Zonasɩ warɩ Wɛ
2
Zonasɩ dɛɛn maa wʋ kaləŋə kam pugə wʋnɩ, yɩ o warɩ o Tu Baŋa-Wɛ o wɩ:2 «Amʋ Tu, amʋ na wʋ cam nɩ tɩn,
a bəŋi nmʋ yɩrɩ yɩ n sɩɩnɩ n ləri-nɩ.
Twa gugwəəru je sɩm nɩ kuri kuri mʋ
a keeri a lagɩ zənə n tee nɩ,
yɩ n ni a kərə kam.a
3 N dʋlɩ-nɩ n dɩ na canluŋu nɩnɩʋ kuri nɩ cɩga cɩga,
mɛ na bam na kaagɩ-nɩ ba pu tɩn.
N na-caŋna bam dɩ n na-wuurə maama duri ba da amʋ baŋa mʋ.
4 Amʋ ya bʋŋɩ nɩ n zəli-nɩ n yigə nɩ mʋ,
pa a daa yɩ na nmʋ tɩtɩ digə kam dɛ dɩ dɛ. b
5 Na bam kwəli-nɩ yɩ ba kaagɩ-nɩ.
Nɩnɩʋ kʋm dɩ ma pu amʋ maama.
Na wʋnɩ gaarʋ tɩm dɩ dɛɛn jujugi amʋ yuu maama.
6 A ma tu na wʋnɩ a dwe pulwaarʋ kurə,
mɛ cwǝŋǝ na tǝrǝ sɩ nɔɔnʋ wanɩ o lu maŋa dɩ maŋa tɩn.
Amʋ Tu Baŋa-Wɛ, nmʋ nan jaanɩ-nɩ,
yɩ a nuŋi goŋo wʋnɩ dɩ a ŋwɩa.
7 A na tu a maanɩ nɩ a tʋʋnɩ yi dɩ ti tɩn,
mʋ a guli Baŋa-Wɛ gulə
yɩ a kɩ wɛ-loro sɩ n joŋi-nɩ.
Nmʋ ma n sɩɩnɩ n zɩgɩ n tɩtɩ digə kam nɩ
n ni a loro kʋm.
8 Jwǝnǝ yɩ wo-yɔɔrʋ mʋ.
Balʋ maama na zuli-ya tɩn
dʋlɩ ba cɩga dɩ nmʋ mʋ ba yagɩ.
9 Amʋ nan wʋ́ taa leeni tiə le mʋ a pa‑m.
A ta wʋ́ kwe kaanɩm mʋ a pa‑m,
sɩ a daarɩ a kɩ kʋlʋ a na goni ni sɩ a kɩ a pa‑m tɩn.
Baŋa-Wɛ yɩ dɩlʋ na paɩ nɔɔna na vrɩm tɩn mʋ!»
10 Kʋntʋ maama kwaga nɩ mʋ, Baŋa-Wɛ laan ŋɔɔnɩ dɩ kaləŋə kam sɩ ka vu ka twɩ Zonasɩ dɩ dɩ buburu baŋa nɩ. Ka ma sɩɩnɩ ka vu ka kɩ kʋntʋ.