Yahudi deiyo nengdi, ‘Saulus popkamepe,’ tenepidi upu sisingami. 24 Upu sisingami dinin, yuk nengdi pepipa, Saulusdi sun sisingami upu gekepu. Sun anengdi, ‘Saulus popkamepe’ tenen, keteng komuni pe, lukunda pe yuma, sun ati arum domyai dana-dana tara wiami gel beilya bisi buplan dam, tenpu potokeiamyai bukamidi, ‘Angebo tamopkup’ tenen, kalengami. 25 Kalengami dinin, Saulus er upu gekerami nengdi, tenpu lukunda neitamai di, tapu wipra, alen utopu koupra dorami keca, er si keranjang di, Saulus er nong kipdongoprapidi, tapu gerekdongopra, lyom gel beilya bon kamngai di, bura tara deipdongopra, nemari tapnenep-nenep yakanmaiyanen, nemari tapnenep-nenep yakanmaiyanen, tuai dokotepi.

26 Saulus tuai dokotepipa, Yerusalem mutu beu. Beuopda, Yesus teka tenerami neng tep utenepu. ‘E, ne cap, Yesus tep teka tenepidi, Yesus kuramu keca piripra kael kemnung neng cap, ne cap aneng cap kikiman dukdongopra kunkamepe,’ tenepudi kunupetepu. Kunupetepu dinin, sun anengdi, ‘Angeboda Yesus tep, ‘Teka tenepnedi, Yesus er kuramu keca kuptene’ tenen, piripra kael kemrur ngebo, tek sisi gume,’ tenepidi, Saulus tep kware kupi. 27 Kware kupi dipunen, Barnabasdi, Yesus erdi wepra deipu neng, 11 nengda, Saulus dopra sun damai dubeu. Dubeudi, Saulus kupmau kecada lap pepu. Saulus er Damsyik mutu yakana tep, bisi neitamai yakaramu taruda, Yesus epu upu cap, tonda, Yesusdi Saulus tep pepu upu cap, tonda, Saulusdi Damsyik mutu neitamai Yesus si deiki kwar dangna gum, puto di peterepu upu cap ayumada, Barnabasdi aneng tep lap pepu.

28 Ayuma lap pepka tep, Saulus cap, sun aneng cap kikiman kuramidi, Saulusdi Yerusalem mutu neitamai tali kange doupra embaramudi, Yesus si deiki kwar dangna gum, puto di Allah upu peterepra embaramu. 29 Peterepra embaramudi, Yunani upu perami dinin, Yahudi neng tep, ‘Yesus tep teka tenenkameng’ tenen, upu pepupa, er cap, sun aneng weik cap, upu pedaramidi deremdarami. Upu taledarami dinin, anengdi Saulus tep popterepi. 30 Popterepipa, er Saulus cap, yuk neng cap, ada sun cap kikiman Yesus teka tenepidi, weite-du utopu kurami nengdi, Saulus dopra, Kaisarea mutu dubei. Dubeidi, ‘Tarsus mutu dokotepkamep,’ tenepidi dokotepi.

31 Ukupidi, amenda taru, sun Yudea tara cap, Galilea tara cap, Samaria tara cap, Yesus teka tenepra kurami nengda, sun teka tenena gum nengdi, ikin keca men deriramya tep, tali kange doupra kurami. Ataruda, Allah er Lek Sambaladi, Yesus teka tenerami neng yuma tep, sun dipru puto keipudi, sun melimna tep telep upu peramudi kwa diramu. Yesus tep teka tenenge nesala yumada, ‘Uo, nun nai Allah ila mambul ngebo kurure’ tenen, er tep gispal dopra er si erepra kuramidi, ‘Mali kupmepepa wenepserur’ tenen, pio kange moupra kuramidi, Allah tep kware kuramu.

Eneas cap, Dorkas cap tep, pepu upu

32 Peterusdi amutu-mutu yuma embaramnganen, Yesus teka tenepra Lida mutu kurami neng damai uruna tep beu. 33 Lida mutu beuopda, tenpu ngebo, er sida Eneas, keteng tamun ban bari deiki di er nong yuma meiyal semu ngebo kuramnga cadi, men benmanto kuramu. Angebo damai Peterus beudi epu. 34 Epudi Peterusdi Eneas tep pepu. “Eneaso, ukutaru Yesusdi kan nong dumsisikra deipkere. Atep tekroyo. Tekmemdi kan ason gwinikropo,” pepu. Upepupa, Eneas gekepudi adipapu tekrou. 35 Ukupupa, Lida mutu cap, Saron mutu cap, kuramidi Eneas kwetepunge diramya tep, sun dirami nengdi, sun mali kurami keca tapidi, nun nai Yesus tep teka tenepi.

36 Uda Yope mutu, tenpu ner, er sida Dorkas, Yesus tep teka tenepudi, Yesus er kuramu keca piripra kael keamu ner kuramu. Er kuramu taru yumada, pio tupa-tupa telep pel doramudi, kankan kunge nesala weik melimamu. 37 Peterusdi Eneas dumsisikra deipu taruda, aner pu weik jepupa, depu. Depupa, er damai kurami nengdi, er nong me kuprapidi, er nong dopra, alau ati deipi.

38 Lida mutuda, Yope mutu damai kwamnga tep, Yope mutu teka tenepra kurami nengda, yuk nengdi, “Peterusda Lida mutu kunmare,” pepipa, Yope mutu neng gekepidi, butene neng wepra, Lida mutu dokotepi. Ada, abutene nengdi Peterus bena moroprengopda, ‘Kikiman tamupra yankamenge’ tenen, dokotepi. Dokotepipa, bereidi, “Peterus kan menmena yaiyo,” pepra moropreipa, Peterus cap kai benmarei neng cap, tamupra Yope mutu yai.

39 Anengdi Peterus dopra yaryopda, Dorkas nong deipmai ati, alau ati debei. Alau ati neitamai, Peterus ben tekupa, solu nerapu weika di er amnyo tara yuma tekra ongomgenem pepi. Ongomgenem pepidi, Peterus tep, “Aopkalda, Dorkasdi er gam kuramu taru, nun kikiman kuramupu taru di wiamseu opkale adio,” pepra engenmaidi, lap penmai. 40 Upepra lap penmaipa, Peterusdi akati di apenmai nerapu bura tara dokotepkopda, ason deiki gutam dipdongopudi, Allah moropu. Moropkopda, adepmau ner deipmaiyai tamupra dipterepudi pepu. “Tapita tekroyo,” pepu. Upepupa, aner asuru laprou. Aner asuru laproudi, Peterus dipterepu dingeda, bukrou.

41 Bukroupa, Peterusdi aner buru talepra tekra deipudi, men di teka tenepi neng cap, asolu nerapu cap, kongpepupa, yaiopda, “Konuma gam bukra tekmara dipterepso,” pepu. 42 Agam bukra deipunge, ton nengdi lap pepipa, Yope mutu kurami nesala yuma gekepidi, nesala weike ton cap, nun nai bo Yesus tep teka tenepi. 43 Uda Peterusda, Yope mutu kuramu ngebo, er sida, Simon, domba bol ketenepra deipmarepane, kalapyopda, abol di dopra opkal wiramu ngebo, er ati metekanun pio kikiman kuramrei.