Nɔɔna bam maŋɩ sɩ ba ləni ba wʋrʋ
2
Nan kɩ-na daanɩ sɩ á tu á tɩtɩ Wɛ yigə nɩ,á na maŋɩ sɩ cavɩɩra ja abam tɩn ŋwaanɩ.
2 Bɛŋwaanɩ, dɛ dɩm lagɩ dɩ yi lɩla
sɩ Baŋa-Wɛ laan zəli abam DƖ yagɩ,
nɩnɛɛnɩ viu na fuli pʋrʋ kʋ yagɩ te tɩn.
Dɛ dɩm kʋntʋ nɩ, DƖ ban-lʋm dɩm lagɩ dɩ ba dɩ zwɛ abam mʋ kulə,
nɩ mim na tʋ wǝǝnu wʋnɩ kʋ di maama te tɩn.
3 Abam balʋ na zʋʋrɩ lʋgʋ kʋm wʋnɩ
yɩ á tu á tɩtɩ á daarɩ á tɔgɩ Wɛ niə yam tɩn,
kwaanɩ-na sɩ á lwarɩ Baŋa-Wɛ.
Taá kɩ-na kʋlʋ na lana tɩn,
sɩ á daarɩ á tu á tɩtɩ Wɛ yigə nɩ.
Dɛ dɩlʋ Baŋa-Wɛ wʋ́ kwǝli abam
sɩ cɔgɩm dɩm yɩ tɔgɩ dɩ yi abam
DƖ ban-zɔŋɔ dɛ dɩm nɩ.
Filisi tiinə taanɩ
4 Nan taá ye-na nɩ nɔɔn-nɔɔnʋ daa bá daarɩ Gaza tɩʋ wʋnɩ.a
Asekelon dɩ wʋ́ taa yɩ di-dwəənu yɩranɩ.
Ba lagɩ ba zəli Asedodi tiinə maama ba yagɩ,
yɩ wɛ ta wʋ yi yuparɩ baŋa.
Ba ta wʋ́ gɔ Ekoron tiinə dɩ ba yagɩ.b
5 Abam Filisi tiinə balʋ na zʋʋrɩ nɩnɩʋ kʋm ni nɩ tɩn,
lɛɛrʋ wʋ á yuu nɩ!
Abam Filisi tiinə na zʋʋrɩ Kaanan nɩ tɩn,
Baŋa-Wɛ maŋɩ DƖ di abam taanɩ yɩ DƖ wɩ:
«Amʋ nan wʋ́ yɔɔrɩ a cɔgɩ abam
yɩ nɔɔn-nɔɔnʋ bá lu.»
6 Abam tɩɩnɩ dɩlʋ na bwələ dɩ nɩnɩʋ kʋm tɩn
wʋ́ ji naanɩ pwələ dɩ najɩrɩ mʋ.
7 Zuda dwi tiinə balʋ na daarɩ tɩn mʋ wʋ́ joori
ba joŋi á tɩga kam ba taa te.
Ba vara wʋ́ taa beeri ba di je sɩm kʋntʋ nɩ.
Tɩga na yǝni ka yi,
nayɩra bam wʋ́ pəni Asekelon di-dwəənu nɩ.
Ba Tu Baŋa-Wɛ dɩm wʋ́ taa nii ba baŋa nɩ
pa ba joori ba taa jɩgɩ yu-yoŋo.
Moabɩ dɩ Amɔn tiinə taanɩ
8 Paŋwa Tu Baŋa-Wɛ dɩm na yɩ Yisɩrayɛlɩ tiinə Wɛ tɩn maa wɩ:
«A ni Moabɩ tiinə dɩ Amɔn tiinə na jɩgɩ a nɔɔna bam ba twɩa
yɩ ba yáalɩ-ba te tɩn.
Ba maa brɩ ba tɩtɩ ba wɩ
baá joŋi ba tɩga kam ba taa te.
9 Nɩ amʋ Baŋa-Wɛ na jɩgɩ ŋwɩa te tɩn,
kʋ yɩ cɩga mʋ wɩ:
Moabɩ dɩ Amɔn tiinə bam wʋ́ yɔɔrɩ ba na cɔgɩm
nɩnɛɛnɩ kʋ na kɩ Sodɔm dɩ Gomɔrɩ tɩɩnɩ dɩm te tɩn.c
Ba tɩɩnɩ dɩm wʋ́ ji yɛ goŋo dɩ di-dwəənu yɩranɩ,
yɩ ga-balwaarʋ lwarɩ tɩga kam maama maŋa maama.
A nɔɔna balʋ na daarɩ tɩn mʋ lagɩ ba vrɩ ba wǝǝnu
yɩ ba daarɩ ba joŋi ba tɩga kam.»
10 Kʋntʋ tɩn, Moabɩ dɩ Amɔn tiinə bam wʋ́ na ba nyɔɔrɩ
ba tɩɩra yam baŋa nɩ,
dɩ ba na jɩgɩ Paŋwa Tu Baŋa-Wɛ nɔɔna bam ba twɩa
yɩ ba mwanɩ-ba tɩn ŋwaanɩ.
11 Baŋa-Wɛ mʋ lagɩ DƖ yɔɔrɩ o fugi-ba,
yɩ DƖ pa tɩga baŋa wa yam maama dam ti.
Lʋgʋ baŋa tɩɩnɩ dɩm maama na maŋɩ ba zʋʋrɩ mɛ maama,
ba laan wʋ́ ba ba taa zuli dɩntʋ Baŋa-Wɛ.
Kusi tiinə taanɩ
12 Kʋ ta na yɩ abam Kusi tiinə bam,
Baŋa-Wɛ mʋ lagɩ DƖ pa á tɩ najara wʋnɩ.
Asiiri tiinə taanɩ
13 Baŋa-Wɛ wʋ́ zaŋɩ tɩɩnɩ dɩlʋ na wʋ jazɩm baŋa seeni tɩn baŋa nɩ.
DƖ lagɩ DƖ yɔɔrɩ DƖ cɔgɩ Asiiri dɩ kʋ tɩʋ kamunu Ninivi,
pa tɩga kam ji tɩ-kʋra je
mɛ nɔɔn-nɔɔnʋ na tǝrǝ tɩn.
14 Naanɩ dɩ peeni wʋ́ taa pəni tɩʋ kʋm wʋnɩ
kʋ ta wǝli dɩ ga-vara dwi maama.
Kunkwəəru dɩ bacangaarʋ maa wʋ́ taa tigi di-dwəənu tɩm nɩ tɩ keerǝ.
Tɩ da-ŋʋnnʋ tɩm maama wʋ́ taa tigi mʋ ja,
pa nɔɔna taa tui ba lɩ-tɩ.
15 Ninivi tɩʋ kʋm ya lana zanzan.
Nɔɔna balʋ na zʋʋrɩ kʋ wʋnɩ tɩn tiini ba jɩgɩ kamunni mʋ
yɩ kʋlʋkʋlʋ ba daanɩ-ba.
Ba maa bʋŋɩ nɩ bantʋ tɩʋ kʋm mʋ dwe
tɩɩnɩ dɩm maama lʋgʋ baŋa nɩ.
Tɩʋ kʋm kʋntʋ nan mʋ lagɩ kʋ ji di-dwəənu
sɩ ga-vara dwi maama taa tigi da.
Balʋ maama na wʋ́ tɔgɩ da ba kɛ tɩn
wʋ́ yeeri mʋ yɩ ba dʋlɩ ba jɩn.