Tɩtɔgɔ na su dɩ tiu biə tɩn maana
8
Yuutu Baŋa-Wɛ daa ma lɩ woŋo kʋdoŋ o brɩ-nɩ. Amʋ ma nii a na tɩtɔgɔ yɩ tiu biə na bɩgɩ tɩn ya su kʋ ni. a 2 DƖ ma bwe-nɩ DƖ wɩ: «Amɔsɩ, bɛɛ mʋ n nɛa?» Amʋ ma ləri a wɩ: «Tɩtɔgɔ mʋ a nɛa, yɩ kʋ su dɩ tiu biə na bɩgɩ tɩn.»Baŋa-Wɛ laan maa wɩ:
«A nɔɔna Yisɩrayɛlɩ tiinə bam kənə laan bɩgɩ ya yi sɩ a vaŋɩ ba zwa. Amʋ nan daa ba yagɩ ba lwarɩm a ma cɛ-ba. 3 Maŋa kam kʋntʋ na yiǝ, pɛ sɔŋɔ wʋpolo le sɩm wʋ́ ji kərə mʋ. Twa wʋ́ taa tigi tɩʋ kʋm je maama nɩ, yɩ ba daarɩ ba zɩŋɩ-ba ba ja nuŋi cɩmm.»
Yuutu Baŋa-Wɛ mʋ tagɩ kʋntʋ.
Yisɩrayɛlɩ tiinə lɛɛrʋ tɩm taanɩ
4 Abam balʋ na pini nabwənə
yɩ á vrɩ ba wǝǝnu tɩn,
kʋ wǝli dɩ abam balʋ na yaarɩ
á tɩʋ kʋm yinigə tiinə
pa ba cɔgɩ ba ti tɩn,
cəgi-na!
5 Abam yǝni á ta á wɩ: «Dɩ́ lagɩ sɩ Wɛ siun dɛ dɩm naa can-dʋŋa candiə kam ti lɩla sɩ dɩ́ joori dɩ́ vu dɩ́ kwe dɩ́ mɩna yam dɩ́ taa yǝgǝ. Dɩ́ maa wʋ́ kwe bwɛ sɩlʋ na muri tɩn dɩ́ ma pini dɩ́ yəllə bam dɩ́ joŋi ba sǝbiǝ zanzan. 6 Dɩ́ ta wʋ́ kwe mɩna yalʋ na gwaanɩ dɩ swannʋ tɩn dɩ́ laan yəgi-ya dɩ́ joŋi səbu zanzan. Dɩ́ ta waɩ dɩ́ beeri yinigə tu wʋlʋ na warɩ o jɩnɩ o ŋwɩ tɩn, sɩ dɩ́ yəgi kʋ tu dɩ́ ma dɩ́ ji dɩ́ gambaa, o jɩnɩ dɩm na maŋɩ dɩ maɩ dɩ o naga natra yam yɩranɩ.»
7 Baŋa-Wɛ na yɩ dɩlʋ Zakɔbɩ dwi tiinə na jɩgɩ DƖ tɩɩna tɩn, DƖ mɛ DƖ tɩtɩ yɩrɩ mʋ DƖ du durə DƖ wɩ:
«Amʋ brɩ a bá fɔgɩ a swe wo-balwaarʋ tɩlʋ ba na kaagɩ ba kɩ tɩn. 8 Ba kənə yam kʋntʋ wʋ́ pa tɩga kam ziziŋi. Nɔɔna balʋ maama na zʋʋrɩ tɩga kam nɩ tɩn wʋ maa wʋ́ cɔgɩ. Tɩga kam je maama wʋ́ ziziŋi ka zaŋɩ wɛɛnɩ yɩ ka daarɩ ka tʋ, nɩnɛɛnɩ Nili bugə kam na yǝni ka pɛɛlɩ yɩ ka tʋɩ te Ezipi nɩ tɩn.»
9 Yuutu Baŋa-Wɛ ta ma ta DƖ wɩ:
«Maŋa kam kʋntʋ na yiǝ, a lagɩ a pa wɛ vu dɩ zʋ wɩa tɩtarɩ nɩ, pa lim-nyɔrɩsɩ taa wʋ je maama nɩ wɩa maŋa nɩ. 10 A maa wʋ́ pipiri abam candi dim sɩ ya ləri ya ji lwi. Á wʋpolo le sɩm dɩ wʋ́ ji lusəm. Abam wʋ́ zʋ gwar-zɩnzwara, yɩ á daarɩ á ceeri á yum wʋ-cɔgɔ ŋwaanɩ. Á maa wʋ́ tiini á keeri sɩ kʋ taa nyɩ dɩ nɔɔnʋ na gɛ o bu-dʋa yɩ o keeri o bu wʋm luə te tɩn. Dɩ dɛ na yiǝ, kʋʋ́ tiini kʋ taa camma kʋ paɩ abam!»
11 Yuutu Baŋa-Wɛ ta maa wɩ:
«Nii-na! Maŋa lagɩ ka yi yɩ a pa kana ba lʋgʋ baŋa. Kana kam kʋntʋ bá taa yɩ nɔɔna na gɛ wʋdiu sɩ ba di naa ba gɛ na sɩ ba nyɔ tɩn ŋwaanɩ. Kʋ nan wʋ́ taa yɩ nɩ ba gɛ amʋ Baŋa-Wɛ taanɩ mʋ sɩ ba ni. 12 Tɩga kam je maama nɩ mʋ nɔɔna wʋ́ taa kaagɩ ba lagɩ Baŋa-Wɛ taanɩ sɩ ba cəgi. Kʋ zɩgɩ Yɛ nɩnɩʋ kʋm seeni sɩ kʋ vu kʋ yi Mediterane nɩnɩʋ kʋm, kʋ ta wǝli dɩ tɩga kam baŋa seeni dɩ ka wa-puli seeni maama, baá beeri je maama kʋntʋ sɩ ba nii ba ga wʋ́ ni Wɛ kwǝrǝ mʋ yɩ ba nan bá na-ka.