Lukas 2

Mariadi Yesus deipu upu

Ataruda, Roma mutu neitamai kurami nesala yuma taleamnga ila deiyo ngebo, Roma mutu ngebo Kaisar Agustusdi, “Nun Roma mutu nengdi talenup nesala yuma, ‘Denge weik ware kuprap kunung do?’ tenen, si sekamepe,” pepra deipu. 2 Animi si sengna upu menmena pepra deipu taruda, ada Siria mutu taleamu ngebo, gubenur Kirenius tupa kuramu taru di peipu. 3 “Sun si sengna tep, sun pe mutu sisapu tamupra berume,” pepya tep, amutu-mutu kurami nesala yuma, sun deiami mutupu tamupra bei. 4 Anesala yuma beitopu, Yusup peda, Daud yala ngebo cadi, Galilea tara kuramu mutu Nasaret mutu di tapra, Yudea tara neitamai Daud yala deiyoi tep, Betlehem mutu beu.

5 Yusupda, ‘Nun si sekamseng’ tenen, er mun peramu ner Maria cap, men dopdaramrei dipapu, mundu douamupane, Betlehem mutu berei. 6 Betlehem mutu bereidi kunmarei taruda, Maria mi deiyo gonga kepra jenmau. 7 Mi deiyo jenmauanen, Mariadi sal mi menmena deipu. Betlehem mutu nimi bo neng marami ati go men kupudi, dekpepupa, Maria bura tara ati, er mi deipu dingeda, domba bisam jen keca tep, yakra deiamidi kareramyai deiki deipu. Tonda, lyom opkal gweleprapudi, ange di ami getepra deipu.

Malaikatdi domba pein nesala tep, kai peryai upu

8 Mariadi Yesus deipu tumi lukundapu, Yesus deipu ati yambul karenai di domba pein neng sun domba katuai mutu peinmai. 9 Sun domba peinmaipane, Allah er im deiki pel don ngebo, malaikat dokotepupa, dato-dato di sun damai damai tengyaupa, Allah er dirine weike kupupa, sun kware weike kupu. 10 Sun kware weike kupu dinin, amalaikatdi upepu.

“Sun kwar dangna gume. Nedi sun tep kai telep upu duyanmasenada, nesala ban-ban yuma gekepmengedi, ila kange deipkamenge. 11 Ada, Daud er mutu Betlehem neitamai di, Nimi yuma Lyemne Deiyo Ngebo konum deipmasere. Amida, ila nimi deiyo ngebo kunkamre. Ada, Allahdi nesala yuma lyepredi, sun dipru talenkamre taru deiyo ngeboda, ‘Ami kupkamre’ tenen, wepra deipu mi ake. Amida, Kristus kurure. 12 Betlehem mutu bemum dingeda, ‘Ange mida ace’ tenen, peten kemna keca eprumudi, kael kepkuruma tep, lyom opkal getepra domba jen keca deiki deipmarya epkurume. ‘Apepmaseu mida, aca,’ tenepkurume,” pepu.

13 Aupu konum pepu pangeda, Allah er im deiki pel don neng weika di menmena yai. Amalaikat denge weik cap, arup yanmau malaikat cap, Allah si eremaidi aupu penmai. 14 “Allah ila ngebo im deiki kure ngeboda, pio telep kurure. Ware nesala do yuma, Allahdi kange derinkamre nesala yumada, telep kudirepa, mambul kange douna gum di, kanam kange doupra, pio teleppu kunkamenge,” pepi. 15 Upepidi, amalaikat yuma tamupra im deiki bei pangeda, adomba pein nengdi upepdai. “Allahdi lap pepmaser keca epkupa tep, Betlehem mutu dirbenkupe,” pepi.

16 Upepi dingeda, adipapu Betlehem mutu beidi, Maria cap, Yusup cap, ami lyom opkal getepra domba bisam jen derinai deiki deipmareiyaipu epi. 17 Konum epi dingeda, adomba bisam pein nengdi, malaikatdi ami tep pepmai upuda, amutu kurami nesala gekena tep, lap pepembanmai. Upenmaipa nesala weike gekenmai. 18 Aupu gekenmai nesala yumada, adomba pein neng pepmai upu tep, uo tenen, lolomai. 19 Sun lolomai dinin, Mariadi er dipru neitamai dipu, pio tenenapu kuramu. 20 Sun domba pein nengda, Malaikatdi penmaipa, gekepmainge utopu kupupa epmaiya tep, sun pe mutu tamupra banmai taruda, Allah si erepra gispal dopbanmai.

Maria cap, Yusup capdi, Allah karena tep, Yesus dopra Allah karerbarami ati duberei upu

21 Uda, Allahdi Yahudi yala nesala tep, “Ukunkamrume,” pediramutopu, Maria cap, Yusup cap, Yesus cap, ue ban bari tumi konum mapi dingeda, Yesus er den bam bol deiki tarange sengne taru konum kupka cadi, Maria kapul men mundu douamu taru malaikatdi, “Kan mi deipmemnyopda, er sida Yesus pepkamrume,” peiamutopu, ami er si Yesus si peprei. 22 Musa sekeiamu upu neitamaida, ‘Sun menmena sal nyapu deipmum dingeda, ukupra tumi konum kupyopda, sun telep kemdina tep, Allah tep karen keca karenkamrume’ peiamnga cadi, 23 Yesus er si peprei dingeda, Musadi, ‘Nyapu ukupu deipmum taruda, Allah karena ati pum wengna meme,’ sekamudi peiamutopu, Maria er pe yuk, er ati pum dakuramnganen, ue denge dumbari, 40 tumi konum kupu pangeda, ‘Nun mi Yesus dopra Allah tep karepkamnem’ tenen, Yesus dopra Yerusalem mutu duberei. 24 Tonda, Musa sekamutopu, “Yal ma utopu ma, agum dingeda, be ma utopu ma popra, Allah tep karenkamrume,” peiamutopu, ‘Karepkamnem’ tenen, Yerusalem mutu berei.

25 Sun Yerusalem mutu berei taruda, tenpu ngebo er sida Simeon, Allah pio talepra dumsisipu kuramu ngebo akunmau. Simeonda, ‘Allah lyepseredi, nun dipru cap, nun Israel tara yuma cap, pio talenkamser taruda, dan taru yankamre do, ukutaru do?’ tenen, pio ketenepra diramu. Ukuramnga cadi, Allah er Lek Sambaladi Simeon tep, er puto weike kareamupa kuramu. 26 Pumun taru Allah er Lek Sambaladi, Simeon tep peiamu. “Kan kapul men depmamem taru, ‘Nesala yuma lyepredi, sun dipru talenkamre’ tenen, Allahdi dokotepkamre ngebo Kristusda, kan asuru di epkamrume,” peiamu. 27 Upeiamnga cadi, Allah er Lek Sambaladi, Simeon er dipru neitamai peipupa, Allah tep karerbaramidi er si eremami ati damai beu. Beudi dakunmaupane, Maria cap, Yusup cap, Allahdi, ‘Ukunkamrume,’ pepra deipupa, ‘Musadi sekeiamseutopu, ange kupkunem’ tenen, Allah tep karerbarami ati, Allah er si eremna ati damai wekreipa, Simeon akunmaua di epu.

28 Simeon epu dingeda, Yesus dopra iripudi, Allah er si erepra, aupu pepu. 29 “Ne nai Allah, kandi akeca-keca talepra kurumdi, kan teneamumtopu akeca-keca yuma kurume. Kandi peiamnemumtopu, ne asuru di ukutaru ami konum epmana tep, ‘Simeon dadeptue,’ tenepnemempa, telep kange doupra dadepkamne. 30-31 Angeda mesum tep men pepne. Deiyoda, nimi lyemna tep, Nimi Lyemna Deiyo Ngebo dokotepmaserem ngeboda, katuai yarepa nimi ban-ban yuma dinkamenge. Tonda, ne peda ne asuru di konum epmana cadi, ukutaruda ne dena telepe pua. 32 Weica dirin kuprepa, nesala telep kupra diramengtopu, alyemna ngeboda, Yahudi yala gum nesala gekena tep, Allah er tek sisi upu katuai lap peramrepa, gekepmengedi, teka tenenkamenge. Gekepmengepa, sun dipruaida dirine kuprepa, kan tep moupra tenenkamenge. Tonda, yuk mutu nesala yumadi, ‘Uo, Nimi Lyemna Deiyo Ngebo Allahdi Israel nesala neitamai di weiamnga tep, Allah er nyapu Israel nesalada, pio mambul nesala kununge,’ tenenkamsenge.” Aupuda, Simeondi Maria cap, Yusup cap, sun mi Yesus kunkamu keca tep pepu.

33 Simeondi upepu pangeda, Maria cap, Yusup cap, gekepreidi, ‘Uo apepmare ngeda, pio mambule,’ teneprei. 34 Simeondi sun butene neng tep, “Allah telep kudinkamsere,” pepra deipudi, Maria er yuk tep aupu ton cap pepu. “Allahdi ami wepra deipka deiyoda, er pel doramrepane, Israel nesala kan-kan di, ton neng er pere tapmengopda, Allahdi anesala dopra amutara deipkamre. Ton neng, teka tenen, er pere gekepra dopropmenge nesalada, Allahdi anesala lyepra ereipkamre. Ami Yesus pel doramya deiki di, Allahdi nesala weika di, lyepredi dipru talenkamser keca jenek penkamsere. Upesere pangeda, nesala weika di er tep, mali upu penkamemenge.

35 Amida, er akunkamre keca yuma deiki di, nesala dipru neitamai, ‘Allah tep nun songe,’ inipra teneramenge keca yuma, katuai kemdinkamre. Ton Maria kanda, takke keca lukserepa, pu weik jeramseretopu, kan mi tep mali kunkameng keca deiki di, kan kange dipru pio sukunkamkere.” Simeondi pepu.

36-37 Atarupuda, tenpu pio wisi ner er sida, Hana kuramu. Hanada, Asyer yala ngebo, Fanuel er ner mi dinin, nimi konum domudi, keteng tamun yoneitam bari kikiman kuramreiyanen, er nenge depu pangeda, solupu kuramudi, Allahdi er tep peamu upu lap pena ner nabi ner kuramu. Ukuramu ngeda, keteng komuni pe, lukunda pe, pio tamna gum di, Allah moronapu kuramu. Ton taruda, Allah er gispal dona tep, jen jena gum di, si tepra, Allah karerbarami ati kuramudi, Allah moropra kuramu. Ukupra dakuramnganen, keteng tamun denge 84 tahun wisi deiamudi kuramu. 38 Ukuramnga cadi, Maria cap, Yusup cap, akati pumbon kunmarei taruda, Hana sun damai yaudi, Allah tep, “Telepe,” penmaudi, Yesus kupkamu keca tep lap pepu. Tonda, ‘Allahdi nun Yerusalem mutu kunup nesala lyepsetue’ tenen, dirami neng, amutu kunmai neng sun gekena tep, Yesusdi amenda taru kupkamu keca tep, upu ton lap pepu.

39 Maria cap, Yusup cap, Allahdi, ‘Ukunkamrume,’ peipupa, Musadi sekeiamu upu neitamai peiamutopu, konum kuprei dingeda, Yerusalem mutu tapra, sun pe mutu, Galilea tara neitamai, akati arum si Nasaret mutu tamupra berei taruda, Yesus dopra berei. 40 Bereidi, sun dakuramyanen, Allahdi Yesus tep, kange deriramudi melimamupa, ila di nepbaramudi er nong puto cap, Allah kun keca kael kemna deiyo keca cap, er kange dipru neitamai weik kupbaramu.

Allah karerbarami ati, Yesus er yuk kunmaua tep, pepu upu

41 Uda, Yesus er nin Maria cap, er nai Yusup cap, keteng tamun, keteng tamun yuma Kaplemna Kailya Kalemna tep, Yerusalem mutu baramrei. 42 Aketeng tamun yuma baramreitopu, Yesus nepbaramnganen, keteng tamun 12 tahun konum kupupa, Kaplemna Kailya Kalemna tep, Yerusalem mutu bei. 43 Ange konum kupi pangeda, Maria cap, Yusup cap, ‘Nun mutu tamupra benkup’ tenen, sun berei dinin, Yesus Yerusalem mutu apu kunmauada, sun men kael kepreidi, ‘Kikiman bepa’ tenen, tali mankau kange doupra berei.

44 Tali mankau kange doupra bisi banmareipane, tenpu tumi konum kupu pangeda, bisi neitamai tup banmai taru di, ‘Nun kayapu neng cap, nun yala neng cap, Yesus cap dakunmang do?’ tenepreidi, ‘Yesus dan kunmar do?’ tenen, sun kayapu neng damai dirberei. 45 Dirberei dinin, Yesus aca men kunmaupa, men antaprei dingeda, adipapu tamupra, ‘Yesus dan cei kunmar do?’ tenen, Yerusalem mutu yanmareiyaipu tamupra erberei.

46 Yerusalem mutu erberei dingeda, ue butene tumi ton cap yumada, Yesus er teppu enmareianen, Allah tep karerbaramidi, er si eremami atida, Yesus akunmaupa eprei. Yesusda, sun Allah upu peteremna deiyo neng kan-kan bukmaudi, sun penmai upuda, er gekenmaudi asimterenmau. 47 Sun peteremna deiyo nengdi er tep asimaipane, erdi tamupra sun tep penmau upu yuma gekenmai neng yumada, ‘Uo, ware kuprap di ami akeca yuma weika di kael keamtudi telep kupra pepsetu do? Amida, pio kael mi,’ tenepra lolomai. 48 Er nai cap, er nin cap, epreidi lukdana yupropreidi, Mariadi Yesus tep aupu pepu. “Amio, kanda warya tep, nun tep ukupsemum do? Kan nai cap, ne cap, ‘Nun mi dan cei kunmar do?’ tenen, nun kange mun kupseupa ekenume,” pepu.

49 Upepu pangeda, Yesusdi tamupra pepu. “Warya tep, nai cap, nanin cap, sun butenedi ne tep enererum do? Ne nai Allah er ati adipapu kunkamnada, men tenepmanerem do?” pepu. 50 Upepupane, sun butene konum gekeprei dinin, ‘Deiyoda atep pepmaser’ tenen, moupra men kael keprei.

51 Amendada, Yesus cap, sun butene cap, sun pe mutu Nasaret mutu tamupra bei dingeda, er nin er nai peramrei upu yuma gekepra kuramu. Er nin Mariadi, Yesus penmau upu cap, sun dinmarei keca cap, ange yumada, er dipru neitamai pio tenimamu. 52 Allahdi Yesus tep, kange deipudi, pio melimamupa, Yesus er nong cap, Allah kun keca kael kemna deiyo keca cap, weik kupbaramupa, nesala yumadi er tep kange derirami.