Baŋa-Wɛ na ləri DƖ kɩ bɩle te tɩn
2
Amʋ wʋ́ zɩgɩ nayuu kʋm baŋa nɩ mʋ a cəgi sɩ a nii Baŋa-Wɛ lagɩ DƖ ta bɛɛ mʋ DƖ brɩ-nɩ sɩ DƖ ləri a pʋmpʋna kam. 2 Baŋa-Wɛ ma ləri DƖ ta dɩ amʋ DƖ wɩ:«Pʋpʋnɩ a na lɩ wǝǝnu tɩlʋ a brɩ-m tɩn jaja n kɩ tɔnɔ wʋnɩ. Kʋntʋ wʋ́ pa balʋ na wʋ́ pa taanɩ dɩm yi nɔɔna tɩn ni kʋ kuri sɩ ba dɩ lwǝni ba brɩ nɔɔna. 3 Maŋa ta wʋ yi sɩ wǝǝnu tɩlʋ a na wʋ́ lɩ a brɩ-m tɩn kɩ. Kʋ nan bá daanɩ sɩ maŋa kalʋ tɩ na wʋ́ kɩ tɩn ba ka yi. Kʋ na nyɩ dɩ kʋ wʋra kʋ daanɩ mʋ dɩ, daa n ta pɩɩnɩ n cəgi, sɩ ka maŋa kam wʋ́ sɩɩnɩ ka yi sɩ vɩɩra yam kɩ.
4 Nii! Brɩ-n-tɩtɩ nyɩna bam mʋ wʋ́ ga ba ŋwɩa. Wʋlʋ maama na jɩgɩ cɩga Wɛ tee nɩ tɩn wʋ́ na ŋwɩa o wʋ-dɩdʋa kam ŋwaanɩ.a
5 Jɩjɩgɩrʋ b nan ganɩ nɔɔna pa ba tʋ mʋ. Siun dɩ maa tǝrǝ kʋ pa brɩ-n-tɩtɩ nyɩna bam. Ba jɩgɩ pu-sɩŋa mʋ yɩ ba kəŋi ba niə nɩ tʋʋnɩ dɩ yibeelǝ tɩn. Ba yǝni ba lɩ tɩɩnɩ zanzan sɩ ba taa jɩga, yɩ ba wanɩ dɩ nɔn-biə bam.
6 Dɛ wʋ́ ba dɩ yi pa ba na wanɩ balʋ tɩn joori ba bɛɛsɩ nɔɔna bam kʋntʋ. Baá dɩ dɩndɩ ba ma mwanɩ brɩ-n-tɩtɩ nyɩna bam yɩ ba wɩ: ‹Lɛɛrʋ wʋ á baŋa nɩ, abam balʋ na ganɩ nɔɔna yɩ á vrɩ-ba sɩ á ma á duni tɩn. Abam wʋ́ kɩ kʋntʋ taa sɩ á vu á maŋɩ yən mʋ?›
7 Balʋ á na jɩnɩ ba tee nɩ tɩn wʋ́ zaŋɩ lɩla ba joori ba joŋi ba wǝǝnu tɩm. Ba ta wʋ́ pa á ŋwɩ tɩdonnǝ dɩ á wǝli da. Abam dʋna mʋ lagɩ ba joori ba wanɩ abam, sɩ fʋʋnɩ zʋ abam. 8 Abam wanɩ tɩɩnɩ zanzan nɔɔna mʋ á gʋ-ba yɩ á vrɩ ba wǝǝnu. Dɩ kʋntʋ maama dɩ, nɔɔna balʋ na daarɩ tɩn dɩ mʋ lagɩ ba joori ba vrɩ abam dɩ wǝǝnu tɩm. Bɛŋwaanɩ, á kɩ tigurə mʋ lʋgʋ kʋm baŋa nɩ yɩ á gʋ nabiinǝ tɩɩnɩ maama wʋnɩ.
9 Lɛɛrʋ wʋ á baŋa nɩ, dɩ á na kɩ dam á ma á vrɩ wǝǝnu zanzan sɩ á ma á ji nadunə tɩn. Á ma‑á kwaanɩ sɩ abam sɔŋɔ kʋm taa zɩgɩ lanyɩranɩ sɩ kʋ yɩ cɔgɩ. 10 Abam na kɩ kǝm-balwaarʋ yɩ á cɔgɩ nɔɔna zanzan kʋntʋ tɩn, cavɩɩra mʋ jaanɩ abam dwi dɩm maama pa á ga á ŋwɩa. 11 Kandwa yam ba na mɛ ba ma lɔ á sam dɩm tɩn, kʋ wǝli dɩ be sɩlʋ ba na mɛ ba kɩ nayuni tɩm tɩn, wǝǝnu tɩm kʋntʋ maama mʋ wʋ́ ŋɔɔnɩ tɩ vɩn abam bʋra.
12 Lɛɛrʋ wʋ á baŋa nɩ, dɩdaanɩ á na gʋ nɔɔna zanzan, yɩ á daarɩ á kɩ kǝm-balwaarʋ á ma á lɔ á tɩʋ kʋm á zɩgɩ tɩn. 13 Nii! Paŋwa Tu Baŋa-Wɛ nan mʋ wʋ́ pa tɩɩnɩ dɩm jɩjɩgɩrʋ dwi maama ji kafɛ. Ba na yaarɩ ba lɔ kʋlʋ maama ba zɩgɩ tɩn wʋ́ ji tɩntwarɩm. 14 Baŋa-Wɛ paarɩ-zulǝ yam wʋ́ ba ya lwarɩ jaja, pa lʋgʋ baŋa su dɩdaanɩ balʋ na ye-ya tɩn, nɩ na na yɔɔrɩ ba su nɩnɩʋ kʋm wʋ maama te tɩn mʋ.c
15 Lɛɛrʋ wʋ abam baŋa nɩ, dɩdaanɩ á na pɛ á donnǝ nyɔ sa-dɛɛra ba su, sɩ á laan wanɩ á na ba cavɩɩra tɩn. 16 Baŋa-Wɛ wʋ́ pa á zulə ji cavɩɩra! DƖ nan wʋ́ pa á tɩtɩ joori á nyɔ sa-dɛɛra bam á bugi, pa á tiini á na á cavɩɩra. DƖ maa wʋ́ kwe na-zʋŋa kalʋ na wʋ DƖ jazɩm nɩ tɩn DƖ pa abam, sɩ á nyɔ ka wʋnɩ yɩ á na waarɩm. 17 Abam mʋ zagɩ Liban tweeru tɩm á dɩ tɩga nɩ, yɩ á daarɩ á zəli ga-vara bam maama á gʋ. Wɛ nan wʋ́ zagɩ abam o dɩ tɩga nɩ! Ga-vara bam wʋ́ joori ba ja fʋʋnɩ ba ba abam baŋa! Bɛŋwaanɩ, abam gʋ nɔɔna zanzan yɩ á ma dam á cɔgɩ lʋgʋ baŋa tɩɩnɩ dɩdaanɩ dɩ nɔn-biə bam maama.
18 Jwəm jɩgɩ bɛ nyɔɔrɩ mʋ dɩ paɩ nabiinǝ? Dɩ za jɩgɩ zǝnǝ dɔɔ mʋ yɩ nɔɔna maa jɩgɩ tɩɩna dɩ baŋa nɩ kʋntʋ tɩn? Jwəm fɔ vwan yɩranɩ mʋ. Nabiinu mʋ kɩ-dɩ o zɩgɩ, yɩ dɩ nan warɩ sɩ dɩ puri dɩ ni dɩ ŋɔɔnɩ. 19 Lɛɛrʋ wʋ abam baŋa nɩ! Abam yǝni á kwe daa naa kandwɛ yɩ á ta á wɩ: dɩ zaŋɩ wɛɛnɩ dɩ joŋi abam dɩ yagɩ! Jwəm waɩ dɩ ŋɔɔnɩ na? Nabiinu mʋ kwe səbu-sɩŋa naa səbu o ma o kwǝli dɩ maama, yɩ dɩ ba ŋwɩ.»
20 Baŋa-Wɛ nan wʋ DƖ wɛyuu sɔŋɔ kʋm nɩ mʋ. Lʋgʋ baŋa nɔɔna maama maŋɩ sɩ ba taa yɩ cɩmm mʋ DƖ yigə nɩ.d