Wɛ Nijoŋnu
Nawum Tɔnɔ
1
Kwǝrǝ kantʋ dɛɛn mʋ tuǝ Ɛlkosɩ tu Nawum te Ninivi tiinə bam ŋwaanɩ. Nawum ma pʋpʋnɩ wǝǝnu tɩlʋ Wɛ na vɩɩrɩ DƖ brɩ-o tɩn o tiŋi tɔnɔ nɩ.Wɛ banɩ zaŋɩ dɩ Ninivi tiinə
2 Baŋa-Wɛ yi pagɩ DƖ nɔɔna bam baŋa nɩa. DƖ wʋ́ waarɩ balʋ na yɩ DƖ sɩbara tɩn. DƖ banɩ wʋ́ tiini dɩ zaŋɩ dɩ balʋ na vɩ-o tɩn. DƖ ta wʋ́ joori DƖ ŋwɩ DƖ jɩnɩ DƖ sɩbara baŋa nɩ. Cɩga tɩn, DƖ banɩ wʋ́ zaŋɩ DƖ dʋna baŋa nɩ yɩ DƖ bá yagɩ. 3 Baŋa-Wɛ yǝni DƖ pɩɩnɩ DƖ banɩ mʋ. DƖ dam-fɔrɔ nan gaalɩ pa DƖ yɔɔrɩ DƖ waarɩ balʋ na gɛ bʋra tɩn. Cwe sɩlʋ maama nɩ Baŋa-Wɛ na wʋ́ tɔgɩ da tɩn, vu-dɩʋ mʋ yǝni kʋ dʋla. DƖ na wʋ́ nɔnɩ mɛ maama tɩn, kunkwǝǝnu dɩ maa jaanɩ kulululu, nɩ fogo mʋ te. 4 Dɩntʋ bwɛ nɩnɩʋ kʋm nɩ kʋ wɩ: yɩ kʋ sɩɩnɩ kʋ wɩ. DƖ ta maa paɩ nabarɩ sɩm kʋra. Basan laŋa kam dɩ Karmɛlɩ piu kʋm gaarʋ tɩm maama kʋga. Liban pweeru baŋa tweeru tɩm maama dɩ ma tɩ. 5 Baŋa-Wɛ na brɩ DƖ dam dɩm, pweeru tɩm wʋ́ sisiŋi mʋ. Pu-kum sɩm maa wʋ́ yagɩ tɩ tʋ buri buri. Tɩga kam baŋa maama dɩ wʋ́ cɔgɩ, pa lʋgʋ baŋa dɩ nabiinǝ maama yɩra taa saɩ. 6 Baŋa-Wɛ banɩ na zaŋɩ, wɔɔ mʋ yi sɩ o zɩgɩ DƖ yigə nɩ? DƖ banɩ na zaŋɩ, wɔɔ daa mʋ wʋ́ wəri? DƖ na logi DƖ banɩ lʋgʋ baŋa nɩ, kandwa tɩtɩ wʋ́ cɩcʋgɩ mʋ. 7 Baŋa-Wɛ lamma mʋ. Cam na yi DƖ nɔɔna bam, DƖ maa yɩ ba dalɩm je. Kʋ na yɩ balʋ na səgi DƖ woro kʋm wʋnɩ tɩn, DƖ maa nii ba baŋa nɩ. 8 Kʋ nan na yɩ balʋ na yɩ DƖ sɩbara tɩn, DƖ lagɩ DƖ cɔgɩ-ba mʋ lɩla, nɩ dʋ-fara na cuuri ba baŋa nɩ te tɩn. DƖ ta wʋ́ zəli DƖ dʋna bam pa lim kwǝli-ba.
9 Abam jeeli sɩ á kɩ bɛɛ mʋ á ma‑á cɔgɩ Baŋa-Wɛ yigə? Dɩntʋ nan wʋ́ pa á wʋbʋŋa yam kʋntʋ je. Nɔɔn-nɔɔnʋ bá yɩ DƖ sɩbarʋ sɩ kʋ kɩ bɩle. 10 DƖ dʋna bam nyɩ dɩ sa-nyɔra mʋ. Ba ta nyɩ dɩ sabarɩ sɩlʋ na milimi daanɩ tɩn mʋ. Mim mʋ lagɩ dɩ zwɛ-ba nɩnɛɛnɩ ga-kʋrrʋ na yǝni tɩ zwɛ kulə te tɩn.
11 Ninivi tiinə bam, nɔn-balɔrɔ mʋ nuŋi abam wʋnɩ o jeeli kǝm-balɔrɔ sɩ o kɩ o cɔgɩ Baŋa-Wɛ yigə. 12 Baŋa-Wɛ kwǝrǝ mʋ tɩntʋ: «Asiirib tiinə bam na maŋɩ ba damma yɩ ba daga te dɩ, amʋ wʋ́ pa ba na cɔgɩm, pa ba jagɩ dayigǝ nɩ. A nɔɔna bam, amʋ sɩɩnɩ a pa cam yi abam. A nan daa bá kɩ kʋntʋ. 13 Lele kʋntʋ amʋ lagɩ a pa Asiiri tiinə bam dwanɩ ba jɩa á baŋa nɩ, sɩ ba daa yɩ taa bɛɛsɩ abam.»
14 Baŋa-Wɛ ta pɛ ni dɩntʋ, sɩ dɩ taa wʋra abam Asiiri tiinə bam ŋwaanɩ: «Á dwi dɩm wʋ́ je mʋ pa á yɩra saarɩ. Amʋ lagɩ a cɔgɩ á jwǝnǝ yam mʋ sɩ á daa yɩ zuli-ya ya di sɩm nɩ. A ta maa wʋ́ kɩ abam tɩga nɩ, á na yɩ nɔn-yɔɔrʋ tɩn ŋwaanɩ.»
15 Zuda tiinə bam, nii-na pweeru tɩm seeni! Tɩntʋŋnʋ mʋ maa bɩɩna. O nɛ sɩm nɔnɩ pweeru tɩm yuu nɩ yɩ wʋpolo dɩ yazurə taanɩ wʋ o ni nɩ.c Kʋntʋ ŋwaanɩ, taá di-na á candi yam, sɩ á daarɩ á kɩ kʋlʋ á na goni ni dɩ Baŋa-Wɛ sɩ á kɩ tɩn. Nɔn-balwaarʋ tɩm tɩntʋ daa bá wanɩ ba zaŋɩ najara dɩ abam, Wɛ na wʋ́ cɔgɩ-ba DƖ ti tɩn ŋwaanɩ.