Zonasɩ laan sɛ Wɛ ni
3
Baŋa-Wɛ daa ma ŋɔɔnɩ dɩ Zonasɩ DƖ kɩ bɩle DƖ wɩ: 2 «Nan zaŋɩ n vu Ninivi na yɩ tʋ-fɔrɔ tɩn, sɩ a laan pa‑m a kwǝrǝ sɩ n tɔɔlɩ-ka n pa kʋ nɔɔna bam.»3 Zonasɩ ma sɛ Baŋa-Wɛ ni yɩ o daarɩ o vu Ninivi. Tɩʋ kʋm kʋntʋ tiini kʋ yalma yɩ ba kwe da yatɔ mʋ ba maa kaagɩ kʋ ni maama. 4 Zonasɩ na ve dɛ wʋnɩ vəŋə tɩʋ kʋm wʋnɩ tɩn, mʋ o puli sɩ o taa tɔɔlɩ taanɩ dɩm yɩ o wɩ: «Da fiinna mʋ daarɩ sɩ Baŋa-Wɛ cɔgɩ Ninivi tɩʋ kʋm fasɩ!»
5 Ninivi tiinə bam ma sɛ Wɛ kwǝrǝ kam.a Ba ma tɔɔlɩ sɩ nɔɔna maama vɔ ni sɩ ba daarɩ ba zʋ gwar-zɩnzwara, sɩ kʋ brɩ ba wʋ-cɔgɔ kʋm. Nɔɔna maama maŋɩ sɩ ba kɩ kʋntʋ doŋ mʋ, kʋ na yɩ nɔn-kamunə naa nabwənə dɩ.
6 Ba pɛ wʋm na ni kwǝrǝ kam tɩn, o ma zaŋɩ o daarɩ o paarɩ yituŋu kʋm. O ma lɩ o paarɩ gwaarʋ o tiŋi dáa nɩ yɩ o lɛ gwar-zɩnzwara. O ma daarɩ o vu o je tɩntwarɩm wʋnɩ. 7 O laan ma tɔɔlɩ o brɩ Ninivi tiinə o wɩ: «Ni dɩntʋ nuŋi Pɛ dɩ o nakwa tee nɩ mʋ: Nɔɔn-nɔɔnʋ ba maŋɩ sɩ o di kʋlʋkʋlʋ. Kʋ na yɩ nabiinǝ, naa naanɩ, naa sɔŋɔ vara dwi maama, kʋ culǝ sɩ ba di wʋdiu naa ba nyɔ na. 8 Nabiinǝ wʋ́ zʋ gwar-zɩnzwara mʋ, sɩ ba daarɩ ba kwe gwar-zɩnzwara ba vɔ ba vara yɩra nɩ. Nɔɔna maama maŋɩ sɩ ba sɩɩnɩ yiǝ mʋ ba loori Wɛ lanyɩranɩ, yɩ ba vɩn ba tɩtʋŋ-lwaannʋ dɩ ba vuvugə kənə yam. 9 Dɛ dɩlʋ dɩ́ na kɩ kʋntʋ, Wɛ wʋ́ sɛ sɩ DƖ ləri DƖ wʋbʋŋa, sɩ DƖ ban-lʋm daa yɩ taa wʋ dɩ́ baŋa nɩ sɩ dɩ́ tɩ.»
10 Baŋa-Wɛ dɛɛn maanɩ ba kənə yam dɩ ba na yagɩ ba tɩtʋŋ-lwaannʋ tɩm tɩn. DƖ ma sɩɩnɩ o duri ba ŋwaŋa yɩ DƖ wʋ vaŋɩ ba zwa nɩ DƖ ya na tagɩ nɩ DƖ wʋ́ kɩ te tɩn.b