Wɛ Nijoŋnu
Zonasɩ Tɔnɔ
Zonasɩ vɩn Wɛ ni
1
Baŋa-Wɛ dɛɛn mʋ ŋɔɔnɩ dɩ Amitayi bu Zonasɩ o wɩ:a 2 «Zaŋɩ n vu Ninivi tʋ-fɔrɔ kʋm n ta n kaanɩ kʋ nɔɔna bam wɩ: ba lwarɩm dɩm gaalɩ amʋ yigə nɩ.»3 Zonasɩ ma vɩn yɩ o zaŋɩ o duri sɩ o vu Tarsisi. O dɛɛn ve Zope mʋ sɩ o na nɛ naboro na maa ve je sɩm kʋntʋ, sɩ o duri o lu Baŋa-Wɛ yigə nɩ. O laan ma ŋwɩ o səbu, yɩ o da o zʋ naboro kʋm nɩ.
4 Baŋa-Wɛ ma pa vu-dɩʋ zaŋɩ kʋ magɩ na bam zanzan. Viu kʋm na tiini kʋ fufugi kʋntʋ tɩn, naboro kʋm maa ga fɩɩn sɩ kʋ bwəri. 5 Fʋʋnɩ ma tiini dɩ ja naboro kʋm coonə bam, yɩ ba dɩdʋa dɩdʋa puli o tɔɔlɩ o loori o tɩʋ Wɛ sɩ dɩ joŋ-o dɩ yagɩ. Ba ma daarɩ ba dʋlɩ ba zɩla ba yagɩ na bam nɩ sɩ naboro kʋm taa poonə.
Zonasɩ dɛɛn nan ya tu naboro kʋm kuri gugoro nɩ mʋ o tigi da, yɩ o dɔ o kɛ. 6 Coonə bam yigə tu wʋm ma vu o na‑o, yɩ o bwe‑o o wɩ: «Bɛɛ mʋ yɩ nmʋ tigi n dɔa? Nmʋ dɩ zaŋɩ n bəŋi n Wɛ yɩrɩ, sɩ dɛdoŋ dɩntʋ wʋ́ duri dɩ́ ŋwaŋa, sɩ dɩ́ yɩ maŋɩ na bantʋ wʋnɩ.»
7 Naboro coonə bam ma bam daanɩ ba wɩ: «Pa-na sɩ dɩ́ ta jɔrɔ sɩ dɩ́ lwarɩ wʋlʋ ŋwaanɩ cam dɩntʋ na yi dɩbam tɩn.» Ba na tagɩ tɩn, kʋ ma ja Zonasɩ. 8 Ba ma bwe‑o ba wɩ: «Ta n tɛa, wɔɔ mʋ pɛ lwarɩm dɩntʋ ba dɩbam baŋa? Bɛɛ tɩtʋŋɩ mʋ nmʋ jɩga sɩ n tʋŋɩ yo? Nmʋ nuŋi yən mʋ? Nmʋ dwi yɩ dɔɔ mʋ?»
9 Zonasɩ ma ləri o wɩ: «Amʋ yɩ Ebru dwi tu mʋ. Amʋ nan tɔgɩ Yuutu Baŋa-Wɛ dɩlʋ na te wɛyuu yɩ DƖ kwǝri DƖ kɩ tɩga baŋa dɩ nɩnɩʋ maama tɩn mʋ.» 10 Ba na ni kʋntʋ tɩn, fʋʋnɩ dɛɛn ma tiini dɩ ja nɔɔna bam. Bɛŋwaanɩ, Zonasɩ ya maŋɩ o ta o brɩ-ba nɩ o kwaanɩ sɩ o duri o lu Baŋa-Wɛ yigə nɩ mʋ. Ba ma bwe‑o ba wɩ: «Bɛɛ mʋ yɩ nmʋ kɩ kǝm dɩntʋ?»
11 Naboro coonə bam ma bwe‑o ba wɩ: «Bɛɛ mʋ dɩ́ wʋ́ kɩ dɩ nmʋ sɩ nɩnɩʋ kʋm maŋɩ dá yirr?» Viu kʋm dɛɛn yɔɔrɩ kʋ taa tiini kʋ dana kʋ pa-ba mʋ pa ba bwe‑o kʋntʋ. 12 Zonasɩ ma ləri o wɩ: «Ja-na amʋ á dʋlɩ á dɩ nɩnɩʋ kʋm wʋnɩ, sɩ kʋʋ́ kɩ maŋɩ dá yirr kʋ pa abam. Kʋ yɩ cɩga, amʋ yigə mʋ pɛ abam zʋ vu-dɩʋ kʋntʋ wʋnɩ.»
13 Ba maa wʋ sɛ yɩ ba ya ta kwaanɩ ba yuŋə dɩ ba dam maama sɩ naboro kʋm wanɩ kʋ bɛ buburu baŋa, yɩ ba warɩ. Viu kʋm ma fufugi yɩ kʋ fɔgɩ kʋ tiini kʋ dana kʋ ja gaalɩ. 14 Ba ma tɔɔlɩ ba bəŋi Baŋa-Wɛ yɩrɩ ba wɩ: «Popo, Yuutu Baŋa-Wɛ! Dɩ́ loori‑m, yɩ cɔgɩ dɩbam dɩ́ na lagɩ dɩ́ lɩ nɔɔnʋ wʋm ŋwɩa tɩn ŋwaanɩ. Bɛŋwaanɩ, nmʋ na wʋ pɛ cwǝŋǝ, tɩntʋ maama bá kɩ.» 15 Nɔɔna bam ma dʋlɩ Zonasɩ ba dɩ nɩnɩʋ kʋm wʋnɩ, yɩ kʋ dɩ maŋɩ dá yirr bɩdwɩ baŋa nɩ. 16 Ba na nɛ kʋlʋ maama na kɩ tɩn, mʋ Wɛ fʋʋnɩ zʋ-ba lanyɩranɩ. Ba ma kwe kaanɩm ba kɩ ba pa Baŋa-Wɛ, yɩ ba ta goni ni sɩ ba taa zuli‑DƖ.
17 Kʋ nan na yɩ Zonasɩ, Baŋa-Wɛ tʋŋɩ kaləŋə kamunu mʋ pa ka ba ka li‑o. O maa wʋ kaləŋə kam wʋnɩ da yatɔ wɩa dɩ tɩtɩ maama.b