Wɛ Nijoŋnu
Sofoni Tɔnɔ
Baŋa-Wɛ ban-zɔŋɔ dɛ dɩm
1
Kwǝrǝ kalʋ Baŋa-Wɛ na kwe DƖ pa Sofoni maŋa kam Amɔn bu Zʋzɩasɩ na yɩ Zuda tɩʋ pɛ tɩn mʋ tɩntʋ.a Sofoni yɩ pɛ Ezekɩasɩ dwi tu wʋlʋ dɩ na nuŋi Amari, dɩ Gedalia, dɩ Kusi dwiə yam wʋnɩ tɩn mʋ.2 Baŋa-Wɛ taga DƖ wɩ:
«Amʋ lagɩ a saarɩ woŋo kʋlʋ maama na wʋ tɩga baŋa nɩ tɩn mʋ.
3 Amʋ wʋ́ cɔgɩ nabiinǝ bam, dɩ vara bam,
dɩ zunə bam, dɩ kale sɩm maama.
Amʋ wʋ́ pa nɔn-balwaarʋ tɩm tʋ tɩga nɩ,
yɩ nɔɔnʋ dɩ dɩdʋa dɩ bá daarɩ.
Amʋ Baŋa-Wɛ na tagɩ kʋlʋ tɩn mʋ kʋntʋ.
4 Amʋ wʋ́ zaŋɩ Zeruzalɛm tiinə
dɩ Zuda tiinə bam maama baŋa nɩ.
Kʋ na yɩ balʋ ta na zuli Baalɩ jwǝnǝ yam tɩn,
amʋ wʋ́ lɩ-ba je sɩntʋ wʋnɩ a yagɩ.
Ba jwǝnǝ kaanɩm yigǝ tiinǝ bam dɩ wʋ́ je,
pa ba yɩra saarɩ tɩga kam baŋa nɩ.
5 Amʋ ta wʋ́ cɔgɩ balʋ maama na yǝni ba diini nayuu
ba jɔɔnɩ wɩa, dɩ cana, dɩ calɩcwɩ sɩm tɩn,
kʋ wǝli dɩ balʋ na zuli amʋ Baŋa-Wɛ
yɩ ba ta du durə dɩ Molɔkɩ jwəm dɩm tɩn.b
6 Kʋ na yɩ balʋ na joori amʋ Baŋa-Wɛ kwaga nɩ
yɩ ba daa ba laga sɩ a taa nii ba baŋa nɩ tɩn,
amʋ wʋ́ cɔgɩ bantʋ maama dɩ.»
7 Yuutu Baŋa-Wɛ sarɩya dɛ dɩm bwələ.
Kʋntʋ ŋwaanɩ taá yɩ-na cɩmm DƖ yigə nɩ.c
Baŋa-Wɛ wʋra DƖ ti DƖ yigə sɩ DƖ kwe Zuda tiinə bam
DƖ kɩ ba dʋna jɩŋa nɩ,
nɩ DƖ na lagɩ DƖ kɩ kaanɩm te tɩn.
8-9 Baŋa-Wɛ ma ta DƖ wɩ:
«Dɛ dɩm ba na wʋ́ ba ba goni ba yum kʋntʋ tɩn,
amʋ wʋ́ waarɩ pɛ wʋm dɩdɛɛra bam,
dɩ o biə bam maama.
Bantʋ yǝni ba ma dam dɩ kampinə mʋ ba vrɩ nɔɔna wǝǝnu
sɩ ba kwe-tɩ ba tiŋi ba tu wʋm digə nɩ ba su.
A ta wʋ́ waarɩ balʋ na jɩgɩ vərə cullu ba tɔga
yɩ ba zuli jwə-yɔɔrʋ tɩn.
10 Dɛ dɩm kʋntʋ na yiǝ,
kaasa wʋ́ zaŋɩ tɩʋ kʋm Kale Ni dɩm nɩ.
Abam ta wʋ́ ni nɔɔna na coosǝ
tɩʋ kʋm jə-dʋŋa laŋa kam nɩ.
Sɔɔ-balɔrɔ dɩ maa wʋ́ nuŋi pweeru tɩlʋ na gilimi da tɩn.
11 Abam balʋ na zʋʋrɩ tɩʋ kʋm yaga je sɩm nɩ tɩn,
taá keeri-na,
pipimpiinə dɩ sǝbu-lǝnnǝ bam maama na je tɩn ŋwaanɩ.
12 Kantʋ maŋa kam nɩ, amʋ wʋ́ tarɩgɩ min-zoŋo
a beeri Zeruzalɛm gugwəəru maama wʋnɩ.
Kʋ na yɩ balʋ na bʋŋɩ nɩ ba sin mʋ ba lwarɩm wʋnɩ
yɩ ba ta wɩ:
‹Baŋa-Wɛ bá kɩ dɩbam kʋlʋkʋlʋ,
kʋ na yɩ cɔgɩm naa zǝnǝ› tɩn,
amʋ wʋ́ vaŋɩ ba zwa.
13 Bantʋ tɩtɩ dʋna mʋ lagɩ ba vrɩ ba jɩjɩgɩrʋ tɩm
ba daarɩ ba cɩcʋgɩ ba sam dɩm.
Baá lɔ sam,
ba nan bá zʋ dɩ wʋnɩ.
Ba ta wʋ́ jəri vinyə tweeru biə,
ba nan bá na dɩ sana ba nyɔ.»
14 Baŋa-Wɛ dɛ-kamunu kʋm kʋntʋ bwələ.
Dɛ dɩm duri mʋ lɩla sɩ dɩ yi.
Baŋa-Wɛ dɛ dɩm wʋ́ ja cam dɩ ba.
Babɛ maa wʋ́ keeri ba wʋ-cɔgɔ ŋwaanɩ.
15 Baŋa-Wɛ ban-lʋm wʋ́ tiini dɩ zaŋɩ dɛ dɩm kʋntʋ nɩ.
Dɩ wʋ́ ja wʋ-cɔgɔ dɩ cam dɩ ba.
Cɔgɩm dɩ wʋ́ tiini dɩ taa wʋra.
Dɩntʋ dɛ dɩm wʋ́ taa yɩ lim yɩranɩ mʋ.
Kunkwǝǝnu tɩm wʋ́ zwəri tɩ li tɩga kam maama bɩramm.
16 Nabwaanʋ wʋ́ wu. Tiguri-kaasa dɩ maa wʋ́ zaŋɩ.
Najara yam wʋ́ yi tɩɩnɩ dɩlʋ na lɔgɩ dɩ pɩ tɩn,
dɩdaanɩ dɩ di-dɩdwaarʋ tɩm.
17 Baŋa-Wɛ maa wɩ:
«Amʋ wʋ́ pa cam yi nabiinǝ
sɩ ba taa ve nɩ lilwǝ te,
ba na kɩ lwarɩm ba cɔgɩ a yigə tɩn ŋwaanɩ.
Ba yɩra jana wʋ́ lo nɩnɛɛnɩ na na cuuri te tɩn,
yɩ ba ya-nwana faarɩ tɩga ya pɔ.»
18 Baŋa-Wɛ ban-lʋm dɛ dɩm na yiǝ,
nabiinǝ lu-nyɩnno dɩ ba səbu-sɩŋa bá wanɩ tɩ joŋi-ba tɩ yagɩ.
DƖ ban-zɔŋɔ kʋm wʋ́ cɔgɩ lʋgʋ baŋa maama,
nɩ mim na zwɛ wǝǝnu te tɩn.
Wɛ wʋ́ kɩ lɩla DƖ saarɩ nabiinǝ bam,
pa ba maama je fasɩ!