Yisɩrayɛlɩ tiinə maŋɩ waarɩm
3
Yisɩrayɛlɩ dwi tiinə bam, cəgi-na taanɩ dɩlʋ Baŋa-Wɛ na maŋɩ sɩ DƖ ta tɩn. Kʋ yɩ taanɩ dɩlʋ DƖ na ŋɔɔnɩ DƖ pa abam dwi dɩm maama DƖ na kalɩ DƖ ja nuŋi Ezipi tɩʋ nɩ tɩn mʋ. DƖ maa wɩ:2 «Amʋ kuri abam yɩranɩ mʋ a lɩ dwi maama na wʋ lʋgʋ baŋa nɩ tɩn wʋnɩ, yɩ a nii á baŋa nɩ. Kʋntʋ ŋwaanɩ mʋ amʋ maŋɩ sɩ a waarɩ abam á kǝm-balwaarʋ tɩm ŋwaanɩ.»
3 Nɔɔna bale wʋ́ taa ve daanɩ yɩ ba wʋ ŋɔɔnɩ ba maŋɩ daanɩ na?
4 Nyoŋo na wʋ zi woŋo, kʋʋ́ suuri gaa nɩ na?
Nyoŋo-balaŋa na wʋ jaanɩ woŋo, kʋʋ́ taa ŋuuni kʋ tigə je nɩ na?
5 Nɔɔnʋ na wʋ cɩgɩ cɩkʋ o tiŋi, kʋʋ́ wanɩ zuŋə kʋ ja na?
Cɩkʋ nan waɩ kʋ da kʋ faŋɩ wɛɛnɩ yɩ kʋlʋkʋlʋ tǝrǝ sɩ kʋ ja na?
6 Ba na wugi tigurə nabɔnɔ tɩʋ wʋnɩ, fʋʋnɩ bá ja nɔɔna bam na?
Baŋa-Wɛ na wʋ pɛ cwǝŋǝ, cɔgɩm wʋ́ wanɩ dɩ ba tɩʋ wʋnɩ na?
7 Kʋ yɩ cɩga mʋ, Yuutu Baŋa-Wɛ bá kɩ woŋo yɩ DƖ wʋ lɩ DƖ bʋbʋŋɩ dɩm kʋntʋ DƖ brɩ DƖ tɩntʋŋna balʋ na yɩ o nijoŋnə tɩn.
8 Nyoŋo nan sɩɩnɩ kʋ suuri! Wɔɔ mʋ bá taa kwarɩ fʋʋnɩ?
Yuutu Baŋa-Wɛ nan ŋɔɔnɩ ja! Wɔɔ mʋ wʋ́ vɩn sɩ o tɔɔlɩ DƖ taanɩ dɩm?a
Samari tɩʋ cɔgɩm
9 Nan tɔɔlɩ-na kwǝrǝ sɩ ka yi balʋ na zʋʋrɩ Ezipi dɩ Asedodi sɔ-fwaarʋ tɩm wʋnɩ tɩn wɩ: «Jeeri-na daanɩ Samari pweeru tɩm yuu nɩ sɩ á nii á lwarɩ wo-yɔɔrʋ dɩ lwarɩm dɩlʋ Yisɩrayɛlɩ tiinə bam na kɩ ba pa daanɩ tɩn.» 10 Yuutu Baŋa-Wɛ ma ta DƖ wɩ: «Nɔɔna bantʋ yǝri cɩga cwǝŋǝ tɔgɩm. Ba yǝni ba vrɩ nɔɔna wǝǝnu dɩ dam ba ve ba sui ba sɔ-fwaarʋ tɩm. 11 Kʋntʋ ŋwaanɩ ba dʋna wʋ́ ba ba gilimi ba tɩʋ kʋm pa ba cɔgɩ ba dam je sɩm yɩ ba vrɩ ba jɩjɩgɩrʋ ba sɔ-fwaarʋ tɩm wʋnɩ.»
12 Baŋa-Wɛ ni dɩm mʋ tɩntʋ:
«Nyoŋo na jaanɩ piə sɩ kʋ di, nayɩrʋ wʋ́ kwaanɩ sɩ o joŋi piə kam kʋ ni nɩ, kʋ na maŋɩ kʋ yɩ ka nɛ sɩle dɩ ka zwa cicoro yɩranɩ dɩ. Kʋ nan yɩ bɩdwɩ mʋ dɩ Yisɩrayɛlɩ tiinə balʋ na zʋʋrɩ Samari wʋnɩ tɩn. Ba na maŋɩ ba na vrɩm, ba jɩjɩgɩrʋ fɩnfɩɩn yɩranɩ mʋ wʋ́ daarɩ, nɩnɛɛnɩ jangɔŋɔ naga cicoro naa pɔlɔ na zarɩmɩ te tɩn.»b
13 Paŋwa Tu Baŋa-Wɛ maa wɩ:
«Cəgi-na, sɩ á kaanɩ Zakɔbɩ dwi tiinə bam nɩ: 14 Dɛ dɩm amʋ na wʋ́ waarɩ Yisɩrayɛlɩ tiinə bam ba lwarɩm yam ŋwaanɩ tɩn, amʋ wʋ́ cɔgɩ Betɛlɩ kaanɩm bimbinə yam yɩ a pa ya nyɩa yam maama bwəri ya tʋ tɩga nɩ.c 15 Amʋ wʋ́ yɔɔrɩ a cɔgɩ ba sam dɩm maama. Kʋ na yɩ sɔŋɔ kʋlʋ ba na lɔgɩ tɩʋ kamunu wʋnɩ naa tɩʋ balaŋa wʋnɩ tɩn, dɩ kʋlʋ ba na kwe tuu yələ ba ma kwɛ tɩn dɩ, amʋ wʋ́ cɩcʋgɩ ba sɔ-fwaarʋ tɩm maama.»
Baŋa-Wɛ mʋ tagɩ kʋntʋ.