Lɛɛrʋ lagɩ tɩ yi Ninivi tɩʋ kʋm
3
Lɛɛrʋ lagɩ tɩ yi tɩʋ kʋm, kʋ na su dɩdaanɩ vwa-fɔra dɩdaanɩ nɔn-gʋra tɩn ŋwaanɩ. Ba jɩjɩgɩrʋ tɩm daga tɩ dwe jam. 2 Ba dʋna laan tu ba baŋa nɩ! Bantʋ fɩnɩ sɩm kɩ sɔɔ! Ba jara-kǝm tərikooru tɩm durim dɩ ba siseŋ-nɔɔna bam vəŋə kam dɩ maa dwana dɩ sɔɔ! 3 Sise diinə bam yɩra nyaagɩ mʋ! Ba sʋ-lwaanʋ dɩ ba cicwə laan maa jaanɩ wɛyuu nɩ yɩ tɩ pɩpɩla! Ba ma puuri puuri twa bam ba tiŋi daanɩ vili-vili. Nɔɔn-nɔɔnʋ maa warɩ ba ni sɩ o ga o ti. Kʋ laan ma pa jar-kərə bam nɔnɩ ba baŋa nɩ, yɩ ba cɔɔlɩ ba tʋ tɩga nɩ.4 Kʋ maama kɩa Ninivi tɩʋ kʋm kənə na nyɩ dɩ ka-tʋla kənə tɩn ŋwaanɩ mʋ. Tɩʋ kʋm tiini kʋ jɩgɩ fra nɔɔna badonnǝ tee nɩ, yɩ kʋ ta jɩgɩ liri mwaanʋ na sʋgɩ nɔɔna sɩ ba cɔgɩ tɩn. Kʋ yǝni kʋ tɔgɩ ka-tʋla kənə yantʋ baŋa mʋ kʋ ganɩ tɩɩnɩ dɩdonnǝ pa dɩ tʋ. Kʋ cɔgɩ dwi tiinə badaara dɩ kʋ liri sɩm.
5 Paŋwa Tu Baŋa-Wɛ nan tagɩ DƖ wɩ: «Amʋ dʋnɩ abam mʋ. A maa wʋ́ lɩ á gwaarʋ tɩm a daarɩ pa á zɩgɩ kalambolo. Á wʋ́ di cavɩɩra dwi tiinə badaara yigə nɩ, dɩ ba na nɛ abam kuri tɩn ŋwaanɩ. 6 Amʋ ta wʋ́ lo weeru á baŋa nɩ sɩ á lwarɩ nɩ a yáalɩ abam mʋ. Nɔɔna dɩ maa wʋ́ di tɩga á yɩra nɩ. 7 Nɔɔna balʋ maama na wʋ́ nii ba na abam tɩn wʋ́ kɔɔrɩ ba tɩtɩ mʋ ba joori kwaga yɩ ba wɩ: ‹Ninivi tɩʋ kʋm tʋ kʋ saarɩ! Wɔɔ mʋ wʋra sɩ o keeri ba luə?› Amʋ wʋ́ na nɔɔna sɩ ba zɩgɩ á kwaga nɩ na?»
8 Abam tɩʋ kʋm garɩ Ezipi tɩʋ Tebɛsɩ na?a Ba dɛɛn lɔgɩ tɩʋ kʋm kʋntʋ Nili bugə kam ni nɩ mʋ. Bugə kam ma kaagɩ tɩʋ kʋm maama ka pu nɩnɛɛnɩ kəbrə te, sɩ cam yɩ wanɩ dɩ yi-kʋ. 9 Tebɛsɩ dɛɛn nii Kusi dɩ Ezipi maama baŋa nɩ mʋ. Tɩʋ kʋm dam dɩm gaalɩ zanzan. Puti dɩ Libi tiinə maa yɩ kʋ zənzənnə. 10 Dɩ kʋntʋ maama dɩ, ba dɛɛn ta jaanɩ Tebɛsɩ tiinə bam mʋ ba kalɩ ba nuŋi ba vu tɩʋ yigə yigə. Ba ma yigi ba bu-sɩsɩn ba dɩ tɩga nɩ ba gʋ tɩʋ kʋm cwǝŋǝ yuu maama nɩ. Kʋ na yɩ tɩʋ kʋm nakwa dɩ dɩdɛɛra bam, ba dʋna ma ta jɔrɔ sɩ ba kuri ba wʋnɩ, yɩ ba daarɩ ba vɔ-ba dɩdaanɩ cɩgɩrʋ ba ja ba viiri.
11 Abam Ninivi tiinə dɩ nan lagɩ á nyɔ sa-dɛɛra bam kʋntʋ doŋ mʋ pa á bəri. Abam dɩ wʋ́ kwaanɩ sɩ á duri á lu á dʋna bam jɩŋa nɩ. 12 Á dam je sɩm á na lɔgɩ tɩn nyɩ dɩ kapʋrrʋ tɩlʋ mɔɔla na dɛ yigə tɩ bɩ tɩ yi tɩn mʋ. Ba na sugi kapʋrrʋ tɩm, mɔɔla yam wʋ́ yɔɔrɩ ya tʋ nɔɔna bam niə wʋnɩ mʋ. 13 Abam jar-kərə bam bwǝnǝ nɩ kaana doŋ mʋ. Á tɩʋ kʋm dɩ maa zɩgɩ bwəri á dʋna bam yigə nɩ. Mim mʋ lagɩ dɩ zwɛ á tɩʋ kʋm ni-bwəəru tɩm. 14 Á dʋna bam lagɩ ba kaagɩ á tɩʋ kʋm ba pu mʋ. Kʋntʋ ŋwaanɩ abam nan maŋɩ sɩ á mɔ na á zɩgɩ, sɩ á ma á ti á yigə. Ta fɔgɩ-na á kwɛ á dam je sɩm. Tiini á nɔnɩ-na tɩɩrʋ sɩ tɩ bɩ, sɩ á laan ma á magɩ wara á tiŋi! 15 Abam nan na maŋɩ á kɩ tɩte maama dɩ, mim wʋ́ zwɛ abam kulə mʋ! Á dʋna bam ta wʋ́ gʋ abam najara wʋnɩ. Ba lagɩ ba ti abam mʋ nɩnɛɛnɩ kayɩrɩ na yǝni sɩ dəlimi wʋdiiru te maama nyɔ tɩn!
Puli-na zanzan, nɩ kayɩrɩ na tiini sɩ yʋ te tɩn! 16 Á tɩʋ kʋm pipimpiinə bam tiini ba daga zanzan, sɩ kʋ dwǝni wɛyuu calɩcwɩ sɩm kɔgɔ na maɩ te tɩn. Lele kʋntʋ, ba nan daa tǝrǝ. Ba je mʋ, nɩnɛɛnɩ kayɩrɩ na di kara wʋdiu sɩ ti, yɩ sɩ laan jaanɩ sɩ viiri te tɩn. 17 Abam nakwa dɩ á dɩdɛɛra bam nyɩ dɩ kayɩrɩ mʋ na nuŋi dɩ kɔgɔ, yɩ sɩ laan vu sɩ meeli kəbrə yɩra nɩ sɩ waarʋ yɩ yi-sɩ te tɩn mʋ. Wɩa laan ma magɩ, pa maama jaanɩ sɩ je, yɩ nɔɔn-nɔɔnʋ yǝri sɩ na ve mɛ tɩn.
18 Asiiri pɛ, nmʋ tɩʋ yigǝ tiinǝ bam mʋ dɔ ba colimi. Nadunə bam dɩ maa tigi ba dɔa, yɩ ba daa bá zaŋɩ. Nmʋ nɔn-biə bam maama ma jagɩ ba yi je maama pweeru tɩm baŋa nɩ, yɩ nɔɔn-nɔɔnʋ tǝrǝ sɩ o ja-ba o joori o kɩ daanɩ. 19 Zʋnnɩ dɩlʋ n na nɛ tɩn bá wanɩ dɩ yɔɔrɩ. Nmʋ fufwələ yam bá je maŋa dɩ maŋa! Balʋ maama na ni nɩ n tɩʋ kʋm tʋ mʋ kʋ saarɩ, bantʋ wʋ́ taa caka mʋ dɩ wʋpolo, ba daarɩ ba taa magɩ ba jɩa. Bɛŋwaanɩ, abam ya na tiini á bɛɛsɩ nɔɔna te tɩn, nɔɔn-nɔɔnʋ wʋ lugi abam lwarɩm kənə wʋnɩ.