Lɛɛrʋ wʋ́ yi Yisɩrayɛlɩ tiinə bam
13
Efrayim yigǝ tiinǝ bam dɛɛn na puri ba ni ba ta taanɩ tɩn,liǝ mʋ jaanɩ Yisɩrayɛlɩ dwiə yadonnə yam,
ba na tiini ba kwarɩ Efrayim dwi dɩm tɩn ŋwaanɩ.
Ba nan kɩ ba cɔgɩ dɩ ba na zuli Baalɩ te tɩn.
Kʋntʋ mʋ te ba maŋɩ sɩ ba tɩ.
2 Ba daa ta tiini ba cɔgɩ ba daŋɩ da-baŋa nɩ.
Ba yǝni ba kwe səbu-poŋo mʋ ba ma mɔ jwǝnǝ sɩ ba zuli-ya.
Ba maa tɔgɩ ba wʋbʋŋa na lagɩ te tɩn,
yɩ ba pa gɔrʋ mʋ fɔgɩ tɩ kɩ wǝǝnu tɩm.
Ba yǝni ba ta jwǝ-kaana bam kʋntʋ taanɩ ba wɩ:
ba yɩ balʋ na kukwəri nʋa kamɔgɔ tɩn mʋ.
3 Kʋntʋ ŋwaanɩ nɔɔna bam kʋntʋ bá daanɩ yɩ ba je.
Baá taa nyɩ dɩ kunu kʋlʋ na tui zɩzɩŋa nɩ
yɩ kʋ je lɩla tɩn,
naa nyɔnɔ kʋlʋ na tʋa yɩ kʋ ba daanɩ tɩn mʋ.
Ba ta wʋ́ taa nyɩ dɩ viu na kalɩ swannʋ tɩlʋ kʋ ja viiri tɩn,
naa nyʋa na tɔgɩ natoŋo ka nuŋi ka kɛ tɩn mʋ.
4 Amʋ mʋ yɩ á Tu Baŋa-Wɛ dɩlʋ dɩm na jaanɩ abam
a nuŋi Ezipi tɩʋ kʋm wʋnɩ tɩn.
Wɛ dɩdoŋ tǝrǝ á na maŋɩ sɩ á lwarɩ-DƖ
yɩ kʋ daɩ amʋ.
Vrɩnʋ wʋdoŋ maa tǝrǝ kʋ na daɩ amʋ.a
5 Abam dɛɛn na beeri kagʋa wʋnɩ
mɛ na yɩ tɩ-kʋra yɩranɩ tɩn,
amʋ mʋ nii á baŋa nɩ.
6 A nan na pɛ á kwə bam wʋdiu sɩ ba di tɩn,
ba di ba su ba ta daarɩ.
Ba na di ba su kʋntʋ tɩn,
ba laan ma brɩ ba tɩtɩ kamunni,
yɩ ba swe amʋ ni nɩ.b
7 Kʋntʋ ŋwaanɩ a lagɩ a da a ba ba baŋa nɩ
nɩnɛɛnɩ nyoŋo doŋ te.
A ta wʋ́ cɩ ba cwǝŋǝ,
nɩ gweeru na pəni o cɩ cwǝŋǝ te tɩn.
8 Amʋ wʋ́ zaŋɩ ba baŋa nɩ
nɩnɛɛnɩ nywənkurə kalʋ ba na vrɩ ka biə ba daarɩ-ka te tɩn,
yɩ a daarɩ a kaagɩ ba nyɔɔna.
A ta wʋ́ cɔgɩ-ba lɩla kʋ nɛ sɩm ni nɩ.
A maa wʋ́ tʋrɩ-ba yɩra yɩra,
nɩ nyoŋo na tʋrɩ vara te tɩn,
naa ga-varɩm na yǝni o kɩ te tɩn.
9 Yisɩrayɛlɩ tiinə bam, lɛɛrʋ wʋ á yuu nɩ!
Nɔɔn-nɔɔnʋ tǝrǝ o na wʋ́ zǝni abam.
10 Á pɛ wʋm bɛ?
Wʋntʋ wʋ́ wanɩ o joŋi abam na?
Sɩ balʋ na yɩ nakwa á tɩɩnɩ dɩm maama nɩ tɩn
dɩ wʋ́ wanɩ abam ba zǝni na?
Abam dɛɛn nan lagɩ pwa dɩ nakwa
sɩ ba taa nii abam baŋa nɩ.
11 Amʋ ban-zɔŋɔ kʋm baŋa nɩ mʋ
a dɛɛn tiŋi pɛ a pa abam.
A nan ta daarɩ a lɩ wʋntʋ á wʋnɩ,
a ban-lʋm na fuli á baŋa nɩ tɩn ŋwaanɩ.
12 Efrayim tiinə bam lwarɩm kikiǝ yam mʋ wʋ ba yuu nɩ.
Ba lwarɩm dɩm maama pʋpʋnɩ ya tiŋi mʋ,
sɩ ba yɔɔrɩ ba na waarɩm ya ŋwaanɩ.
13 Kʋ nyɩ dɩ kaanɩ na vri pugə sɩ o lʋ te tɩn.
Yisɩrayɛlɩ dwi dɩm nan nyɩ dɩ bu-cɩcɔgɔ mʋ.
Bu wʋm lʋra maŋa na yiǝ,
o bá sɛ sɩ o vri o ba o nu yigə.
14 Amʋ Baŋa-Wɛ nan wʋ́ vrɩ-ba tʋʋnɩ jɩŋa nɩ a yagɩ na?
Amʋ wʋ́ joŋi-ba sɩ ba yɩ zʋ curu mʋ na?
Tʋʋnɩ, n dam dɩm nan daa bɛ?
N daa n bá wanɩ n cɔgɩ-ba na?c
Amʋ nan bá duri a nɔɔna bam ŋwaŋa.
15 Ba na maŋɩ ba puli lanyɩranɩ
ba dwǝni ba cʋrrʋ tɩm te,
Baŋa-Wɛ ta wʋ́ pa dʋ-viu nuŋi wa-puli seeni
kʋ ba kʋ cɔgɩ-ba.
Viu kʋm wʋ́ zɩgɩ kagʋa kam wʋnɩ
kʋ ba kʋ wɩ ba bwi sɩm maama.
Kʋ maa wʋ́ pa ba ga wǝǝnu tɩlʋ maama na jɩgɩ lʋnnɩ tɩ pa-ba tɩn.
16 Samari tiinə bam maŋɩ sɩ ba na cam,
ba na nuŋi ba Tu Wɛ dɩm kwaga nɩ tɩn ŋwaanɩ.
Ba dʋna wʋ́ gʋ-ba najara wʋnɩ.
Ba maa wʋ́ yigi ba bu-sɩsɩn ba dɩ tɩga nɩ ba gʋ,
yɩ ba daarɩ ba lɔ ba kapwi ba pwi seeni ba gʋ.