Kayɩra taanɩ
7
Yuutu Baŋa-Wɛ na lɩ kʋlʋ DƖ brɩ-nɩ tɩn mʋ tɩntʋ:Dɛ dɩdwɩ ba na zagɩ pɛ wʋm mɩna ba ti, yɩ karɩ sɩm wʋdiiru tɩdonnǝ ta wʋra tɩ kwi tɩn, mʋ Wɛ tʋŋɩ kayɩra sɩ sɩ ba sɩ cɔgɩ tɩga kam. 2 Amʋ ma nii a na nɩ kayɩra sɩm dəlimi wo-lɛɔ dwi maama na wʋ tɩga kam nɩ tɩn mʋ nyɔ! Amʋ laan maa wɩ: «Yuutu Baŋa-Wɛ, popo, yagɩ n ma n cɛ n nɔɔna bam! Nmʋ na wʋ kɩ kʋntʋ, Zakɔbɩ dwi dɩm daa bá wanɩ ba wəri, ba na tiini ba bwǝnǝ tɩn ŋwaanɩ.»
3 Baŋa-Wɛ ma sɛ yɩ DƖ ləni DƖ wʋbʋŋa. DƖ maa wɩ: «Nmʋ na nii n na te tɩn daa bá kɩ.»
Mim taanɩ
4 Yuutu Baŋa-Wɛ daa na vɩɩrɩ kʋlʋ DƖ brɩ-nɩ tɩn mʋ tɩntʋ:
Amʋ nɛ wɩ Yuutu Baŋa-Wɛ bʋŋɩ sɩ DƖ tarɩgɩ min-lɔŋɔ DƖ ma waarɩ DƖ nɔɔna bam. Mim dɩm ma di nɩnɩʋ kʋm maama nyɔ, yɩ dɩ laan wʋra dɩ di tɩga kam. 5 Amʋ laan maa wɩ: «Yuutu Baŋa-Wɛ, a loori‑m sɩ n yagɩ! N na wʋ yagɩ kʋntʋ, Zakɔbɩ dwi dɩm daa bá wanɩ ba wəri, ba na tiini ba bwǝnǝ tɩn ŋwaanɩ.»
6 Yuutu Baŋa-Wɛ daa ma ləni o wʋbʋŋa yɩ o wɩ: «Nmʋ na nii n na te tɩn dɩ daa bá kɩ.»
Lwara ŋʋna taanɩ
7 Wɛ daa ta na lɩ kʋlʋ DƖ brɩ-nɩ tɩn mʋ tɩntʋ:
Amʋ nii a na kəbrə kalʋ lwara bam na kwe ŋʋna ba ma lɔ-ka ba fɔgɩ ba zɩgɩ dəki tɩn mʋ. A ta ma na nɩ Baŋa-Wɛ zɩgɩ ka təŋə nɩ yɩ DƖ ze lwara ŋʋna kam DƖ jɩŋa nɩ. 8 Baŋa-Wɛ ma bwe-nɩ DƖ wɩ: «Amɔsɩ, bɛɛ mʋ n nɛa?» Amʋ ma ləri a wɩ: «Amʋ nɛ lwara ŋʋna mʋ.»
O laan maa wɩ: «Amʋ wʋ́ kwe lwara ŋʋna kantʋ mʋ a maŋɩ a nɔɔna Yisɩrayɛlɩ tiinə bam sɩ kʋ brɩ nɩ ba ba zɩgɩ cɩga cɩga. Amʋ nan daa bá yagɩ ba lwarɩm a ma cɛ-ba. 9 Amʋ lagɩ a cɔgɩ je sɩlʋ maama Yizakɩ dwi tiinə bam na diini ba kɩ kaanɩm tɩn mʋ. Yisɩrayɛlɩ tiinə wara-je sɩlʋ na yɩ lanyɩranɩ fasɩ tɩn maama wʋ́ ji di-dwəənu mʋ. Amʋ ta wʋ́ zaŋɩ a tɔgɩ najara baŋa nɩ a cɔgɩ Pɛ Zeroboam paarɩ dɩm.»
Amɔsɩ dɩdaanɩ Amasia taanɩ
10 Amasia dɛɛn yɩ kaanɩm tu mʋ Betɛlɩ nɩ. Wʋntʋ ma tʋŋɩ kwǝrǝ o pa Yisɩrayɛlɩ tiinə pɛ Zeroboam o wɩ: «Amɔsɩ jɩgɩ nmʋ bɩtar-balɔrɔ mʋ o ŋɔɔna dɩbam Yisɩrayɛlɩ tiinə tɩʋ kʋm tɩtarɩ nɩ. O ni-taanɩ dɩm lagɩ dɩ sʋgɩ nɔɔna bam pa ba lɔ nmʋ kwaga nɩ mʋ. 11 O maa ta o wɩ: ‹Zeroboam wʋ́ tɩ najara wʋnɩ, sɩ ba daarɩ ba ja Yisɩrayɛlɩ tiinə bam ba nuŋi ba tɩtɩ tɩʋ kʋm wʋnɩ ba kalɩ ba vu sa-tɩʋ kʋdoŋ.› »
12 Amasia laan ma tʋŋɩ o ta dɩ Amɔsɩ o wɩ «Wɛ nijoŋnu, kʋ maŋɩ kʋntʋ! Laan joori n vu n tɩtɩ tɩʋ Zuda, sɩ n ta n ŋɔɔnɩ daanɩ. Nmʋ ma n wʋ́ ta n naɩ n ni-wʋdiu da. 13 Daa n yɩ ŋɔɔnɩ Betɛlɩ yo seeni. Je sɩntʋ yɩ pɛ wʋm tɩtɩ wara-je mʋ, yɩ dɩ́ tɩʋ kʋm maama zuli da!»
14 Amɔsɩ ma ləri Amasia o wɩ:
«Amʋ maŋɩ a daɩ nijoŋnu! A wʋ nuŋi nijoŋnə sɩlʋ na ŋɔɔnɩ ŋwɩɩrʋ ŋwaanɩ tɩn kɔgɔ kʋm wʋnɩ. Amʋ yɩ nayɩrʋ mʋ! A maa kalɩ a vara. A ta maa nii kapʋrrʋ baŋa nɩ yɩ a pʋrɩ kapɩra yam. 15 Baŋa-Wɛ ma lɩ-nɩ a vara bam kwaga nɩ, yɩ DƖ ta DƖ wɩ: a ve a ŋɔɔnɩ a brɩ wʋm nɔɔna Yisɩrayɛlɩ tiinə bam.a
16 Nan cəgi Baŋa-Wɛ kwǝrǝ kam!
Nmʋ mʋ tagɩ n wɩ:
a yɩ ŋɔɔnɩ a cɔgɩ Yisɩrayɛlɩ tiinə bam,
sɩ a yɩ tɔɔlɩ kwər-lɔŋɔ a pa-ba.
17 Baŋa-Wɛ ni dɩm mʋ tɩntʋ:
Amasia, nan lwarɩ sɩ n kaanɩ
wʋ́ ji ka-boro
o taa kaagɩ tɩʋ kʋm nɩ
o beeri baara.
Nmʋ biə bam wʋ́ tɩ najara wʋnɩ,
bəkəri dɩ bɩsankam sɩm maama.
Ba maa wʋ́ pɔɔrɩ nmʋ tɩga kam
ba pa nɔɔna badonnǝ.
Nmʋ tɩtɩ nan wʋ́ tɩ dwi-gɛ tɩʋ nɩ.
Ba maa wʋ́ sɩɩnɩ ba ja
Yisɩrayɛlɩ tiinə bam ba nuŋi
ba tɩtɩ tɩʋ kʋm wʋnɩ
ba kalɩ ba vu sa-tɩʋ kʋdoŋ.»