Wɛ Nijoŋnu
Habakuki Tɔnɔ
1
Kwǝrǝ kalʋ Baŋa-Wɛ na kwe DƖ pa DƖ nijoŋnu Habakuki tɩn mʋ tɩntʋ:Habakuki na pʋʋnɩ Baŋa-Wɛ te tɩn
2 Baŋa-Wɛ! Amʋ wʋ́ loori tɩta mʋ a loori‑m
sɩ n laan wanɩ n cəgi-nɩ,
yɩ n daarɩ n joŋi dɩbam n yagɩ vuvugə kantʋ wʋnɩ?a
3 Nmʋ bʋŋɩ nɩ kʋ lamma sɩ amʋ taa naɩ kǝm-balwaarʋ
dɩdaanɩ vwan tɩtʋŋa yantʋ na gilimi-nɩ tɩn na?
Bɛɛ mʋ yɩ nmʋ sɛ sɩ nakɔɔrɩ dɩdaanɩ tigurə dɩ cɔgɩm tiini kʋ wʋra je maama nɩ kʋntʋ?
4 Nɔɔna daa ba tɔgɩ nmʋ niə yam,
ba kwɩɩlɩ-ya mʋ ba yagɩ tɩga nɩ
yɩ cɩga kam je.
Nɔn-balwaarʋ brɩ ba cɩ nɔn-ŋʋna,
pa ba bʋrɩm daa ba tɔgɩ cwǝŋǝ.
Baŋa-Wɛ na ləri te tɩn
Baŋa-Wɛ maa wɩ:
5 Nii-na tɩɩnɩ dɩlʋ na gilimi abam tɩn seeni,
sɩ kʋʋ́ sɔɔrɩ á yɩra.
Amʋ lagɩ a kɩ woŋo kʋdoŋ mʋ abam da yam wʋnɩ,
yɩ ba na maŋɩ ba ta ba brɩ abam kʋ kuri te maama dɩ,
á bá sɛ nɩ kʋ yɩ cɩga.b
6 Amʋ lagɩ a pa Babilɔnɩ tiinə mʋ zaŋɩ wɛɛnɩ.
Bantʋ tiini ba yɩ wʋ-lʋn-nyɩna, yɩ ba ta jɩgɩ baarɩ.
Ba lagɩ sɩ ba taa te tɩɩnɩ dɩm maama.
Ba yɔɔrɩ ba ve yigə mʋ,
yɩ ba wanɩ tɩga baŋa tɩɩnɩ dɩlʋ na daɩ ba tɩtɩ tɩɩnɩ tɩn.c
7 Ba tiini ba jɩgɩ fʋʋnɩ mʋ ba pa nɔɔna,
yɩ nɔɔn-nɔɔnʋ maa warɩ-ba o cɩ ba kǝm-cɛɛrɩ dɩm ŋwaanɩ.
8 Ba siseŋ-nɔɔna durim dwe gweeru na duri te tɩn.
Sɩ maa jɩgɩ fʋʋnɩ
sɩ dwe ga-varɩ-balwaarʋ.
Ba tiini ba diini sise sɩm ba nuŋi je sɩlʋ na baŋwɛ tɩn,
yɩ sɩ napɔɔna guri tɩga.
Sɩ maa magɩ daanɩ
nɩnɛɛnɩ kawulə na nɛ cibiə ka caalɩ te tɩn.
9 Ba na yi mɛ dɩ ba kǝm-cɛɛrɩ dɩm,
nɔɔna fʋna dɩ ba mʋ.
Kʋ maa paɩ ba waɩ ba dʋna.
Ba na wanɩ nɔɔna balʋ tɩn kɔgɔ yɩ nɩnɛɛnɩ bugə ni kasʋlʋ na daga te tɩn.
10 Ba ma gooni pwa yɩ ba mwanɩ dɩdɛɛra.
Ba yi mʋ nɛ pwa bam di-dɩdwaarʋ tɩlʋ na damma tɩn.
Ba yǝni ba lɔ taala mʋ ba ja ba di di-dɩdwaarʋ tɩm yuu seeni,
yɩ ba laan wanɩ-ba.
11 Ba frɩ mʋ ba kɛa nɩ viu te.
Ba maa ve yigə ba kɩ yantʋ cavɩɩra yam.
Ba jɩgɩ kamunni mʋ dɩ ba jwǝnǝ yam na pa-ba dam tɩn.
Habakuki pʋʋnɩ Baŋa-Wɛ o kɩ bɩle
12 Amʋ Tu Baŋa-Wɛ, nmʋ yɩ Wɛ mʋ pulim nɩ. N ma n yɩ Wʋ-poŋo Tu sɩ kʋ taa ve maŋa kalʋ na ba ti tɩn.
Nmʋ bá pa dɩ́ tɩ. Amʋ Tu Baŋa-Wɛ, nmʋ yɩ dɩlʋ na cʋ dɩbam tɩn mʋ.
Nmʋ mʋ kuri Babilɔnɩ tiinə bam sɩ ba bʋrɩ dɩbam bʋra,
ba daarɩ ba vaŋɩ dɩ́ zwa.
13 Nmʋ na yɩ Wʋ-poŋo Tu tɩn, n bá wanɩ n sɛ wo-lwaanʋ. Nmʋ ba lagɩ sɩ nɔɔna tusi cwǝŋǝ. Nmʋ na ba lagɩ kǝm-balwaarʋ tɩn, bɛɛ mʋ yɩ n yagɩ pa nɔn-balwaarʋ tɩm cɔgɩ dɩbam balʋ na garɩ bantʋ tɩn?d
14 Nmʋ pɛ nabiinǝ nyɩ dɩ kale dɩdaanɩ wo-kʋrrʋ tɩlʋ na wʋ nɩnɩʋ wʋnɩ yɩ tɩ ba jɩgɩ yuutu tɩn mʋ. 15 Kʋntʋ ŋwaanɩ Babilɔnɩ tiinə bam yǝni ba ma gwǝli-dʋlɩ ba ja nɔɔna nɩnɛɛnɩ ba yɩ kale mʋ te. Ba jaanɩ nɔɔna mʋ ba kɩ ba bʋrɩ sɩm wʋnɩ yɩ ba mwana. 16 Ba kɩ kaanɩm ba zuli ba bʋrɩ sɩm, bɛŋwaanɩ sɩ paɩ ba naɩ wʋdi-laarʋ ba di, yɩ ba ŋwɩa ywəmmə.
17 Kʋntʋ tɩn, nmʋ nan daa n ta wʋ́ pa ba cɔgɩ tɩɩnɩ dɩm maama taa, yɩ yibwənə tǝrǝ na?