Aze 1

Wɛ Nijoŋnu

Aze Tɔnɔ

Wɛ diga kam kwɛɛm

Bɩnɩ dɩlʋ Pɛ Dariusi na di paarɩ o kɩ bɩna yale tɩn canɩ sɩrdʋ pulim dɛ dɩm nɩ mʋ Baŋa-Wɛ kwǝrǝ dɛɛn yi DƖ nijoŋnu Aze. Kwǝrǝ kam nan maŋɩ sɩ ka pa Salatɩyɛlɩ bu Zorobabɛlɩ mʋ. Wʋntʋ dɛɛn mʋ yɩ Zuda tɩʋ kʋm maama yuutu. Ka ta maa maŋɩ sɩ ka yi Yosadakɩ bu Zozwe, o na yɩ Wɛ kaanɩm nakwɩ tu tɩn.

2 Paŋwa Tu Baŋa-Wɛ nan tagɩ tɩntʋ mʋ DƖ brɩ Aze DƖ wɩ: «Nɔɔna bam kaagɩ ba taɩ ba wɩ: maŋa ta wʋ yi sɩ ba fɔgɩ ba lɔ Baŋa-Wɛ digə kam.» 3 Baŋa-Wɛ laan ma pa DƖ nijoŋnu Aze kwǝrǝ sɩ o lwǝni o brɩ nɔɔna bam yɩ o wɩ:

4 «Abam na zʋʋrɩ sɔ-ŋʋnnʋ tɩlʋ na fɔgɩ lanyɩranɩ wʋnɩ tɩn, yɩ amʋ digə kam laan zɩgɩ nɩnɛɛnɩ di-doŋo tɩn, kʋ maŋɩ na? 5 Paŋwa Tu Baŋa-Wɛ ta maa wɩ: Fɔgɩ á maanɩ á ŋwɩa wʋnɩ sɩ á nii kʋ na yɩ te tɩn. 6 Abam na yǝni á du wo-dwə zanzan, á wʋ́ zagɩ fɩnfɩɩn mʋ. Abam sɩɩnɩ á ba gaɩ sɩ á di. Kʋ nan na yɩ te tɩn, á ba fɔgɩ á di á sui. Á jɩgɩ na sɩ á nyɔ, yɩ na-nyɔm ta jɩgɩ abam. ɡwaarʋ tɩlʋ á na zʋʋrɩ á yɩra nɩ tɩn maa ba kwǝli á waarʋ. Á na tʋŋɩ sɩ á joŋi ŋwɩɩrʋ tɩlʋ tɩn ba fɔgɩ tɩ wǝli abam, kʋ nyɩ dɩ á kwe-tɩ á kɩ gwar-fɛɛla yalʋ na jɩgɩ bɔɔna tɩn wʋnɩ mʋ.

7 Paŋwa Tu Baŋa-Wɛ nan wɩ: Fɔgɩ á maanɩ á ŋwɩa wʋnɩ sɩ á nii kʋ na yɩ te tɩn. 8 Diini-na pweeru tɩm yuu nɩ á beeri da-ŋʋnnʋ á ja á ba. Laan kwe-na-sɩ á ma á fɔgɩ á lɔ digə kalʋ amʋ yi na wʋ taa sui tɩn, sɩ á daarɩ á taá zuli-nɩ ka wʋnɩ. 9 Abam ya tɩɩnɩ sɩ á zagɩ wʋdiu zanzan mʋ, yɩ kʋ ji fɩnfɩɩn kʋ pa abam. Kʋlʋ á na maŋɩ á ja á zʋ digə tɩn mʋ a fuli dɩ viu a yagɩ a daarɩ abam. Bɛɛ mʋ yɩ a kɩ kʋntʋ? Kʋ yɩ abam yiǝ na sɩɩnɩ á tɩtɩ sam lɔɔm baŋa nɩ, yɩ á yagɩ amʋ digə kam pa ka ji di-doŋo ka zɩga tɩn ŋwaanɩ mʋ. 10 Kʋntʋ ŋwaanɩ nan mʋ pa nyɔnɔ daa ba tʋɩ. Tɩga kam dɩ maa warɩ wʋdiu sɩ ka kɩ ka pa abam. 11 Amʋ ta ma pa da-kʋrɩ zɩgɩ á tɩga kam maama baŋa nɩ. Kʋ na yɩ á karɩ sɩm, dɩ pweeru tɩm, dɩ mɛ maama wʋdiiru na lagɩ tɩ kɩ tɩn, dɩ mɩna, dɩ vinyə tweeru, dɩ Olivi nugə tweeru na wʋ mɛ tɩn, tɩntʋ maama kwaarɩ mʋ. Kʋ ma zʋ abam tɩtɩ yɩra dɩdaanɩ á vara maama yɩra, yɩ á tɩtʋŋa maama dɩ ji kafɛ.»

12 Zorobabɛlɩ, dɩ Wɛ kaanɩm nakwɩ tu Zozwe, kʋ wǝli dɩ balʋ maama na dɛ ba nuŋi sa-tɩɩnɩ yigə yigə ba joori Zeruzalɛm tɩn maama na ni Wɛ nijoŋnu Aze taanɩ dɩm kʋntʋ tɩn, ba dɛɛn ma sɛ ba Tu Baŋa-Wɛ kwǝrǝ kam. Ba ma sɛ nɩ Baŋa-Wɛ ni dɩm tɔgɩ Aze baŋa nɩ mʋ dɩ yi-ba, yɩ ba puli sɩ ba taa zuli Baŋa-Wɛ dɩ cɩga.

13 Baŋa-Wɛ tɩntʋŋnʋ Aze dɛɛn ma kwe Wɛ ni dɩm o pa nɔɔna bam yɩ o wɩ: «Baŋa-Wɛ goni ni DƖ wɩ: DƖ wʋra dɩ abam mʋ.»

14 Baŋa-Wɛ ma ja nɔɔna bam maama wʋbʋŋa o kɩ daanɩ. Kʋ na yɩ Zorobabɛlɩ na yɩ Zuda tɩʋ kʋm yuutu tɩn, dɩ Zozwe na yɩ Wɛ kaanɩm nakwɩ tu tɩn, dɩ balʋ maama dɩ na dɛ ba nuŋi sa-tɩʋ yigə yigə ba joori tɩn, ba maama ma ba ba gilimi daanɩ, sɩ ba taa tʋŋɩ Paŋwa Tu Baŋa-Wɛ dɩm na yɩ ba Wɛ tɩn digə kam lɔɔm tɩtʋŋa. 15 Dariusi paarɩ dim bɩna yale tu bɩnɩ dɩm canɩ sɩrdʋ sɩm da fiinle-yana dɛ dɩm nɩ mʋ ba dɛɛn puli ba fɔgɩ ba lɔ Wɛ diga kam.