Habakuki wɛ-loro kʋm
3
Wɛ-loro kʋntʋ mʋ Wɛ nijoŋnu Habakuki dɛɛn mɛ o ji ləŋə o leeni o pa Baŋa-Wɛ.2 Baŋa-Wɛ, nɔɔna taga ba brɩ-nɩ kʋlʋ maama nmʋ na kɩ tɩn.
Kʋntʋ ma pa a kwarɩ-m lanyɩranɩ.
Nan ta joori n kɩ kʋntʋ zɩm dɛ dɩm nɩ,
nɩ nmʋ dɛɛn na maŋɩ n kɩ te tɩn.
Nmʋ banɩ na maŋɩ dɩ zaŋɩ dɩ,
daa ta duri dɩ́ ŋwaŋa.
3 Baŋa-Wɛ zɩgɩ Temana nɩ mʋ DƖ bɩɩna.
Wʋ-poŋo Tu Wɛ mʋ zɩgɩ Paran pweeru tɩm seeni DƖ maa bɩɩna.
O paarɩ-zulǝ yam ma kwǝli wɛyuu kunkwǝǝnu tɩm maama.
Nabiinǝ maama laan ma pa‑DƖ zulə tɩga baŋa nɩ.
4 DƖ nyɩɩna mʋ nɩnɛɛnɩ dʋa na pɩpɩlɩ te tɩn.
Mim ma pɩpɩlɩ dɩ nuŋi DƖ jɩŋa wʋnɩ,
mɛ seeni DƖ dam dɩm na səgi tɩn.
5 DƖ paɩ yawɩɩrʋ da DƖ yigə,
yɩ tʋʋnɩ dɩ maa tɔgɩ DƖ kwaga.
6 DƖ na zɩgɩ mɛ tɩn,
tɩga kam sisiŋi mʋ.
DƖ ma nii lʋgʋ baŋa nɔɔna bam,
yɩ ba maama yɩra saɩ mʋ vagɩ vagɩ.
Faŋa faŋa pweeru tɩm ma bwəri yɩra yɩra.
Pweeru tɩlʋ DƖ dɛɛn na ve tɩ baŋa nɩ tɩn ma joori tɩ palɩsɩ.
7 Amʋ nɛ nɩ fʋʋnɩ mʋ zʋ Kusan dwi tiinə bam.
Madɩan dwi tiinə bam dɩ yɩra maa tiini ya saɩ.
8 Baŋa-Wɛ, kʋ yɩ bwi sɩm mʋ pɛ n banɩ zaŋɩ na?
Nmʋ jɩgɩ ban-lʋm nɩnɩʋ kʋm ŋwaanɩ mʋ na?
Nmʋ dɛɛn diini siseŋ-nɔɔna n vu kunkwǝǝnu tɩm baŋa nɩ,
yɩ n dɔgɩ nmʋ təriko kʋm baŋa nɩ.
Kʋ maa yɩ sɩ n ja najara n wanɩ n dʋna bam.
9 Nmʋ ma saŋɩ n taŋa kam mʋ
sɩ n ta n cɩna yam.
Nmʋ pɛ dʋa tiini ka magɩ tɩga kam,
pa nabarɩ laan durǝ.
10 Pweeru tɩm na nɛ nmʋ kǝm dɩm tɩn, tɩ sisiŋi mʋ.
Dʋa ma nuŋi wɛyuu nɩ ka cuurə tɩga nɩ.
Nɩnɩʋ kʋm dɩ maa wuurǝ dɩ dam,
yɩ na bam pɔgɩlɩ zanzan.
11 Nmʋ cɩna yam na ve dɩ fʋra
yɩ n cicwe dɩm dɩ pɩpɩlɩ tɩn,
kʋ ma pa wɩa kam dɩdaanɩ cana kam zɩgɩ cɩmm wɛyuu nɩ.
12 Nmʋ banɩ dɩm na zaŋɩ kʋntʋ tɩn,
n ve lʋgʋ baŋa maama wʋnɩ,
yɩ n laan nɔnɩ dwi-gɛ tiinə bam baŋa nɩ.
13 Nmʋ na zaŋɩ n nuŋi dɩ dam kʋntʋ tɩn,
kʋ maŋɩ sɩ n joŋi balʋ na yɩ nmʋ jɩŋa nɔɔna tɩn,
sɩ n daarɩ n vrɩ n dam-fɔrɔ tu wʋm.
N ma n cɔgɩ nɔn-balwaarʋ yigə tu wʋm,
dɩdaanɩ o kwaga kam maama.
14 O na nuŋi dɩ o jar-kərə bam sɩ o jagɩ dɩbam tɩn,
nmʋ mɛ o tɩtɩ cicwe mʋ n ma n zɔ‑o o yuu seeni,
yɩ ba ya bʋŋɩ nɩ baá wanɩ dɩbam lɩla,
nɩnɛɛnɩ nɔɔna na bɛɛsɩ nɔn-zʋra te tɩn.
15 Nmʋ nɔnɩ nɩnɩʋ kʋm baŋa nɩ dɩ n siseŋ-nɔɔna,
pa na bam pɔgɩlɩ mʋ yɩ ba zaŋɩ dɩ puŋə.
16 Amʋ ni tɩntʋ maama,
yɩ a yɩra saɩ vagɩ vagɩ.
Fʋʋnɩ tiini dɩ zʋ-nɩ lanyɩranɩ,
pa a bɩcarɩ di yɩ a yɩra nywanɩ.
Amʋ laan nan wʋ́ taa yɩ cɩmm mʋ
yɩ a cəgi sɩ Wɛ ba DƖ waarɩ balʋ na bɛɛsɩ dɩbam tɩn.
17-18 Tweeru tɩm dɩdaanɩ kara wʋdiiru na maŋɩ tɩ wʋ lǝgi biə dɩ,
amʋ daa ta wʋ́ taa jɩgɩ wʋpolo Baŋa-Wɛ ŋwaanɩ.
Peeni sɩm maama na tɩga dɩ,
yɩ naanɩ na tǝrǝ naboo kʋm wʋnɩ,
amʋ daa ta wʋ́ taa jɩgɩ wʋpolo,
Baŋa-Wɛ na cʋ amʋ tɩn ŋwaanɩ.
19 Amʋ Yuutu Baŋa-Wɛ yɩ dɩlʋ na pa-nɩ dam tɩn.
DƖ ma pa a nɛ kwaarɩ tɩga,
nɩnɛɛnɩ tɔgɔ nɛ na yɩ te tɩn mʋ.
DƖ laan cʋ-nɩ sɩ a yɩ tʋ pweeru tɩm yuu nɩ.
(Le yigə tu wʋm: Ta n ye nɩ ləŋə kantʋ maŋɩ sɩ ba ma kwaanʋ mʋ ba ma leeni-ka.)