Nɔɔn-nɔɔnʋ bá lu Baŋa-Wɛ waarɩm wʋnɩ
9
Amʋ daa na nii tɩn, mʋ a nɛ nɩ Baŋa-Wɛ zɩgɩ bimbim dɩm təŋə nɩ. DƖ laan ma pa ni DƖ wɩ:«Tiini n magɩ Wɛ diga kam nayuu be sɩm dɩ dam pa digə kam kuri maama sisiŋi. Zagɩ be sɩm n pa maama tʋ nɔɔna bam yum nɩ sɩ gʋ-ba. Amʋ nan wʋ́ pa balʋ na daarɩ yɩ ba ŋwɩ tɩn tɩ najara wʋnɩ, sɩ nɔɔn-nɔɔnʋ yɩ lu.
2 Ba na maŋɩ ba kʋ tɩga mʋ sɩ ba zʋ curu, amʋ wʋ́ yi da a vaŋɩ-ba a ja a nuŋi. Ba zɩ na diini wɛyuu nɩ, amʋ wʋ́ ja-ba a tu tɩga. 3 Ba nan na kwaanɩ ba di Karmɛlɩ piu kʋm yuu ba səgi da, amʋ ta wʋ́ beeri ba je a daarɩ a zi-ba. Ba nan zɩ na zʋ nɩnɩʋ kuri kuri mʋ sɩ ba səgi amʋ yigə nɩ dɩ, amʋ wʋ́ pa nɩnɩʋ wʋ varɩm wʋm dʋnɩ-ba kʋ gʋ. 4 Ba dʋna bam na jaanɩ-ba ba kalɩ ba vu sa-tɩʋ kʋdoŋ, a ta wʋ́ pa ba tɩ najara wʋnɩ. Bɛŋwaanɩ, a wʋbʋŋa jaanɩ sɩ a cɔgɩ-ba mʋ, sɩ a daa yɩ wǝli-ba.»
5 Paŋwa Tu Baŋa-Wɛ maa yɩ dɩlʋ
na yɔɔrɩ DƖ dwe tɩga kam
yɩ ka maama sisiŋi tɩn.
Nɔɔna balʋ maama na wʋ ka baŋa nɩ tɩn maa keeri bɔgɩ-bɔgɩ.
Tɩga kam maa zaŋɩ wɛɛnɩ,
yɩ ka joori ka tʋɩ,
nɩnɛɛnɩ Nili bugə kam na yǝni ka su ka pɛɛlɩ
yɩ ka joori ka tʋɩ te tɩn mʋ.
6 Baŋa-Wɛ lɔgɩ DƖ sɔŋɔ mʋ.
Kʋ nayuu kʋm wʋ wɛyuu nɩ mʋ
baŋa baŋa,
kʋ kugu kʋm maa wʋ tɩga baŋa nɩ.
Dɩntʋ mʋ yǝni DƖ koori
nanɩɩrʋ tɩm na bam
DƖ joori o lo tɩga kam baŋa nɩ.
DƖ yɩrɩ mʋ Baŋa-Wɛ!
7 Baŋa-Wɛ daa ma ta DƖ wɩ:
«Yisɩrayɛlɩ tiinə bam, á yɩ taá bʋŋɩ-na nɩ abam garɩ Kusi tiinə bam amʋ yigə nɩ. Kʋ yɩ cɩga mʋ nɩ a vrɩ abam a ja nuŋi Ezipi nɩ. Amʋ nan jaanɩ Filisi tiinə bam a nuŋi Kaftɔrɩa nɩ mʋ, yɩ a ta kwǝri a ja Siiri tiinə bam a nuŋi Kiiri nɩ. Kʋ daɩ kʋntʋ na? 8 Amʋ wʋlʋ na yɩ Yuutu Baŋa-Wɛ tɩn nɛ abam Yisɩrayɛlɩ tɩʋ kʋm na yɩ te yɩ kʋ tiini kʋ cɔgɩ tɩn. A nan lagɩ a cɔgɩ kʋ nɔn-biə bam maama pa ba je mʋ tɩga kam baŋa nɩ. Kʋ nan na yɩ te tɩn, a bá fɔgɩ a cɔgɩ Zakɔbɩ dwi dɩm maama a ti.
Amʋ Baŋa-Wɛ mʋ tagɩ kʋntʋ.
9 Amʋ lagɩ a pa Yisɩrayɛlɩ tiinə bam mʋ na yaara tɩɩnɩ dɩdonnǝ dɩm maama wʋnɩ. Kʋʋ́ ta nyɩ dɩ ba na zɛ muni yɔlɔ wʋnɩ sɩ weeru nuŋi te tɩn mʋ. Amʋ wʋ́ pa ba lɩ nɔn-yɔɔrʋ tɩm maama ba daarɩ nɔn-ŋʋna bam. 10 Amʋ nɔɔna balʋ maama na cɔgɩ tɩn mʋ lagɩ ba tɩ najara wʋnɩ, kʋ na maŋɩ kʋ yɩ balʋ na ta ba wɩ: Wɛ bá sɛ sɩ kʋlʋkʋlʋ yi-ba tɩn.»
Yisɩrayɛlɩ tɩʋ kʋm na wʋ́ joori kʋ zɩgɩ te tɩn
11 «Dɛ dɩm kʋntʋ na yiǝ, amʋ wʋ́ fɔgɩ a lɔ Pɛ Davidi sɔŋɔ kʋm na cɔgɩ tɩn. A maa wʋ́ joori a kwɛ kʋ kabri sɩm pa kʋ di-dwəənu tɩm joori tɩ ji sɔ-dʋŋʋ. 12 Kʋ maa wʋ́ pa Yisɩrayɛlɩ tiinə laan di Edɔm laŋa kalʋ ta na daarɩ tɩn, dɩdaanɩ tɩɩnɩ dɩlʋ maama ya na yɩ amʋ nyɩm tɩn. Amʋ Baŋa-Wɛ mʋ tagɩ kʋntʋ, yɩ a wʋ́ pa wǝǝnu tɩntʋ maama sɩɩnɩ tɩ kɩ.»b
13 Baŋa-Wɛ daa ta maa wɩ:
«Nii-na! Maŋa lagɩ ka yi
sɩ wʋdiu taa kɩ lɩla
á karɩ sɩm nɩ,
kʋ dwe balʋ na wʋ́ taa wʋra
sɩ ba zagɩ-kʋ tɩn.
Á vinyə tiu biə bam maa wʋ́ taa daga
ba dwe á na wʋ́ taa waɩ
á ma balʋ á kɩ sana
sɩ á laan ba á joori á du tɩn.
vinyə tweeru tɩlʋ á na wʋ́ jəri
pweeru je sɩm nɩ tɩn
wʋ́ pa á na dɩvɛn zanzan
sɩ kʋ gaalɩ.
14 Amʋ ta wʋ́ pa a nɔɔna
Yisɩrayɛlɩ tiinə bam
joori ba tɩga kam nɩ
ba jǝni dɩ dam.
Ba laan wʋ́ joori
ba fɔgɩ ba lɔ ba tɩɩnɩ dɩm,
yɩ ba taa zʋʋrɩ dɩ wʋnɩ.
Ba maa wʋ́ taa jəri tweeru
ba karɩ sɩm nɩ,
sɩ ba taa nyɔ vinyə tiu biə
dɩvɛn bam,
yɩ ba di tiu biə balʋ na ləri da tɩn.
15 Amʋ tɩtɩ mʋ lagɩ a jǝni
a nɔɔna bam tɩga kalʋ
a na pɛ-ba tɩn wʋnɩ.
Ba nan na jǝni ka wʋnɩ,
a daa bá lɩ-ba maŋa dɩ maŋa.»
Abam Tu Baŋa-Wɛ dɩm mʋ tagɩ kʋntʋ maama.