Yisɩrayɛlɩ dwi dɩm na wʋ́ na lɛɛrʋ tɩlʋ tɩn
6
Abam balʋ na zʋʋrɩ Siyɔn nɩyɩ á di ywəəni tɩn,
lɛɛrʋ yi abam!
Abam balʋ na zʋʋrɩ Samari piu yuu nɩ dɩ bɩcar-zuri tɩn,
lɛɛrʋ yi abam!
Abam paɩ á yɩ nɔn-kamunə
á tʋ-fɔrɔ kʋm nɩ.
Yisɩrayɛlɩ dwi tiinə yǝni ba tui abam te ba loori zǝnǝ.
2 Ve-na Kalne tɩʋ kʋm
á nii kʋ na yɩ te tɩn.
Ve-na Hamatɩ tʋ-fɔrɔ kʋm,
á daarɩ á kɛ Gatɩ tɩʋ kʋm
Filisi tiinə na zʋʋrɩ mɛ tɩn.
Abam tɩɩnɩ dɩm garɩ
tɩɩnɩ dɩm kʋntʋ na?
Abam laŋa kam yalma ka dwe
bantʋ nyɩm na?
3 Á ba jǝni á jeeli nɩ
cɔgɩm wʋ́ ba abam baŋa.
Abam kənə maama nan vaŋɩ lɛɛrʋ dɛ dɩm mʋ
pa dɩ twɛa.
4 Á yǝni á ma tuu yəli
á kwɛ á gadoru tɩm
pa tɩ lana zanzan.
Á laan maa tigi á kʋnkwallʋ tɩm nɩ á sin ywəəni yɩranɩ.
Á yǝni á dʋnɩ pəlbiə nwana,
dɩ na-pwalɩ nwana mʋ á sui.
5 Abam soe sɩ á taá leeni lən-dʋʋra,
yɩ á taɩ á kwaanʋ,
nɩnɛɛnɩ Pɛ Davidi
dɛɛn na leeni te tɩn.
6 Abam maa soe sɩ á taá nyɔ sana zanzan á sui.
Á maa yǝni á kwe tralɩ nugə kalʋ na jɩgɩ səbu tɩn
á ma á turi á yɩra.
Á yigə nan tǝrǝ dɩ Zʋzɛfʋ dwi dɩm na wʋra dɩ cɔga te tɩn.
7 Kʋntʋ ŋwaanɩ baá da yigə mʋ
ba ja abam
ba nuŋi á tɩʋ kʋm wʋnɩ
ba kalɩ ba vu sa-tɩʋ kʋdoŋ.
Abam yɩra na zʋʋra te tɩn,
dɩ á ywəəni dɩm maama
wʋ́ je mʋ bɩdwɩ baŋa nɩ!
8 Yuutu Baŋa-Wɛ dugi DƖ tɩtɩ yɩrɩ ŋwaanɩ DƖ ta kʋntʋ mʋ.
Paŋwa Tu Baŋa-Wɛ maa wɩ:
«A wʋ mʋ nuŋi Zakɔbɩ dwi dɩm dɩ ba na paɩ ba tɩtɩ kamunni te tɩn.
A yigə tǝrǝ dɩ ba sɔ-fwaarʋ tɩm!
Amʋ wʋ́ kwe ba tɩʋ kamunu kʋma
dɩ ba jɩjɩgɩrʋ tɩm maama
a kɩ ba dʋna jɩŋa nɩ.»
9 Nɔɔna fugə na daarɩ sɔŋɔ kʋlʋ wʋnɩ yɩ ba səgi da, ba maama wʋ́ tɩ. 10 Tʋ wʋm cʋrʋ kʋlʋ na tu sɩ o nii o luə tɩtʋŋa baŋa nɩ tɩn na zʋ sɔŋɔ kʋm sɩ o kwe tʋ wʋm o ja nuŋi, oó bwe nɔɔnʋ wʋlʋ yɩranɩ na wəri yɩ o səgi sɔŋɔ kʋm gugoro wʋnɩ tɩn o wɩ: «Nɔɔnʋ daa tɔgɩ o wʋ nmʋ tee nɩ na?» Nɔɔnʋ wʋm maa wʋ́ ləri o wɩ: «Awo!» Tʋ wʋm cʋrʋ kʋm laan maa wʋ́ ta wɩ: «Yɩ kɩ sɔɔ! Yɩ zaŋɩ n bəŋi Baŋa-Wɛ yɩrɩ, sɩ DƖ wʋ́ ni n kwǝrǝ!»
11 Nii-na! Baŋa-Wɛ lagɩ DƖ pa ni mʋ,
sɩ DƖ pa sɔ-kamunə dɩ sɔ-balwa
maama mumugi murə-murə.
12 Siseŋ-nɔɔna waɩ sɩ soe
pweeru gugwəəru nɩ na?
Ba nan waɩ ba kwe naanɩ
ba varɩ nɩnɩʋ wʋnɩ na?
Kʋntʋ maama warɩ kʋ kɩ.
Abam nan pɛ cɩga kam ləni
ka ji cɔŋɔ,
yɩ lanyɩranɩ kǝm ji wo-cɛɛrɩ.
13 Abam ta brɩ á tɩtɩ á wɩ:
á magɩ najara dɩ Lodebarɩ tɩʋ kʋm á wanɩ-ba.b
Á ta kwǝri á wɩ:
«Dɩbam mɛ dɩ́ dam mʋ
dɩ́ di Karenayim tɩʋ kʋm!»c
14 Paŋwa Tu Baŋa-Wɛ nan tagɩ DƖ wɩ:
«Yisɩrayɛlɩ dwi dɩm, amʋ lagɩ a pa
tɩʋ kʋdoŋ dwi tiinə mʋ
zaŋɩ ba zaŋɩ najara dɩ abam.
Nɔɔna bantʋ wʋ́ tiini ba bɛɛsɩ abam
á tɩga kam maama wʋnɩ,
kʋ zɩgɩ Lebo-Hamatɩ nɩ,
sɩ kʋ taa ve Araba bugə kam na wʋ mɛ tɩn.»d