Zonasɩ banɩ zaŋɩ Wɛ yibwənə ŋwaanɩ
4
Zonasɩ na nɛ kʋntʋ tɩn, o wʋ dɛɛn ma fuli zanzan, yɩ o banɩ zaŋɩ. 2 O ma warɩ Baŋa-Wɛ o wɩ: «Amʋ Tu Baŋa-Wɛ, amʋ ya ta na wʋ a tɩtɩ tɩʋ nɩ tɩn, a maŋɩ a lwarɩ nɩ tɩntʋ mʋ wʋ́ kɩ. Kʋntʋ ŋwaanɩ mʋ a nan maŋɩ a kwaanɩ sɩ a duri a vu Tarsisi tɩn. Bɛŋwaanɩ, amʋ ye nmʋ na yɩ sono tu Wɛ, yɩ n tiini n jɩgɩ nɔɔna ŋwaŋa te tɩn. N ma n yǝni n pɩɩnɩ n banɩ yɩ n ləri n wʋbʋŋa sɩ n yɩ cɔgɩ nɔɔna. 3 Amʋ Tu Baŋa-Wɛ, nan yagɩ sɩ a tɩ, sɩ a tʋʋnɩ garɩ a ŋwɩa.» 4 Baŋa-Wɛ ma bwe‑o DƖ wɩ: «Wɔɔ mʋ pɛ‑m cwǝŋǝ sɩ n pa n banɩ zaŋɩ kʋntʋ doŋ?»5 Zonasɩ na ni kʋntʋ tɩn, o ma nuŋi tɩʋ kʋm wʋnɩ o vu kʋ wa-puli seeni o te pwəŋə o je ka kuri nɩ. O laan maa je ka woro nɩ o cǝgǝ sɩ o nii kʋlʋ na wʋ́ kɩ Ninivi tɩʋ kʋm tɩn. 6 Yuutu Baŋa-Wɛ ma pa tiu doŋ nuŋi kʋ bɩ lɩla kʋ kwǝli pwəŋə kam maama pa woro wʋra lanyɩranɩ. Kʋ ma pa Zonasɩ zurim yɩ o jɩgɩ wʋpolo dɩ tiu kʋm vɔɔrʋ.
7 Tɩga na yi yɩ ka joori ka pʋʋrɩ tɩn, Wɛ ma pa kanzwɛ dɩdoŋ ba dɩ dʋnɩ tiu kʋm pa kʋ kwaarɩ kʋ tɩ maama. 8 Wɩa na bɩga tɩn, Wɛ ma tʋŋɩ dʋ-viu sɩ kʋ zɩgɩ wa-puli seeni kʋ ba kʋ magɩ Zonasɩ yuparɩ baŋa. O yuu maa wɔɛ. O dɛɛn gɛ fɩɩn mʋ sɩ o bəri, wɩ-dɛa kam ŋwaanɩ. O ma tiini o bʋŋɩ o beeri tʋʋnɩ, yɩ o wɩ: «A tʋʋnɩ maŋɩ dɩ garɩ a ŋwɩa.»
9 Wɛ daa ma bwe‑o DƖ wɩ: «Cwǝŋǝ kɔ mʋ n jɩga sɩ n pa n banɩ zaŋɩ tiu kʋm ŋwaanɩ?» Zonasɩ ma ləri o wɩ: «Cwǝŋǝ wʋra cɩga cɩga sɩ a banɩ zaŋɩ zanzan. Kʋ na maŋɩ kʋ yɩ sɩ a tɩ dɩ, a jɩgɩ cɩga.»
10 Baŋa-Wɛ ma ta dɩd-o DƖ wɩ: «Kʋ na yɩ tiu kʋm, tɩtɩ dɩdʋa nɩ mʋ a pɛ kʋ zaŋɩ kʋ bɩ. A daa ma pa kʋ je tɩtɩ dɩdoŋ nɩ. Nmʋ wʋ kɩ kʋlʋkʋlʋ n pa-kʋ, sɩ kʋ maa zaŋɩ kʋ bɩ. Bɛɛ mʋ yɩ n wʋ cɔgɩ kʋ ŋwaanɩ? 11 Kʋ nan na yɩ Ninivi tɩʋ nɔɔn-biə bam, a na duri ba yibwənə, kʋ daɩ kʋ cwǝŋǝ nɩ na? Kʋ yɩ tʋ-fɔrɔ kʋlʋ nɔɔna na dwe mʋrrʋ bi dɩ fiinle balʋ na warɩ ba pɔɔrɩ lam dɩ lwarɩm daanɩ tɩn mʋ. Ba varɩ-kɔgɔ kʋm dɩ maa tiini kʋ gaalɩ. Kʋntʋ, a sɩɩnɩ a jɩgɩ cwǝŋǝ sɩ a taa jɩgɩ ba ŋwaŋa.»