Yisɩrayɛlɩ tiinə na maŋɩ sɩ ba ləri ba wʋ te tɩn
5
Yisɩrayɛlɩ dwi tiinə bam, cəgi-na, sɩ a lagɩ a leeni abam luə lusəm ləŋə mʋ:2 «Yisɩrayɛlɩ dwi dɩm nyɩ dɩ busankan-pwələ na tʋ tɩga nɩ tɩn mʋ.
O daa bá zaŋɩ.
O tigi tɩga nɩ
yɩ nɔɔn-nɔɔnʋ yǝri kʋ ni nɩ,
sɩ o ja-o sɩ o zaŋɩ.»
3 Yuutu Baŋa-Wɛ daa ta maa wɩ:
«Abam tɩʋ dɩdʋa na pɛ nɔɔna mʋrrʋ
nuŋi ba vu ba zaŋɩ najara,
nɔɔna bi yɩranɩ mʋ wʋ́ joori
yɩ ba ŋwɩ.
Á tɩʋ kʋdoŋ na pɛ
nɔɔna bi nuŋi,
nɔɔna fugə yɩranɩ mʋ wʋ́ joori.»
4 Baŋa-Wɛ maa ta dɩ Yisɩrayɛlɩ dwi dɩm DƖ wɩ:
«Joori-na á ba amʋ te
sɩ á taá ŋwɩ.a
5 Nan yɩ taá kaagɩ á beeri amʋ je
Betɛlɩ nɩ.
Yɩ taá ve-na Giligalɩ.
Yɩ beeri-na á vu Bɛɛr-Seba dɩ.
Kʋ nan na yɩ Giligalɩ,
baá ja kʋ nɔn-biə
ba kalɩ ba vu sa-tɩʋ kʋdoŋ.
Kʋ ta na yɩ Betɛlɩ tiinə,
lɛɛrʋ mʋ wʋ́ yi-ba.»
6 Nan titwəni-na á yi Baŋa-Wɛ te
sɩ á taá ŋwɩ!
Á na wʋ sɛ sɩ á joori,
Wɛ banɩ wʋ́ zaŋɩ
Zʋzɛfʋ dwi dɩm baŋa nɩ,
yɩ DƖ daarɩ DƖ cɔgɩ-ba
nɩ mim na zwɛ wǝǝnu te tɩn.
Betɛlɩ maama mʋ wʋ́ cɔgɩ,
yɩ nɔɔn-nɔɔnʋ bá wanɩ o dwe mim dɩm.
7 Lɛɛrʋ wʋ́ ba abam baŋa nɩ,
á na yǝni á pipiri cɩga kam
pa ka ji vwan tɩn ŋwaanɩ.
Cɩga kam daɩ kʋlʋkʋlʋ
ka paɩ abam!
8 Baŋa-Wɛ mʋ kɩ calɩcwɩ
dwi dwi DƖ kikili daanɩ.b
Dɩntʋ mʋ paɩ tɩtɩɩ ləri
kʋ jiri tɩ-pʋra.
DƖ maa paɩ wɩa jiri tɩtɩɩ.
Dɩntʋ mʋ yǝni DƖ koori
nanɩɩrʋ tɩm na bam
DƖ joori DƖ lo tɩga kam baŋa nɩ.
DƖ yɩrɩ mʋ Baŋa-Wɛ.
9 DƖ yǝni o paɩ cɔgɩm tui
dɩdɛɛra baŋa nɩ mʋ lɩla,
yɩ DƖ daarɩ DƖ cɔgɩ ba dam je sɩm.
10 Abam nan culi balʋ na di taanɩ
dɩ cɩga tɩn mʋ,
á ta maa vaɩ balʋ na ta cɩga tɩn
ni-taanɩ.
11-12 Abam bɛɛsɩ yinigə tiinə,
yɩ á fɩn-ba sɩ ba kwe ba mɩna
ba ma ŋwɩ lampoo zanzan.
Amʋ ye abam lwarɩm yam
na daga te,
dɩ á na tiini á cɔgɩ
amʋ niə yam te tɩn.
Kʋntʋ ŋwaanɩ á bá taá zʋʋrɩ
sɔ-fwaarʋ tɩlʋ á na lɔgɩ tɩn wʋnɩ.
Kʋ na yɩ vinyə tweeru á na dugi
á kadwi sɩm wʋnɩ
yɩ dɩ tiini dɩ lana tɩn,
á daa bá nyɔ dɩ tweeru biə sana bam.
Abam daanɩ nɔn-ŋʋna
yɩ á fɩn-ba sɩ á joŋi dim.
Á maa yǝni á vrɩ yinigə tiinə
dɩ ba bʋra.
13 Kʋntʋ ŋwaanɩ, wʋbʋŋa tiinə
wʋ́ taa yɩ cɩmm,
Bɛŋwaanɩ, kʋ yɩ lwarɩm maŋa mʋ.
14 Yagɩ-na tɩtʋŋ-lwaannʋ kǝm,
á daarɩ á taá kɩ wo-laarʋ,
sɩ á taá ŋwɩ.
Kʋ maa wʋ́ pa Paŋwa Tu Baŋa-Wɛ taa wʋ abam tee nɩ,
nɩnɛɛnɩ abam na yǝni á taɩ te tɩn.
15 Taá culi lwarɩm á daarɩ
á taá soe kʋlʋ na lamma tɩn.
Á nakwa bam maŋɩ sɩ
ba taa tɔgɩ cɩga mʋ
dɩ ba na di nɔɔna taanɩ te tɩn.c
Dɛ dɩlʋ, Paŋwa Tu Baŋa-Wɛ
wʋ́ duri á ŋwaŋa,
abam balʋ na daarɩ
yɩ á yɩ Zʋzɛfʋ dwi dɩm tɩn.
16 Abam na tusi tɩn ŋwaanɩ, dɩ́ Yuutu Paŋwa Tu Baŋa-Wɛ na tagɩ te mʋ tɩntʋ:
«Nɔɔna kərə wʋ́ zaŋɩ
tɩʋ kʋm pwələ maama nɩ.
Baá taa keeri ba wɩ:
‹Lɛɛrʋ! Lɛɛrʋ!›.
Ba ta wʋ́ warɩ vala bam
sɩ ba taa tɔgɩ ba keerǝ
kʋ wǝli dɩ balʋ na waɩ lusəm
ba leeni tɩn.
17 Wʋpolo bá taa wʋ á karɩ sɩm maama wʋnɩ,
kərə yɩranɩ mʋ wʋ́ taa wʋra,
amʋ na wʋ́ tɔgɩ abam tɩtarɩ nɩ
a waarɩ abam tɩn ŋwaanɩ.»
Baŋa-Wɛ mʋ tagɩ kʋntʋ.
Baŋa-Wɛ dɛ-kamunu kʋm taanɩ
18 Abam balʋ na jɩgɩ tɩɩna
sɩ Baŋa-Wɛ sarɩya dɛ dɩm
ba dɩ yi tɩn,
lɛɛrʋ taa wʋ á yuu nɩ!
Bɛŋwaanɩ mʋ á lagɩ
sɩ Baŋa-Wɛ dɛ dɩm ba?
Dɛ dɩm kʋntʋ wʋ́ taa yɩ lim-nyɔrɩsɩ mʋ
dɩ paɩ abam,
sɩ dɩ bá ja pooni dɩ ba.
19 Kʋʋ́ taa yɩ nɩnɛɛnɩ nɔɔnʋ na duri sɩ o lu nyoŋo jɩŋa nɩ te tɩn mʋ.
O ma duri o vu o jeeri ga-naad
na cəŋ‑o tɩn.
O ma daarɩ o vu o yi sɔŋɔ sɩ
o daŋɩ o jɩŋa kəbrə baŋa nɩ,
yɩ tɩga wo-vəlu laan dʋn‑o
o jɩŋa seeni!
20 Cɩga tɩn, Baŋa-Wɛ sarɩya dɛ dɩm
wʋ́ taa yɩ lim-nyɔrɩsɩ dɩdaanɩ lim mʋ.
Pooni bá taa wʋra dɩ fɩnfɩɩn dɩ.
Wɛ na culi wǝǝnu tɩlʋ tɩn
Baŋa-Wɛ maa wɩ:
21 «Amʋ culi abam na yǝni á di
candi yalʋ maama amʋ ŋwaanɩ tɩn.
Amʋ yi ba sui dɩ abam na jeeri daanɩ sɩ á zuli-nɩ te tɩn.e
22 Abam na jaanɩ zwɛɛm pɛɛra
naa wʋdiu pɛɛra
sɩ á ba á kaanɩ á pa-nɩ,
amʋ bá joŋi-ya.
Kʋ ta na yɩ wo-vallʋ biə balʋ
á na maŋɩ sɩ á kɩ yazurə kaanɩm
á pa-nɩ tɩn,
amʋ yigə tǝrǝ dɩ-ya.
23 Ja-na á tiə le sɩm á vu daa!
Sɩ yɩ sɔɔ mʋ amʋ zwa wʋnɩ.
Á na kwe kwaanʋ
sɩ á ma á tee amʋ yɩrɩ,
amʋ bá cəgi abam le sɩm,
dɩ sɩ na maŋɩ sɩ ywəmmə
te maama dɩ.
24 Nan pa-na sɩ cɩga bʋrɩm
dɩ lanyɩranɩ kǝm taa wʋra
maŋa maama,
nɩ bu-tʋla na duri ka veǝ
yɩ ka ba wɩ te tɩn.
25 Yisɩrayɛlɩ dwi tiinə bam, bɩna fiinna yalʋ abam dɛɛn na wʋ kagʋa kam wʋnɩ yɩ á zuli-nɩ tɩn, kʋ daɩ vara bam naa pɛɛra yam á na kwe á ma á kɩ kaanɩm á pa-nɩ tɩn ŋwaanɩ mʋ á kɩ kʋntʋ. 26 Abam laan nan jɩgɩ á jwǝnǝ yalʋ abam tɩtɩ na mɔɔnɩ-ya tɩn á zɩŋɩ á maa kɛa. Á maa bǝi ya dɩdʋa nɩ abam pɛ Sakuti. Dɩdoŋ dɩm maa yɩ á jwəm Kewanɩ, á na zuli-dɩ nɩ calɩcʋa te tɩn. 27 Á na zuli jwǝnǝ yantʋ tɩn ŋwaanɩ, amʋ wʋ́ ja abam a nuŋi á tɩʋ kʋm wʋnɩ a kalɩ a vu je sɩlʋ na gaalɩ Damasɩ tɩn.»f
Yuutu Baŋa-Wɛ dɩm, DƖ yɩrɩ na yɩ Paŋwa Tu Baŋa-Wɛ tɩn mʋ tagɩ kʋntʋ maama.