4
Cəgi-na a taanɩ dɩm, abam kaana balʋ na nuŋi Samari tɩn. Á na nugi te tɩn nyɩ dɩ Basan naanɩ dɩm mʋ. Abam yǝni á daanɩ nabwənə, yɩ á bɛɛsɩ yinigə tiinə. Á ta daarɩ á fɩn á banna sɩ ba pa abam sana sɩ á nyɔ á su.2 Yuutu Baŋa-Wɛ na yɩ wʋ-poŋo tu tɩn nan dugi dɩ DƖ tɩtɩ mʋ DƖ wɩ:
«Maŋa lagɩ ka yi sɩ nɔɔna zi abam ba vaŋɩ á mʋmwa ba ja kɛ. Baá vaŋɩ á maama ba ja kɛ nɩ ba na mɛ gwəli ba ja kale te tɩn. 3 Baá lɩ abam á sam dɩm nɩ ba ja tɔgɩ kabri sɩm na bwəri mɛ tɩn laŋa nɩ ba kɛ ba dɩ abam ba yagɩ Hɛrmɔn seeni.»
Baŋa-Wɛ mʋ tagɩ kʋntʋ.
Yisɩrayɛlɩ tiinə na yǝni ba vɩn Wɛ ni dɩm te tɩn
4 «Nan taá tu-na Betɛlɩ sɩ á vɩn Wɛ ni! Ve-na ɡiligalɩ dɩ, sɩ á vɩn Wɛ ni á daŋɩ da-baŋa nɩ! Kwaanɩ-na á taá zuli Wɛ nɩ á na lagɩ sɩ á kɩ te tɩn. Á lagɩ sɩ á kwe á vara á ma á kaanɩ á pa Wɛ zɩzɩŋa maama. Á lagɩ sɩ á ja á Wɛ-təri pɛɛra yam á ba á pa Wɛ da yatɔ maama. 5 Kwe-na dɩpɛ á ja á ba sɩ á pa Wɛ sɩ kʋ taa yɩ abam le kǝm. Kʋ daarɩ á wʋ-yoŋo pɛɛra yam, á maŋɩ sɩ á magɩ á nyɔɔna ya ŋwaanɩ sɩ nɔɔna maama lwarɩ á na kɩ te tɩn. Wǝǝnu tɩlʋ abam Yisɩrayɛlɩ tiinə bam na lagɩ sɩ á taá kɩ tɩn mʋ kʋntʋ.»
Yuutu Baŋa-Wɛ mʋ tagɩ kʋntʋ.
6 «Amʋ nan mʋ pɛ kana zʋ á tɩɩnɩ dɩm maama wʋnɩ. Dɩ kʋ dɩ, á ta ba sɛ sɩ á joori amʋ te.»
Baŋa-Wɛ mʋ tagɩ kʋntʋ.
7 «Canɩ sɩtɔ ta na daarɩ sɩ á pɩ á wʋdiiru tɩn, amʋ pɛ dʋa wʋ nɩgɩ yɩ á wʋdiiru cɔgɩ. Amʋ pɛ dʋa nɩ tɩʋ dɩdʋa nɩ yɩ ka wʋ nɩgɩ kʋdoŋ nɩ. Ka ta nɩgɩ kara dɩdʋa nɩ yɩ wʋdoŋ mɩna kwaarɩ kwaarɩ. 8 Nɔɔna ma nuŋi ba tɩʋ wʋnɩ ba karɩ tɩɩnɩ dɩdonnǝ ba lagɩ na sɩ ba nyɔ, yɩ na bam wʋ yi ba nyɔɔm. Abam nan ta ba sɛ sɩ á joori amʋ te.»
Baŋa-Wɛ mʋ tagɩ kʋntʋ.
9 «Amʋ ta pɛ yawɩɩrʋ ba tɩ cɔgɩ abam karɩ sɩm wʋdiiru. Kayɩra maa yǝni sɩ di á tweeru maama, pa á kapʋrrʋ tɩm dɩ á Olivi tweeru biə dɩ á vinyə tweeru biə bam maama cɔgɩ. Abam nan ta ba sɛ sɩ á joori amʋ te.»
Baŋa-Wɛ mʋ tagɩ kʋntʋ.
10 «Amʋ pɛ yawɩ-cɛɛrʋ ba abam baŋa, nɩ amʋ dɛɛn na kɩ te a ma a cɔgɩ Ezipi tiinə bam faŋa faŋa tɩn. Amʋ pɛ á nɔn-dʋnnʋ tɩ najara wʋnɩ, yɩ nɔɔna kalɩ á siseŋ-nɔɔna bam maama ba ja ba viiri. Twa yɩra lwəm ma zaŋɩ dɩ su á na tigi mɛ maama tɩn. Abam nan ta ba sɛ sɩ á joori amʋ te.»
Baŋa-Wɛ mʋ tagɩ kʋntʋ.
11 «Amʋ cɔgɩ abam badonnǝ nɩ a na cɔgɩ Sodɔm dɩ Gomɔrɩ tiinə te tɩn.a Abam balʋ na daarɩ yɩ á wəri tɩn dɛɛn joŋi á ŋwɩa nɩ daa kalʋ na jaanɩ mim yɩ ba lɩ-ka dɩ wʋnɩ te tɩn. Abam nan ta ba sɛ sɩ á joori amʋ te.»
Baŋa-Wɛ mʋ tagɩ kʋntʋ.
12 «Yisɩrayɛlɩ tiinə bam, nan lwarɩ-na nɩ amʋ lagɩ a waarɩ abam kʋntʋ doŋ mʋ. Amʋ nan na lagɩ a tʋŋɩ kʋntʋ á yɩra nɩ tɩn ŋwaanɩ, ti-na á yigə sɩ á ba á zɩgɩ amʋ yigə nɩ.»
13 Nii-na!
Baŋa-Wɛ yɩ dɩlʋ na naanɩ pweeru tɩm.
DƖ ma daarɩ DƖ pa viu zaŋɩ kʋ dʋla.
DƖ ma pɔɔrɩ DƖ wʋbʋŋa DƖ pa nabiinǝ lwarɩ ya na yɩ te tɩn.
DƖ paɩ tɩ-pʋra ləri ka jiri lim.
Dɩntʋ mʋ nuŋi pweeru baŋa nɩ
DƖ ve DƖ kaagɩ lʋgʋ baŋa maama.
Kʋ nan yɩ Paŋwa Tu Baŋa-Wɛ mʋ kɩ kʋntʋ!