Wɛ Nijoŋnu
Amɔsɩ Tɔnɔ
1
Amʋ Amɔsɩ yɩ nayɩrʋ mʋ na nuŋi Tekoa, yɩ a laan brɩ taanɩ dɩntʋ. Ozɩasɩ dɛɛn na yɩ Zuda tɩʋ pɛ, yɩ Zoasɩ bu Zeroboam dɩ yɩ Yisɩrayɛlɩ tiinə pɛ, yɩ Kʋ daarɩ bɩna yale sɩ tɩga kam ziziŋi tɩn mʋ Wɛ lɩ wǝǝnu tɩntʋ ya na səgi tɩn DƖ brɩ-nɩ.a2 Amɔsɩ ma ta o wɩ:
«Baŋa-Wɛ kwǝrǝ mʋ zaŋɩ Siyɔn piu kʋm yuu nɩ ka suurə.
DƖ kwǝr-dɩa maa bagɩ Zeruzalɛm tɩʋ kʋm wʋnɩ.
ɡa-lɛɛrʋ tɩm nayɩra na kalɩ ba vara ba ve mɛ tɩn wʋra tɩ kʋra.
Karmɛlɩ piu kʋm gaa dɩ ma kwaarɩ.»
Damasɩ tiinə taanɩ
3 Baŋa-Wɛ ni dɩm mʋ tɩntʋ:
«Damasɩ nɔɔna bam yǝni ba tiini ba kɩ lwarɩm ba daŋɩ da-baŋa nɩ.
Bɛŋwaanɩ ba dɛɛn mumugi Galadɩ tiinə bam nɩ
ba na mɛ luku-malɩ ba mumugi mɩna te tɩn mʋ.
4 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim zwɛ Pɛ Azayɛlɩ
na lɔgɩ sɔ-fɔrɔ kʋlʋ tɩn,
sɩ a daarɩ a zwɛ Pɛ Bɛn-Hadadɩ
dam je sɩm.b
5 Amʋ wʋ́ cɔgɩ Damasɩ tɩʋ
ni bwəəru tɩm,
sɩ a daarɩ a gʋ kʋ nɔɔn-biə bam
a vu a yi Avenc bolo kʋm.
Kʋ ta na yɩ pɛ wʋlʋ na di paarɩ Bɛt-Eden tɩʋ kʋm nɩ tɩn,
amʋ wʋ́ zǝl-o mʋ pa o lagɩ je.
Amʋ ta wʋ́ pa ba kalɩ
Siiri tiinə bam
ba ja ba vu Kiiri tɩʋ
sɩ ba ji pɩɩna da.»
Baŋa-Wɛ mʋ tagɩ kʋntʋ.
Filisi tiinə taanɩd
6 Baŋa-Wɛ ni dɩm mʋ tɩntʋ:
«Gaza tɩʋ kʋm nɔɔna yǝni ba tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba jaanɩ tɩʋ kʋdoŋ nɔn-biə maama
ba kalɩ-ba ba vu ba kɩ
Edɔm tiinə jɩŋa nɩ.
7 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim ja Gaza tɩʋ kʋm,
yɩ dɩ zwɛ kʋ dam je sɩm.
8 Kʋ na yɩ Asedodi tɩʋ kʋm
nɔn-biə bam,
dɩ wʋlʋ na di paarɩ
Asekelon tɩʋ kʋm nɩ tɩn,
amʋ wʋ́ cɔgɩ-ba,
sɩ a daarɩ a ma a dam-fɔrɔ
a yaarɩ Ekoron tɩʋ kʋm tiinə.
Filisi tiinə balʋ maama na daarɩ tɩn maa wʋ́ tɩ.»
Yuutu Baŋa-Wɛ mʋ tagɩ kʋntʋ.
Tiiri tiinə taanɩ
9 Baŋa-Wɛ ni dɩm mʋ tɩntʋ:
«Tiiri tɩʋ kʋm nɔɔna yǝni ba tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba jaanɩ tɩʋ kʋdoŋ
nɔn-biə maama mʋ
ba kalɩ ba vu ba kɩ
Edɔm tiinə jɩŋa nɩ.
Kʋntʋ tɩn, ba yagɩ ba ni-gonim dɩm ba ya na kɩ dɩ tɩʋ kʋm kʋntʋ tɩn. e
10 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim di Tiiri tɩʋ kʋm,
yɩ dɩ zwɛ kʋ dam je sɩm mʋ.»
Edɔm tiinə taanɩ
11 Baŋa-Wɛ ni dɩm mʋ tɩntʋ:
«Edɔm nɔɔna bam yǝni ba tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba zəli ba cʋrrʋ tɩm mʋ sɩ ba gʋ.
Ba maa ba jɩgɩ ba ŋwaŋa
dɩ fɩnfɩɩn dɩ,
yɩ ba wʋ pɛ ba ban-zɔŋɔ kʋm zuri.f
12 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim ja
Teman tɩʋ kʋm maama,
yɩ dɩ zwɛ Botisera dam je sɩm.»
Amɔn tiinə taanɩ
13 Baŋa-Wɛ ni dɩm mʋ tɩntʋ:
«Amɔn tɩʋ kʋm nɔɔna yǝni ba tiini ba kɩ lwarɩm ba daŋɩ da-baŋa nɩ.
Kʋntʋ ŋwaanɩ amʋ wʋ́ yɔɔrɩ a vaŋɩ ba zwa.
Ba na beeri tɩga sɩ ba wǝli ba tɩga wʋnɩ yɩ ba zaŋɩ najara tɩn,
mʋ ba lɔgɩ Galadɩ kapwi sɩm
ba pwi seeni ba gʋ-sɩ.
14 Kʋntʋ ŋwaanɩ amʋ wʋ́ kɩ-ba tɩntʋ:
Amʋ wʋ́ pa mim ja Raba tɩʋ kʋm,
yɩ dɩ zwɛ kʋ dam je sɩm.
Nɔɔna laan maa wʋ́ tɔɔlɩ tiguri-kaasa najara dɛ dɩm kʋntʋ nɩ.
Najara yam maa wʋ́ tiini ya ba
ba baŋa nɩ,
nɩnɛɛnɩ vu-dɩʋ na cɔgɩ wǝǝnu te tɩn.
15 Amʋ ta wʋ́ pa ba ja Amɔn
tɩʋ kʋm pɛ dɩ o nakwa bam
ba kalɩ ba vu tɩɩnɩ dɩdonnǝ nɩ
sɩ ba ji pɩɩna da.»
Baŋa-Wɛ mʋ tagɩ kʋntʋ.