Wɛ Nijoŋnu
Abdɩasɩ Tɔnɔ
Lɛɛrʋ na wʋ́ yi Edɔm tiinə te tɩn
1
Yuutu Baŋa-Wɛ na vɩɩrɩ wǝǝnu tɩlʋ o brɩ Abdɩasɩ yɩ tɩ yɩ Edɔm tiinə yɩra taanɩ tɩn mʋ tɩntʋ:aDɩ́ ni kwǝrǝ kantʋ Baŋa-Wɛ tee nɩ mʋ. DƖ tʋŋɩ nɔɔnʋ sɩ o vu lʋgʋ baŋa tɩɩnɩ dɩm wʋnɩ mʋ sɩ o ta o wɩ: «Zaŋɩ-na sɩ dɩ́ vu dɩ́ zaŋɩ najara dɩdaanɩ Edɔm tiinə bam.»
Baŋa-Wɛ nan tagɩ tɩntʋ mʋ dɩ Edɔm tiinə bam:
2 «Nii yo! Amʋ lagɩ a pa á tɩʋ kʋm mʋ tiini kʋ taa bwǝnǝ tɩɩnɩ dɩm maama wʋnɩ. Nɔɔna wʋ́ taa jɩgɩ abam ba tiini ba yáala. 3 Abam brɩ á tɩtɩ kamunni. Á nan jɩgɩ á tɩtɩ mʋ á gana. Á zʋʋrɩ pweeru bɔɔna wʋnɩ, dɩdaanɩ pweeru tɩm yuu nɩ wɛ wɛ. Á bʋŋɩ á wʋnɩ wɩ: nɔɔn-nɔɔnʋ bá wanɩ abam o vaarɩ o dɩ tɩga nɩ. 4 Abam na maŋɩ á din wɛyuu, nɩnɛɛnɩ kaloŋ-zɔŋɔ na jaanɩ wɛ wɛ te tɩn, naa á na lagɩ á sɔ pogo calɩcwɩ sɩm tɩtarɩ nɩ dɩ, amʋ ta wʋ́ vaarɩ abam a dɩ tɩga nɩ.»b
Baŋa-Wɛ na tagɩ te tɩn mʋ kʋntʋ.
5 «Lɛɛrʋ mʋ wʋ á baŋa nɩ! Ŋwɩɩna na tu á sɔŋɔ sɩ ba ŋɔ tɩtɩɩ nɩ, ba bá ŋɔ wǝǝnu tɩlʋ yɩranɩ ba na beeri tɩn mʋ na? Nɔɔna na tu sɩ ba gwəri vinyə tiu biə, ba yǝni ba ba gwəri ba daarɩ tiu biə badonnǝ na? 6 Kʋ nan na yɩ Esayu dwi tiinə bamc, á dʋna wʋ́ beeri ba vɛɛsɩ á je sɩm maama nɩ ba vrɩ wǝǝnu tɩlʋ maama na jɩgɩ kuri tɩ pa abam tɩn mʋ ba daarɩ abam. 7 Á doonə bam tɩtɩ mʋ lagɩ ba zəli abam sɩ á nuŋi á duri á daarɩ á tɩga kam. Balʋ na goni ni dɩ abam tɩn tɩtɩ lagɩ ba lɔ á kwaga nɩ mʋ sɩ ba wanɩ abam ba di. Á cilon-sonnu tɩm wʋ́ cɩ cɩkʋ sɩ ba ma ba ja abam, yɩ á yǝri kʋ ni nɩ.»
8 Baŋa-Wɛ ta ma ta DƖ wɩ:
«Dɩntʋ dɛ dɩm na yiǝ, amʋ wʋ́ cɔgɩ swan tiinə balʋ maama na zʋʋrɩ Edɔm nɩ tɩn, dɩdaanɩ yi-pʋrɩ-nyɩna na wʋ Esayu pweeru tɩmd seeni tɩn. 9 Kʋ na yɩ nɔn-bɩbɛ sɩlʋ na zʋʋrɩ Teman tɩʋ wʋnɩ tɩn, fʋʋnɩ wʋ́ ja-ba. Kʋ daarɩ balʋ maama na yɩ Esayu dwi dɩm tɩn wʋ́ je mʋ.»
Esayu dwi tiinə na cɔgɩ Zakɔbɩ dwi tiinə te tɩn
10 «Abam dɛɛn tiini á kɩ wo-balɔrɔ dɩ á cʋrrʋ tɩm na yɩ Zakɔbɩ dwi dɩm tɩn yɩ á gʋ-ba. Kʋntʋ ŋwaanɩ mʋ abam wʋ́ di á cavɩɩra, yɩ á daarɩ á na cɔgɩm sɩ kʋ taa ve maŋa maama. 11 Vərə dɛɛn na tu ba fɩn ba zʋ Zeruzalɛm tɩʋ wʋnɩ sɩ ba vrɩ kʋ jɩjɩgɩrʋ ba ja ba viiri tɩn, á zɩgɩ mʋ á niə yɩ á wʋ cɩgɩ-ba. Vərə bam kʋntʋ na pɔɔrɩ wǝǝnu tɩm ba pa daanɩ tɩn, abam dɩdaanɩ bantʋ maama maŋɩ á ba garɩ daanɩ.e
12 Abam yaa wʋ maŋɩ sɩ á taá mwanɩ á caka dɩ lɛɛrʋ na yi á cʋrrʋ tɩm te tɩn.
Abam yaa wʋ maŋɩ sɩ á taá jɩgɩ wʋpolo dɩdaanɩ Zuda tiinə bam na nɛ cɔgɩm te tɩn.
Abam yaa wʋ maŋɩ sɩ á taá magɩ á nyɔɔna dɩ bantʋ cam dɩm.f
13 Abam yaa wʋ maŋɩ sɩ á tɔgɩ á zʋ amʋ nɔɔna bam tɩʋ kʋm wʋnɩ
dɛ dɩlʋ wʋnɩ ba na nɛ ba lɛɛrʋ tɩm tɩn.
Abam yaa wʋ maŋɩ sɩ á taá jɩgɩ Zuda tiinə bam á mwana
dɩ ba na nɛ cam dɩlʋ ba lɛɛrʋ dɛ dɩm nɩ tɩn.
Abam yaa wʋ maŋɩ sɩ á tɔgɩ á pɛ ba jɩjɩgɩrʋ á taá te
ba lɛɛrʋ dɛ dɩm nɩ.
14 Abam yaa wʋ maŋɩ sɩ á zɩgɩ cwǝ-pʋpwɩa yam nɩ sɩ á gʋ balʋ na duri sɩ ba lu najara yam wʋnɩ tɩn.
Abam yaa wʋ maŋɩ sɩ á ja balʋ ta na daarɩ tɩn á kɩ ba dʋna bam jɩŋa nɩ
ba cam dɛ dɩm nɩ.»
Baŋa-Wɛ sarɩya dɛ dɩm lagɩ dɩ yi
15 «Amʋ Baŋa-Wɛ dɛ dɩm lagɩ dɩ yi sɩ a di lʋgʋ baŋa dwi maama taanɩ. Edɔm tiinə bam, á dɩ wʋ́ na á nyɩm, nɩnɛɛnɩ á na kɩ nɔɔna badonnǝ te tɩn. Á kǝm-balwaarʋ tɩm lagɩ tɩ joori tɩ tʋ á tɩtɩ yuu nɩ mʋ. 16 Abam dɛɛn na wʋ amʋ tɩtɩ piu kʋm yuu nɩ yɩ á nyɔ sana á su te tɩn, kʋntʋ doŋ mʋ dwi-gɛ tiinə bam dɩ wʋ́ su dɩ a ban-zɔŋɔ kʋm. Baá tiini ba nyɔ taa ba su, pa ba yɩra laan yagɩ lʋgʋ baŋa nɩ. 17 Kʋ daarɩ Siyɔn piu kʋm nɩ mʋ nɔɔna wʋ́ na vrɩm. Je sɩm kʋntʋ wʋ́ taa yɩ lanyɩranɩ fasɩ sɩ pa-nɩ. Zakɔbɩ dwi tiinə bam wʋ́ joori ba joŋi ba tɩga kam balʋ na vrɩ-ka tɩn tee nɩ ba taa te. 18 Zakɔbɩ dwi dɩm wʋ́ cɔgɩ ba dʋna nɩ mim na zwɛ wǝǝnu te tɩn mʋ. Zʋzɛfʋ dwi tiinə bam wʋ́ taa nyɩ dɩ min-vʋgʋ mʋ. Baá di Esayu dwi tiinə bam kulə, nɩ mim na yǝni dɩ zwɛ ga-kʋrrʋ te tɩn. Nɔɔn-nɔɔnʋ daa bá daarɩ Esayu dwi tiinə bam wʋnɩ.»
Baŋa-Wɛ mʋ tagɩ kʋntʋ.
19 Yisɩrayɛlɩ tiinə balʋ na zʋʋrɩ Negɛbɩ seeni kagʋa kam nɩ tɩn mʋ wʋ́ zʋ Esayu pweeru je sɩm nɩ ba taa zʋʋrɩ da. Balʋ dɩ na zʋʋrɩ wa-zʋʋrɩ seeni bwəəlu tɩm nɩ tɩn maa wʋ́ joŋi Filisi tiinə tɩga kam ba taa te. Ba ta wʋ́ joŋi Efrayim laŋa kam dɩ Samari laŋa kam. Bɛnzamɛn dwi dɩm wʋ́ joŋi Galadɩ laŋa kam ba taa te. 20 Yisɩrayɛlɩ tiinə balʋ maama ya na jagɩ tɩn wʋ́ joori ba zʋ Kaanan tɩga kam. Ba kɔgɔ kʋm wʋ́ jǝni tɩga kam maama nɩ sɩ kʋ vu kʋ yi Sarɛpta. Zeruzalɛm tiinə balʋ na jagɩ yɩ ba wʋ Sefaradɩ nɩ tɩn dɩ wʋ́ vu ba jǝni tɩɩnɩ dɩlʋ na wʋ Negɛbɩ seeni kagʋa kam nɩ tɩn. 21 Babɛ sɩlʋ na joŋi ba nɔɔna ba yagɩ tɩn mʋ wʋ́ di Siyɔn piu kʋm yuu. Baá taa te Esayu pweeru laŋa kam maama. Kantʋ maŋa kam nɩ, Baŋa-Wɛ mʋ wʋ́ di paarɩ DƖ nɔɔna baŋa nɩ.