Zeruzalɛm tiinə taanɩ
3
Lɛɛrʋ wʋ á tɩʋ kʋm baŋa nɩ!Kʋ nɔn-biə bam maa yɩ zwabani-nyɩna,
dɩ nɔn-balwaarʋ, dɩ nɔn-kayɛ yɩranɩ mʋ.
2 Ba tiini ba jɩgɩ yi-dɛɛrɩ
yɩ ba vɩn zwa vaŋɩm.
Ba wʋ kɩ ba wʋ-dɩdʋa dɩ ba Tu Baŋa-Wɛ dɩm
naa ba salɩ DƖ yɩra nɩ.
3 Tɩʋ kʋm nakwa bam yǝni ba fugi nɔɔna
nɩnɛɛnɩ nywəənu na ŋuuni te tɩn mʋ.
Kʋ dɩdɛɛra bam jɩgɩ wo-lʋŋʋ
nɩ nywǝnkuri na ba di ba daara sɩ tɩga pʋʋre-kʋ te tɩn mʋ.
4 Ba nijoŋnǝ bam maa yɩ kampin-nyɩna na jɩgɩ niə yale tɩn.
Ba kaanɩm tiinə bam vɩn Wɛ niə yam
pa ba cɔgɩ Wɛ diga kam cullu tɩm.
5 Baŋa-Wɛ nan ta wʋ tɩʋ kʋm wʋnɩ.
DƖ maa jɩgɩ cɩga yɩranɩ
yɩ DƖ ba kɩ lwarɩm dɩ fɩnfɩɩn dɩ.
Tɩga na yǝni ka pʋʋrɩ dɛ maama wʋnɩ DƖ tʋŋa
sɩ cɩga kam mʋ jǝni ka pa DƖ nɔɔna,
yɩ o ba yaga.
Nɔn-balwaarʋ tɩm nan ta tʋŋɩ lwarɩm mʋ
yɩ cavɩɩra ba jɩgɩ-ba.
Baŋa-Wɛ maa wɩ:
6 «Amʋ cɔgɩ lʋgʋ baŋa dwi tiinə zanzan,
pa ba dam je sɩm tʋ bʋrʋ-tʋ-tʋ.
Nɔɔn-nɔɔnʋ daa tǝrǝ ba tɩɩnɩ dɩm wʋnɩ.
Nɔɔna maa ba tɔgɩ dɩ cwe sɩm ba veǝ.
Ba tʋ-kamunə tɩm maama tigi mʋ zaanɩ,
yɩ nɔɔnʋ dɩ dɩdʋa dɩ wʋ daarɩ.
7 A nan ya bʋŋɩ nɩ abam laan wʋ́ taa kwarɩ amʋ
yɩ á sɛ a zwa vaŋɩm dɩm.
A nɔɔna bam ya na kɩ kʋntʋ,
ba sam dɩm ya bá na cɔgɩm,
yɩ a waarɩm dɩm bá yi-ba.
Ba nan yɔɔrɩ ba kwaanɩ mʋ ba tʋŋɩ lwarɩm
ba dɛ maama tɩtʋŋa baŋa nɩ.»
8 Baŋa-Wɛ ta ma ta DƖ wɩ:
«Kʋntʋ ŋwaanɩ cəgi-na sɩ a laan ba abam te.
Dɛ dɩm kʋntʋ nɩ amʋ wʋ́ zaŋɩ a brɩ nɩ
lʋgʋ baŋa dwi tiinə bam ba jɩgɩ cɩga.
Amʋ bʋŋɩ a ja sɩ a la lʋgʋ baŋa dwi tiinə bam
dɩ balʋ na zʋʋrɩ tɩɩnɩ dɩm maama nɩ tɩn mʋ a kɩ daanɩ,
sɩ a pa ba lwarɩ a ban-lʋm na yɩ te tɩn.
Amʋ wʋ́ pa a banɩ tiini dɩ zaŋɩ ba baŋa nɩ
yɩ lʋgʋ kʋm maama wʋ́ cɔgɩ fasɩ,
nɩ mim na zwɛ wǝǝnu te tɩn.
9 Amʋ laan wʋ́ ləri nɔɔna bam ni-taana,
pa ba maama taa loori amʋ Baŋa-Wɛ
nɩ kʋ na maŋɩ sɩ ba kɩ te tɩn.
Ba maama wʋ́ tɔgɩ daanɩ ba zuli-nɩ dɩ ni dɩdwɩ.
10 Kʋ ta na yɩ amʋ nɔɔna balʋ na jagɩ ba vu ba gaalɩ Kusi bwi sɩm,
yɩ ba zʋʋrɩ tɩʋ kʋntʋ yigə yigə wʋnɩ ba zuli-nɩ tɩn,
bantʋ wʋ́ ja ba pɛɛra ba joori ba ba ba pa-nɩ.
11 Kantʋ maŋa kam na yiǝ, abam daa bá taa wʋ cavɩɩra wʋnɩ
dɩ á na nuŋi a kwaga nɩ te tɩn ŋwaanɩ.
Bɛŋwaanɩ, amʋ wʋ́ lɩ balʋ maama na brɩ ba tɩtɩ kamunni tɩn á wʋnɩ.
Nɔɔna daa bá taa jɩgɩ tɩɩra
piu kʋlʋ amʋ na zʋʋrɩ da tɩn baŋa nɩ.
12 Kʋ na yɩ nɔɔna balʋ na wʋ́ daarɩ á wʋnɩ tɩn,
bantʋ wʋ́ taa yɩ nabwənə balʋ na gooni ba tɩtɩ tɩn.
Ba ta wʋ́ taa salɩ amʋ Baŋa-Wɛ yɩra nɩ.
13 Yisɩrayɛlɩ dwi tiinə balʋ ta na daarɩ tɩn bá kɩ nɔɔn-nɔɔnʋ lwarɩm.
Ba bá fɔ vwan, yɩ ba nan bá ganɩ ba donnǝ.a
Baá na pwəgə je yɩ ba sin.
Nɔɔn-nɔɔnʋ daa bá fugi-ba.»
14 Siyɔn tiinə bam, taá leeni-na!
Yisɩrayɛlɩ tiinə bam maama, kɩ-na sɔɔ na ywəmmə tɩn!
Zeruzalɛm tɩʋ kʋm tiinə, taá jɩgɩ-na wʋpolo
yɩ á caka lanyɩranɩ!
15 Bɛŋwaanɩ, Baŋa-Wɛ lagɩ DƖ lɩ abam á cam dɩm maama wʋnɩ.
DƖ ta wʋ́ zəli á dʋna bam maama DƖ yagɩ.
Baŋa-Wɛ dɩm na yɩ Yisɩrayɛlɩ tiinə pɛ tɩn wʋ abam tee nɩ.
Fʋʋnɩ daa ba maŋɩ sɩ kʋ ja abam daga.
16 Dɛ dɩm kʋntʋ na yiǝ,
baá ta dɩ Zeruzalɛm tiinə bam wɩ:
«Siyɔn tiinə bam, yɩ taá kwarɩ-na fʋʋnɩ.
Nan yɩ pa-na á wʋrʋ ga baarɩ.
17 Abam Tu Baŋa-Wɛ dɩm wʋ abam tee nɩ.
DƖ jɩgɩ dam nɩ babɩa te sɩ DƖ ma DƖ vrɩ abam.
Baŋa-Wɛ yigə wʋ́ taa wʋ abam baŋa nɩ,
yɩ á joori á na dam DƖ sono kʋm ŋwaanɩ.
DƖ daa ta wʋ́ puli lǝŋ-ŋwɩ le á ŋwaanɩ,
18 nɩnɛɛnɩ nɔɔna na di candiə yɩ ba jɩgɩ wʋpolo te tɩn.»
Baŋa-Wɛ maa wɩ:
«Amʋ lagɩ a lɩ lɛɛrʋ tɩlʋ na wʋ á baŋa nɩ tɩn a yagɩ.
Cavɩɩra daa ba maŋɩ sɩ ya ja abam.
19 Nii-na! Maŋa kam na yiǝ,
amʋ wʋ́ waarɩ balʋ na bɛɛsɩ abam tɩn.
A ta wʋ́ joŋi balʋ na yɩ gwaarʋ tɩn,
a daarɩ a la balʋ maama na jagɩ tɩn a kɩ daanɩ.
Amʋ wʋ́ pa ba cavɩɩra ləni ya ji zulə,
pa ba na yɩrɩ lʋgʋ baŋa je maama nɩ.
20 Maŋa kam kʋntʋ nɩ, a lagɩ a la abam a kɩ daanɩ,
pa á joori sɔŋɔ mʋ.
A ta wʋ́ pa á na zulə yɩ á yɩrɩ zaŋɩ
lʋgʋ baŋa dwi maama tee nɩ,
yɩ á joori á taá jɩgɩ yu-yoŋo.
Abam yiǝ wʋ́ na amʋ kǝm dɩm kʋntʋ.»
Baŋa-Wɛ na tagɩ kʋlʋ tɩn mʋ kʋntʋ.