Moabɩ tiinə taanɩ
2
Baŋa-Wɛ ni dɩm mʋ tɩntʋ:«Moabɩ tɩʋ kʋm nɔɔna yǝni ba tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba yáalɩ Edɔm tɩʋ pɛ
dɩ ba na puri o yibeeli dɩm,
yɩ ba ta zwɛ o kwi
pa sɩ ji tɩntwarɩm tɩn.
2 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim ja
Moabɩ tɩʋ kʋm maama
yɩ dɩ daarɩ dɩ zwɛ
Kiriyɔtɩ dam je sɩm.
Jar-kərə bam ta na wʋra
ba tɔɔlɩ tiguri-kaasa,
yɩ ba wu nabwaanʋ tɩn,
mʋ Moabɩ tiinə bam wʋ́ tɩ
najara wʋnɩ.
3 Amʋ wʋ́ ba a gʋ Moabɩ tiinə
pɛ wʋm
dɩ ba tɩʋ kʋm dɩdɛɛra maama.»
Baŋa-Wɛ mʋ tagɩ kʋntʋ.
Zuda tiinə taanɩ
4 Baŋa-Wɛ ni dɩm mʋ tɩntʋ:
«Zuda tiinə bam tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba gooni amʋ Baŋa-Wɛ zaasɩm dɩm
yɩ ba wʋ sɛ a niə yam.
Ba tɔgɩ wa yalʋ ba nabaara
dɛɛn na tɔgɩ tɩn,
yɩ ya ganɩ-ba pa ba ywəri
amʋ cwǝŋǝ kam nɩ.
5 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim ja
Zuda tɩɩnɩ dɩm
yɩ dɩ zwɛ Zeruzalɛm dam je sɩm.»
Yisɩrayɛlɩ tiinə taanɩ
6 Baŋa-Wɛ ni dɩm mʋ tɩntʋ:
«Sɩ abam, Yisɩrayɛlɩ tiinə bam, á yǝni á tiini á kɩ lwarɩm á daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a yaarɩ abam.
Jɩna ŋwaanɩ mʋ Yisɩrayɛlɩ tiinə
jɩgɩ nɔn-ŋʋna ba yǝgǝ,
pa ba ji gambɛ.
Ba ta ma yəgi nabwənə balʋ
na warɩ ba naga natra jɩna
ba ŋwɩ tɩn.
7 Ba ta nii yinigə tiinə mʋ
sɩ ba taa yɩ kafɛ,
nɩnɛɛnɩ nɔɔna na nɔnɩ
tɩga kasʋlʋ baŋa nɩ te tɩn.
Ba maa yǝni ba cɩ nabwənə cwǝŋǝ
sɩ ba yɩ na ba bʋra.
Nɔɔnʋ dɩ o ko sɛ sɩ ba pəni
dɩ gamba-kana dɩdʋa,
yɩ ba yáalɩ amʋ yɩrɩ dɩm
na yɩ lanyɩranɩ fasɩ tɩn.
8 Nɔɔna maa fɩn nabwənə
pa ba kwe ba gwaarʋ
ba ma tiŋi daarɩ jɩna ŋwaanɩ.
Ba maa tigi tɩ baŋa nɩ je sɩlʋ
ba na zuli ba Wɛ da tɩn.
Ba wɛ dɩm sɔŋɔ kʋm nɩ mʋ
ba yǝni ba nyɔ sana.
Kʋ maa yɩ səbu-jɩna yalʋ
ba na joŋi tɩn mʋ
ba maɩ ba yəgi sana bam kʋntʋ.
9 Nii-na, Yisɩrayɛlɩ tiinə bam!
Abam ŋwaanɩ mʋ amʋ dɛɛn zəli Amɔɔrɩ tiinə bam.
Bantʋ ya yɩ nɔn-dɩdwaarʋ mʋ,
yɩ ba ta dana,
nɩnɛɛnɩ tu-kamunnu na yɩ te tɩn. a
A ma yɔɔrɩ a cɔgɩ-ba,
nɩnɛɛnɩ nɔɔnʋ na guri tiu
dɩ kʋ bʋnnʋ maama te tɩn.
10 Amʋ dɛɛn ya jaanɩ abam
a nuŋi Ezipi tɩʋ kʋm nɩ,
yɩ a kwe bɩna fiinna a tʋ á yigə nɩ,
pa dɩ́ ve kagʋa kam wʋnɩ.
A laan ma kwe Amɔɔrɩ tiinə
tɩga kantʋ a pa abam,
sɩ ka taa yɩ á tɩtɩ nyɩm.
11 A ma daarɩ a kuri
abam nɔn-dʋnnʋ tɩm wʋnɩ
sɩ ba badonnǝ taa yɩ nijoŋnə
ba pa-nɩ,
sɩ ba badaara dɩ taa yɩ Naziri tiinə na pɔɔrɩ ba tɩtɩ
amʋ ŋwaanɩ tɩn.b
Yisɩrayɛlɩ tiinə bam, kʋ daɩ kʋntʋ na?
Kʋ yɩ amʋ Baŋa-Wɛ mʋ ŋɔɔna.
12 Abam nan sʋgɩ Naziri tiinə bam
pa ba nyɔ sana.
Á ma kwǝri á fɩn amʋ nijoŋnə bam sɩ ba pu ba ni
dɩ amʋ kwǝrǝ kam.
13 Kʋntʋ ŋwaanɩ amʋ nan wʋ́ kɩ abam tɩntʋ:
Amʋ wʋ́ ba a nɔnɩ abam
a kɩ a naga kuri nɩ,
nɩ təriko na zɩŋɩ mɩna zanzan
yɩ kʋ nɔnɩ tɩga kʋ mʋʋrɩ te tɩn.
14 Balʋ na waɩ ba duri lɩla tɩn bá lu.
Dɩdɛɛra dam wʋ́ je.
Babɛ dɩ bá wanɩ ba vrɩ ba tɩtɩ
ba yagɩ.
15 Cɩ-tarʋ gɔgɔ dɩ bá wanɩ o zɩgɩ,
Balʋ na waɩ ba duri cɩga cɩga tɩn
bá wanɩ ba duri ba lu.
Nɔɔna balʋ na diini siseŋ-nɔɔna tɩn dɩ bá wanɩ ba vrɩ ba tɩtɩ
ba yagɩ.
16 Dɛ dɩm kʋntʋ nɩ, babɛ wʋ́ dɩ
ba najara zɩla ba yagɩ,
yɩ ba daarɩ ba duri sɩ ba lu.»
Baŋa-Wɛ mʋ tagɩ kʋntʋ.