Ninivi tɩʋ na wʋ́ tʋ te tɩn
2
Ninivi tiinə bam, á dʋna bam zɩgɩ á baŋa nɩ mʋ sɩ ba jagɩ abam yɩra yɩra. Kʋntʋ tɩn, zaŋɩ-na wɛɛnɩ, á kɩ-na á tɩtɩ á kɩ daanɩ. Fɔgɩ-na á dam je sɩm. Taá yɩrɩ-na cwǝŋǝ kam. Kɩ-na dam á kɩ á tɩtɩ kuri nɩ sɩ á kɩ najara! 2 Baŋa-Wɛ lagɩ DƖ joori DƖ pa Yisɩrayɛlɩ tiinə dɩ Zuda tiinə mʋ na nɩnwaŋa nɩ ka dɛɛn na yɩ te tɩn, dɩ ba dʋna bam na maŋɩ ba cɔgɩ ba tɩga kam dɩ ba wʋdiiru tɩm te maama tɩn dɩ.3 Jar-kərə balʋ na tu abam baŋa nɩ tɩn jɩgɩ cɩ-kwɛn dɩ gwaarʋ tɩlʋ na sɩɩnɩ cwɛ-cwɛ tɩn mʋ. Ba ti ba yigə sɩ ba kɩ najara yam! Ba jara-kǝm tərikooru luuru tɩm pɩpɩlɩ yiǝ nɩ min-vʋgʋ mʋ te. Ba maa ze ba cicwə ba zəŋi wɛɛnɩ. 4 Tərikooru tɩm tiini tɩ duri mʋ pɩmpala yam baŋa nɩ. Tɩ maa duri tɩ ve yigə dɩdaanɩ kwaga tɩʋ kʋm pooni nɩ. Tɩ pɩpɩla je maama nɩnɛɛnɩ min-zwǝǝnu mʋ te. Tɩ vəŋə kam maa nyɩ dɩ dʋa pɩpɩlɩm doŋ te. 5 Ba ma bəŋi jar-kərə dɩdɛɛra bam sɩ ba ba. Ba na duri ba maa ve tɩn mʋ ba cɔɔlɩ ba tʋ tɩga nɩ. Ba ma vu ba yi tɩʋ kʋm kəbrə kam yɩra, yɩ ba daarɩ ba kwǝli ba yum sɩ ba wanɩ ba bwəri manchoŋo ni dɩm ba zʋ tɩʋ kʋm. 6 Woŋo kʋlʋ ya na cɩgɩ bugə kam tɩn mʋ bwəri. Na bam ma cuuri ba yigi pɛ sɔŋɔ kʋm ba dɩ tɩga nɩ.a 7 Ninivi tɩʋ nɔn-biə maŋɩ sɩ ba viiri dɩ cavɩɩra! Ba lagɩ ba kalɩ-ba mʋ ba ja ba kɛ. Pɛ sɔŋɔ gamba-kanɩ sɩm laan ma keeri wʋ-cɔgɔ ŋwaanɩ. Ba maa ŋuunə nɩnɛɛnɩ kunkwənə na ŋuuni te tɩn, yɩ ba daarɩ ba magɩ ba təkərə ŋwaŋa yɩranɩ. 8 Ninivi tɩʋ kʋm nyɩ dɩ bugə kalʋ na na duri ba nuŋi yɔɔ te tɩn mʋ! Kʋ nɔn-biə bam nuŋi ba maa kɛa. Ba ma bagɩ-ba ba wɩ: ‹Zɩgɩ-na! Zɩgɩ-na!›, yɩ nɔɔn-nɔɔnʋ wʋ pipiri o joori.
9 Vrɩ-na ba lu-nyɩnnʋ wǝǝnu tɩm, dɩ ba səbu-sɩŋa wǝǝnu tɩm á ja á viiri! Tɩʋ kʋm su mʋ dɩdaanɩ wo-laarʋ. Ba jɩjɩgɩrʋ tɩm tiini tɩ jɩgɩ lʋnnɩ sɩ kʋ gaalɩ. 10 Lɛɛrʋ mʋ yi tɩʋ kʋm! Kʋ cɔgɩ mʋ Kʋ daarɩ di-dwəənu yɩranɩ. Kʋ nɔn-biə bam bɩcara diə, yɩ fʋʋnɩ zʋ-ba. Ba yɩra maa saɩ pɔm-pɔm, yɩ ba yibiyə tiini ya nywanɩ lanyɩranɩ.
11 Bɛ laan mʋ kɩ á tɩʋ kʋm? Kʋ dɛɛn nyɩ dɩdaanɩ nywəənu tigə je, yɩ nyon-biə mʋ nɛ ba wʋdiu da ba di. Nyon-bɩa dɩ nyon-kana dɛɛn tigi da dɩ ba biə ba sin yɩ fʋʋnɩ tǝrǝ. 12 Nyono yǝni kʋ gʋ ga-vara yɩ kʋ ja nwana kʋ pa kʋ biə dɩ kʋ kaana sɩ ba di ba su. Tɩʋ kʋm maama dɛɛn su dɩ jɩjɩgɩrʋ zanzan.
13 Paŋwa Tu Baŋa-Wɛ nan tagɩ DƖ wɩ: «Amʋ dʋnɩ abam mʋ. A lagɩ a zwɛ á jara-kǝm tərikooru tɩm mʋ. Á nɔn-dʋnnʋ tɩm maa wʋ́ tɩ najara wʋnɩ. Jɩjɩgɩrʋ tɩlʋ á na vrɩ nɔɔna tee nɩ tɩn daa bá daarɩ. Abam daa bá tʋŋɩ á tɩntʋŋna bam sɩ ba ja á kwǝrǝ ba vu je je.»