Rasul 4

Yuk nengdi Peterus cap, Yohanes cap dopra, Sandeheren neng damai dubeipa, sundi peprei upu

Peterus cap, Yohanes cap, yan kwaneamu ngebo kwetepreidi, aweka dinmai neng tup peterenmarei taruda, Yahudi yala neng Allah karena tep deiyo neng cap, tonda, Yahudi yala neng, sun Allah tep karerbarami ati kalekami neng, sun deiyo ngebo cap, uda, sun Saduki neng tenpu-tenpu cap, aneng yumadi Peterus cap, Yohanes cap, peterenmareiai yai. 2 Yaipa, abutene nengdi, “Nun kaele. Yesus depupa, Allahdi gam bukeipka tep, teka tenena nesala depmengyopda, amenda taru Allahdi gam bukra deipkamre,” pepra peteremareipa, sun Saduki yala neng gekepyopda, sun dipruai yu kupudi, ‘Aupuda nun song’ tenen, sun kange yuma dabal kupu. 3 Dabal kupupa, Peterus cap, Yohanes cap talepi. Talepi taruda, konum ipka tep, aneng dopra wenemna ati pumbonpu dongopipa, mapmarei.

4 Sun Saduki nengdi teka men tenepi dinino, abutene nengdi peteremarei upu gekenmai nengda, denge weik teka tenepidi, Yesus konum teka tenerami neng cap, tapakrapipa, sun gungda denge weik lima ribu neng (5.000) kupi. 5 Aneng sun mapmaiya bereku pangeda, Yahudi yala neng, sun deiyo neng cap, sun du neng, wisi neng cap, Allahdi, ‘Ukunkamrume, ange men kunkamrume,’ pepra pediramu upu, mem upu peteremna deiyo neng cap, ake Yerusalem mutupu upu talepkoi atep, tenpu atipu bulupra weki.

6 Uda, Yahudi yala neng, sun Allah tep karena deiyo neng, aneng sun ila deiyo ngeboda er si Hanas cap, er yala tara neng cap, tonda Kayapas cap, Yohanes cap, Aleksander cap, sun yuma wekmai. 7 Wekmaidi, sundi pepipa, yuk nengdi Peterus cap, Yohanes cap, wenemna ati pumbon di dopra yana deipipa, gonga kepra upu asipterepi. “Sunda ayan kwaneamu ngebo kwetepra deipmarerum ngeda, ware keca si deiki di do? Warya puto deiki di angebo kwetepra deipmarerum do?” pepra asipterepi. 8 Asipterepipa, Peterusdi Allah er Lek Sambala men di wekamnga deiki di, ataru er dipru dinikra taleamupa aupu pepu.

“Telepe ne kayapu. Nun Yahudi yala neng nun nai yapu cap, nun upu bongdina tep wisi neng cap, sun tep telepe pepsene. Sun gekepneso. 9 Nundi ayan kwaneamu ngebo bicau kupseupa, kweteipmanemnge tep, kongpepmaserumdi nun wenepkuserum teptoda, tonda, ‘Warya deiki di angebo kweteipmarurum do?’ pepra, asipterepkuserum teptoda, sunda nun Yahudi yala deiyo neng cap, yuk Israel nesala yuma cap, ne pepkusen upu gekeprumudi, kael kepkurume.

10 Nasaret ngebo Yesus Kristus, sundi sengdin co deiki poprumpa, depmau dinin, Allahdi tamupra gam bukra deipu ngeboda, er si puto deiki dipu yo kwaneamu dinin, atekmar ngebo kweteipmarpa, pio telep kupra kunmarpa, sun dinmarume. 11 Allah er upu lap peramu ngebo Dauddi, aYesus tep peiamu domon upu ake.

‘Sun gel ati dona deiyo nesaladi taprum gelpuda Ukutaruda, mambul gel, pio ila telepnge konum kupmare.’ (Mazmur 118:22)

12 Ware nengdi do yuma, nun men lyepsetenge. Yesus er dipu lyepsetue. Allahdi nimi si ban-ban yuma kareamseunge yumada, yuk si deiki di tenpu ngebo pe ton men lyepsetue. Yesus er si puto deiki dipu lyepsetue. Yesus er dipu lyemserure.” Peterusdi pepu.

13 Peterusdi upenmaupa, agekenmai nengdi, Peterus cap, Yohanes cap, sun kwar dangna gum di, puto dipu kunmareipa epi dingeda, ‘Anengda sekolah deiki di men kael keamrei neng, sun tali neng kurunge,’ tenepra lukdai dinin, ‘E ada Yesus cap kikiman kuramreiya di, puto di penmaserenge,’ tenepi. 14 Sun Yahudi deiyo nengdi, ‘Yo kwaneamu ngebo kwetepmare ngeda, nun songe,’ tenepi. Utenepi dinin, yo kwaneamupa konum kwetepmarei ngeboda, meneng damai tekmaupa, konum teleppu kupmaupa dinmaiya tep, upu ton cap men pepmanto kupi. 15 Ukupidi, Peterus cap, Yohanes cap tep, “Nun Sandeheren neng ati wekmap ati pum di bura tara bereso,” pepipa, bura tara konum berei pangeda, awekmai nengdi upu talepi.

16 Upu talepdaidi aupu pepi. “Abutene nengda, ware kupkamep do? Uda sun butene nengdi, pio nun men dinup keca, nimi men kupmanto pel dopreipa, nun Yerusalem mutu kupe neng yuma konum kael kepmapa tep, ‘Angeda tek sisi men kurure,’ men peptepe. 17 Dinino, sundi Yesus tep upu tupa peprengepa, yuk neng gekepmengedi, ‘Kael kepkamnunga’ tenen, sengdongona tep nengeda, abutene neng tep upepkupe. ‘Yesus er si deiki di yuk neng gekenai ton cap men peterepkamrume,’ pepkupe,” pepi.

18 Upepidi, Peterus cap, Yohanes cap, bura tara benmarei atep, aneng kongpepipa, ati pum konum yarei pangeda, aupu pepi. “Yesus si deiki cap, er puto deiki capdi, yuk neng gekenai ton cap pio men peteremkamrume,” pepra wenepi. 19 Upepra wenepi dinino, Peterus cap, Yohanes cap, sundi tamupra peprei. “Sun pedipapu tenepra wepkurume. Allah er kange di pio telep tenesere ngeda, sun deiyo nengdi penmaserum upu gekepra dombenkamep do? Allah erdi pesere upu gekepra dombenkamep do? Allahdi persere upu tapra, sundi pepmaserum ngepu gekepra kunkamep do? Atep, ‘Telep kunada dan nge do?’ tenen, sun pedipapu tenepkurume. 20 Ada, nun epmupunge cap, gekepmupunge cap, peteremneme ngeda, men tapteneme. Ada men kupmanto. Pio peteremkamnem ja.” Peterus cap, Yohanes capdi sun Sandeheren deiyo neng tep peprei.

21 Uda, sundi nimi men kupmanto keca pel dopmareipa, Allahdi yo kwaneamupa kweteipu ngeboda, keteng tamun denge weik 40 tahun konum wisi deiamnga tep, amutu kurami neng yumadi Allah tep, “Allah kanda pio telepe,” pepra er si eremaiya tep, aSandeheren deiyo nengdi, ‘Abutene nengda, nundi ware kupra popra weneptepe do?’ tenen, tenimtonapu kunmai. 22 Ukunmaidi, Sandeheren wekmai nengdi, ‘Peteremna tapkamreng,’ tenepidi, “Tupa petereprumyopda, nundi popkamsepe,” pepra, upu weik ton cap wenepi dingeda, loptapi.

Yesus teka tenerami nengdi Allah moropi upu

23 Konum loptapi pangeda, Peterus cap, Yohanes cap, sun teka tenepra kikiman kurami neng damai tamupra berei dingeda, Yahudi yala neng sun upu bongdina deiyo neng cap, Allah karena ati ila deiyo neng capdi, wenepmai upu yuma lap peprei. 24 Lap pepreipa, aneng gekepi dingeda, sun yumadi kikimanpu Allah moronmai. Sun moronmai upuda ake.

25 “Nun nai Allah, kandi peipmumpa, kan Lek Sambaladi aupu dopra kan meliamku ngebo nun apke Daud, er dipruai peipmumpa, Dauddi aupu pepra sekamseu.

Yahudi yala gum nesala ban-ban yumadi, yu kupmarpa, ‘Ukupkamep’ tenen, upu tali pu sisingmangada, ware keca deiyo tep do? 26 Ban-ban yuma ila nimi deiyo neng, Raja neng cap, nesala talena deiyo neng capdi, balila kupra erepra tekmangdi, ‘Nun nai Allah cap, erdi nesala ban-ban yuma lyepredi talenkamre’ tenen, wepra deiamu ngebo, ada Mesias ngebo cap tep, ‘Popbisipkamep’ tenen, bulupra wekmange.” (Mazmur 2:1-2)

Upepra moronmai. Dauddi sekeiamu upu dopra, Allah moronmai neng pepya deiki di aupu ton moronmai.

27 “Uda, Dauddi peiamseutopu, tek sisi Herodes cap, Pontius Pilatus cap, Yahudi yala gum nesala pe, Yahudi yala nesala pape, aneng cap, Yerusalem mutu bulupra wekidi, ‘Popbisipkamep’ tenen, kan upupu gekeprap, kan pelpu melipra mambul pel dorur ngebo Yesus tep, upu sisingmai. Angebo Yesusda, kandi wepra deamumdi, ‘Nimi lyepkamre’ tenen, ereamum ngebo tep, upu sisingmai. 28 Menop taru, kan puto di, ‘Ukupkamenge,’ konum teneamumtopu, angepu Yesus tep konum kupi. 29 Dinino, ukutaruda, aneng dipu nun tep, ‘Popkamsepe,’ penmasengada, kan gekememdi dinkamrume. Kan pelpu melipra donup nengda, kandi melimsemempa, nun kwar dangna gum, ila puto di, ‘Kan upu tali lupra peteremkamepe’ tenen, moropkepe, nun nai Allah.

30 Kan puto deiki di nimi kwetena cap, nimi men kupmanto pel cap, uda, mambul pel dopmepepa, yuk nesala epmengedi, ‘Uo, tek sisi Allah er dipu apel donmasere,’ tenen, tenepmanto pel cap, ‘Kandi donkamseruma’ tenen, moropkepe. Ada, kan pelpu dopra, kan Melimna Ngebo Yesus, er si deiki dipu, ‘Apel donkamserem’ tenen, moropkepe, nun nai Allah.”

Aupu yumada, Yohanes cap, Peterus cap, Yesus tep teka tenerami nesala cap, upepra Allah tep moropi.

31 Konum moropi pangeda, sun bulupra wekmai ati yuma ila di long-long pepupa, Allah er Lek Sambala sun dipruai yuma wekudi, dinikra taleamnga deiki di, sun yumadi kwar dangna gum, ila puto di gonga kepmaidi, Allah er upu peteremami.

Yesus teka tenerami neng, sun taleami keca karerdarami upu

32 Amutu teka tenepi nengda, sun dipru putaramunge cap, sun kange teneraminge cap, kikiman amsepu kuramya tep, sun dipru dukdongoprap kurami. Tenpu ngebo pe ton, er taleamne keca tep, ‘Ada pio ne mawa,’ men tenerami. Ange pio men tenerami dinin, sun taleami keca yuma melipra tali karedarami. 33 Yesus er wepra deiamu nengdi, Yesus er gam bukupa epya tep, puto di nun nai Yesus er gam buku upu pio telep kupra lap pepra peterep embarami. Tonda, apeteremami neng pe, tali yuk neng, Yesus tep teka tenerami neng peda, Allahdi sun tep ila di melimamu.

34 Ataru ton, ataru ton sun ati cap, wa tu cap taleami nengdi, yuk neng tep akeca kunupidi dororami co boda, Yesus wepra deiamu neng tep kareryakarami. Ada, ‘Anengdi akeca bokra putaramne nesala karepkameng’ tenen, kareryakarami. 35 Ukuramya tep, ateka tenerami neng, sun kan-kan di akeca-keca yuma putaramne nesala tenpu pe ton men putaramu. Sun yumadi Yesus wepra deiamu neng tep, aco bo kareryakaramipa, sundi Yesus teka tenepi neng putaramne keca tep, sun putaramutopu bokra karerdarami.

36 Awa tu kunupra dopropu co boda, Yesus wepra deiamu neng sun damai yana karepu. AYusupda, Yesus erdi wepra deiamu nengdi, er si tep ton Barnabas perami. Sun upu deiki di nimi si ‘Barnabas’ peraminge deiyoda, ada, Nimi Dipru Kwa Dimna Ngebo tep asi perami. 37 Yuk neng ton ukuramitopu, Lewi yala ngebo tenpu, Siprus mutu, ada laut mokon dana-dana tara sekdongomu mutu deiami ngeboda, er si Yusup, erdi ton wa tu taleamnga kunupu.