Wɛ di-dʋŋa kam nɩnwaŋa taanɩ
2
Canɩ sɩrpɛ sɩm da fiinle dɩdwɩ dɛ dɩm nɩ mʋ Baŋa-Wɛ ŋɔɔnɩ dɩ DƖ nijoŋnu Aze. 2 DƖ ma ta sɩ o lwǝni DƖ kwǝrǝ kam o brɩ Salatɩyɛlɩ bu Zorobabɛlɩ na yɩ Zuda tɩʋ kʋm yuutu tɩn, dɩ Yosadakɩ bu Zozwe na yɩ Wɛ kaanɩm nakwɩ tu tɩn, dɩdaanɩ nɔɔna balʋ na dɛ ba nuŋi sa-tɩʋ ba joori tɩn maama. Wɛ ma bwe-ba DƖ wɩ:3 «Abam wɔɔ mʋ nɛ Wɛ diga kam nɩnwaŋa dɛɛn na yɩ te pulim nɩ tɩn yɩ n ta wʋra zɩm? Á nan na lagɩ sɩ á kwe ka dɛɛn na yɩ te sɩ á maŋɩ dɩ ka zɩm nɩnwaŋa kam, kʋ yɩ tɩta mʋ? Abam wʋ maanɩ nɩ ka daa ba jɩgɩ zulə sɩ ka yi Wɛ di-doŋə kam na?a 4 Nan yɩ pa-na sɩ á wʋrʋ ga baarɩ kʋ ŋwaanɩ, sɩ amʋ, Paŋwa Tu Baŋa-Wɛ wʋ abam tee nɩ. Zorobabɛlɩ, dɩ Zozwe, kʋ ta wǝli dɩ á kɔgɔ kʋm maama, kɩ-na baarɩ á tɩtɩ nɩ sɩ á taá tʋŋa. 5 Maŋa kalʋ á kwə bam dɛɛn na nuŋi Ezipi nɩ tɩn mʋ a yɔɔrɩ a goni ni dɩ ba nɩ: amʋ wʋ́ taa wʋra dɩ abam. Amʋ Joro ta maa wʋ abam tee nɩ. Nan yɩ taá fʋna.
6 Amʋ, Paŋwa Tu Baŋa-Wɛ mʋ wɩ: Kʋ na kɩ fɩɩn amʋ daa ta wʋ́ joori a pa wɛyuu kʋm dɩ tɩga baŋa maama sisiŋi. A nan ta wʋ́ sisiŋi nanɩɩrʋ tɩm dɩ tɩga kam maama.b 7 Amʋ wʋ́ pa tɩga baŋa tɩɩnɩ dɩm maama sisiŋi pa dɩ nɔn-biə bam zɩŋɩ ba jɩjɩgɩrʋ ba ba yo seeni. Amʋ digə kam laan wʋ́ tiini ka na nɩnwaŋa kʋ baŋa nɩ. 8 Amʋ, Paŋwa Tu Baŋa-Wɛ mʋ wɩ: Səbu tɩm, dɩdaanɩ səbu-sɩŋa maama yɩ amʋ mʋ te-tɩ. 9 Di-dʋŋa kantʋ abam na wʋra á lɔ tɩn wʋ́ taa jɩgɩ nɩnwaŋa sɩ kʋ dwǝni di-doŋə kam. Je sɩm kʋntʋ nɩ amʋ wʋ́ pa a nɔɔna maama na yazurə dɩ bɩcar-zuru. Amʋ, Paŋwa Tu Baŋa-Wɛ mʋ tagɩ kʋntʋ.»
Aze larɩ dɩdaanɩ Wɛ kaanɩm tiinə
10 Bɩnɩ dɩlʋ Pɛ Dariusi paarɩ dim na wʋ́ kɩ bɩna yale tu tɩn canɩ nʋgʋ kʋm da fiinle-yana dɛ dɩm nɩ mʋ Baŋa-Wɛ daa pɛ DƖ kwǝrǝ yi DƖ nijoŋnu Aze. 11 DƖ maa wɩ:
«Amʋ, Paŋwa Tu Baŋa-Wɛ mʋ wɩ: Ve a kaanɩm tiinə bam te n bwe-ba n nii ba bʋŋɩ ba ja bɛɛ mʋ kǝm dɩntʋ baŋa nɩ: 12 Nɔɔnʋ na kwe nwanɩ dɩlʋ ba na pɔɔrɩ-dɩ ba tiŋi Wɛ kaanɩm ŋwaanɩ, yɩ o kukuli-dɩ o kɩ o gɔrɔ wʋnɩ, o na tu o kwe gɔrɔ kʋm kʋntʋ o dwe wʋdiu kʋlʋ dwi maama, kǝm dɩm kʋntʋ wʋ́ wanɩ dɩ pa wʋdiu kʋlʋ o gɔrɔ kʋm na dwe tɩn lɛɛrɩ kʋ taa yɩ lanyɩranɩ fasɩ na? Kʋ na yɩ dɩpɛ, naa dwə, naa sana, naa nugə, naa wʋdiu kʋlʋ dwi maama, kʋʋ́ kɩ kʋntʋ na?» Kaanɩm tiinə bam ma ləri wɩ: «Awo.»
13 Aze daa ma bwe-ba o wɩ: «Sɩ nɔɔnʋ nan na dwe tʋ yɩra pa kʋ brɩ nɩ o digimi o tɩtɩ dɩ cullu tɩm mʋ, yɩ o laan na tu o dwe wʋdiiru tɩntʋ maama, o kǝm dɩm kʋntʋ wʋ́ pa wʋdiiru tɩm digimi na?» Kaanɩm tiinə bam ma lǝr-o ba wɩ: «Ɛɛn, tɩ dɩ wʋ́ digimi mʋ.»c
14 Aze laan maa wɩ:
«Baŋa-Wɛ nan tagɩ nɩ: DƖ nii tɩʋ kʋntʋ dɩ kʋ nɔn-biə bam sɩ kʋ taa yɩ kʋntʋ mʋ. DƖ nɛ nɩ á na kɩ kənə yalʋ tɩn, dɩ á na yǝni á kwe wǝǝnu tɩlʋ á ma á kɩ kaanɩm DƖ bimbim dɩm baŋa nɩ á pa‑DƖ tɩn maama wʋ maŋɩ dɩ DƖ cullu tɩm mʋ. 15 Baŋa-Wɛ nan wɩ:
Kʋ na zɩgɩ zɩm sɩ kʋ taa veǝ, fɔgɩ-na á maanɩ á nii kʋ na yɩ te tɩn. ɡuli-na abam ya ta na wʋ bəri amʋ Baŋa-Wɛ digə kam kuri yɩ á na cam te tɩn. 16 Á na ve á karɩ sɩm wʋnɩ, á tɩɩnɩ sɩ á ja wʋdiu zwɩ fiinle mʋ á zʋ digə yɩ zwɩ fugə yɩranɩ mʋ wʋra. Abam ta na tɩɩna sɩ á kan sana á kɩ kʋnkwaanʋ fiinnu wʋnɩ, á wʋ́ lo-ba á su kʋnkwaanʋ fiinle yɩranɩ mʋ. 17 Kʋ yɩ amʋ mʋ pɛ dindəl-tʋʋ, dɩ dʋ-kambana, dɩ wʋdiiru yawɩɩrʋ ja á jɩŋa tɩtʋŋa tɩ cɔgɩ. Dɩ kʋntʋ maama nan, abam ta wʋ joori amʋ te. 18 Kʋ nan na zɩgɩ zɩm dɛ dɩm na yɩ canɩ nʋgʋ kʋm da fiinle-yana tɩn, fɔgɩ-na á maanɩ á nii kʋ na yɩ te tɩn. Bʋŋɩ-na á nii Wɛ diga kam kuri zɩm na cwi sɩ kʋ taa veǝ yɩ kʋ kɩ abam te tɩn. 19 Abam ta jɩgɩ mɩna á tuli wʋnɩ na? Kʋ na yɩ á tweeru tɩm, vinyə tweeru, dɩ Olivi tweeru, dɩ kapʋrrʋ, dɩ grɩnadɩnɩ tweeru, dɩ daa ta wʋra dɩ ləri biə na? Dɩ kʋ maama dɩ, kʋ na zɩgɩ zɩm sɩ kʋ taa veǝ, amʋ mʋ lagɩ a kɩ abam yu-yoŋo.»
Baŋa-Wɛ goni ni DƖ pa Zorobabɛlɩ
20 Dɛ dɩm kʋntʋ na yɩ cana kam da fiinle-yana tɩn, mʋ Baŋa-Wɛ daa pɛ Aze kwǝrǝ DƖ kɩ kuni bɩle. 21 DƖ maa wɩ:
«Zaŋɩ n vu Zuda tɩʋ kʋm yuutu Zorobabɛlɩ te n ta wɩ: Amʋ lagɩ a pa wɛyuu kʋm dɩ tɩga baŋa maama vuvugi. 22 A ta wʋ́ ja dwi-gɛ tiinə pwa, sɩ ba paarɩ dim dam maama ti. A lagɩ a pipiri jara-kǝm sise-tərikooru dɩ balʋ na diini-tɩ tɩn mʋ a pu tɩga nɩ. Jar-kərə siseŋ-nɔɔna bam maa wʋ́ tʋ tɩga nɩ, yɩ balʋ na diini-sɩ tɩn gʋ daanɩ pa ba maama tɩ.
23 Amʋ Paŋwa Tu Baŋa-Wɛ wɩ: Dɛ dɩm kʋntʋ nan na yiǝ, amʋ mʋ lagɩ a lɩ nmʋ Zorobabɛlɩ na yɩ Salatɩyɛlɩ bu tɩn. Nmʋ yɩ a tɩntʋŋnʋ. A nan wʋ́ pa n kwe amʋ yɩrɩ n ma n ta n te a nɔɔna bam, nɩnɛɛnɩ nmʋ yɩ jafʋlɩ na brɩ amʋ dam te tɩn mʋ. Bɛŋwaanɩ, nmʋ mʋ yɩ wʋlʋ a na kuri tɩn.
Amʋ Paŋwa Tu Baŋa-Wɛ mʋ tagɩ kʋntʋ.»