12
Efrayim tiinə bam ni-wʋdiu yɩ viu mʋ.Ba maa yǝni ba zəli viu na nuŋi wa-puli seeni tɩn
sɩ ba kwaanɩ ba ja-kʋ.
Vwan dɩ kǝm-balwaarʋ mʋ ba jɩgɩ ba tʋŋɩ maŋa maama.
Ba maa jaanɩ ba tɩtɩ ba ve ba kɩ ni-mɔrɔ dɩ Asiiri tiinə,
yɩ ba daarɩ ba kɩ nugə pipiu dɩ Ezipi tiinə.»
2 Baŋa-Wɛ ti DƖ yigə mʋ sɩ DƖ bwɛ Zuda tiinə bam.
DƖ lagɩ DƖ waarɩ Zakɔbɩ dwi tiinə bam ba tɩtʋŋɩ nɛ ŋwaanɩ mʋ.
DƖ maa wʋ́ joori DƖ ŋwɩ ba lwarɩm kikiǝ yam jɩnɩ ba yuu nɩ.
3 Zakɔbɩ ta na wʋ o nu pugə wʋnɩ tɩn,
o dɛɛn zʋ jaŋa mʋ dɩ o cʋrʋ Esayu,
dɩ ba na yɩ yiywa daanɩ tɩn.
O ta na kɩ nɔɔnʋ tɩn
mʋ o jaŋɩ dɩ Wɛ.a
4 O ma jaŋɩ dɩ Wɛ malɛka kam o wanɩ-ka o di.
O dɛɛn keeri mʋ lanyɩranɩ
sɩ o wanɩ o na Wɛ yu-yoŋo.
Betɛlɩ nɩ mʋ o jeeri dɩ Wɛ,
yɩ Wɛ dɩ ŋɔɔnɩ dɩd-o.b
5 Paŋwa Tu Baŋa-Wɛ dɩm mʋ kʋntʋ.
Baŋa-Wɛ mʋ DƖ yɩrɩ, dɩ na maŋɩ dɩ zulə!
6 Abam nan maŋɩ sɩ á joori á Tu Wɛ dɩm te.
Fɔgɩ-na á taá tɔgɩ sono dɩ cɩga,
yɩ á jɩgɩ Baŋa-Wɛ tɩɩna maŋa maama.
7 Á pipimpiinə bam jɩgɩ bwɛ sɩlʋ na muri tɩn mʋ.
Ba maa soe sɩ ba taa pini ba yəllə bam.
8 Efrayim tiinə bam maa ta ba wɩ:
«Nii-na dɩ́ na duni te!
Dɩ́ nɛ jɩjɩgɩrʋ dɩ́ pa dɩ́ tɩtɩ!
Dɩ́ na tʋŋɩ te maama dɩ́ na nyɔɔrɩ tɩn,
nɔɔn-nɔɔnʋ bá na dɩ́ kəm-balwaarʋ sɩ o ma o bwɛ dɩbam.»
9 Amʋ mʋ yɩ á Tu Baŋa-Wɛ dɩlʋ dɩm na jaanɩ abam
a nuŋi Ezipi tɩʋ kʋm wʋnɩ tɩn.
A ta wʋ́ pa á joori á taá zʋʋrɩ vwə wʋnɩ,
nɩ á dɛɛn na zʋʋrɩ te kagʋa kam wʋnɩ tɩn.c
10 Amʋ dɛɛn ŋɔɔnɩ dɩ a nijoŋnǝ bam.
A ma vɩɩrɩ wǝǝnu zanzan a brɩ-ba.
A tɔgɩ ba baŋa mʋ
a pa a nɔɔna bam lwarɩ a wʋbʋŋa.
11 Kǝm-balwaarʋ daga Galadɩ nɩ mʋ na?
Balʋ na zʋʋrɩ da tɩn nan lagɩ ba je mʋ!
Giligalɩ nɩ ba yǝni ba ma nabɛ mʋ
ba kɩ kaanɩm ba pa jwǝnǝ na?
Ba kaanɩm bimbinə kandwa yam wʋ́ sirimi tɩga nɩ,
yɩ ba dɔgɩlɩ-ya ba tiŋi ba karɩ nɩ.
12 Zakɔbɩ dɛɛn duri o vu o zʋʋrɩ Aram nɩ mʋ.
O ma tʋŋɩ o pa nɔɔnʋ wʋdoŋ
sɩ o pa‑o kaanɩ sɩ o di.
O yǝni o yɩrɩ peeni mʋ
sɩ kʋ taa yɩ o kaanɩ wʋm kwǝrǝ.d
13 Baŋa-Wɛ dɛɛn mʋ tɔgɩ DƖ nijoŋnu baŋa nɩ
DƖ joŋi Yisɩrayɛlɩ dwi tiinə bam DƖ ja DƖ nuŋi Ezipi nɩ.
Wɛ ta ma pa DƖ nijoŋu wʋm taa nii ba baŋa nɩ.
14 Efrayim tiinə bam nan tiini ba zaŋɩ Wɛ banɩ.
Ba maŋɩ sɩ ba na waarɩm ba lwarɩm kənə ŋwaanɩ mʋ.
Ba Yuutu wʋm wʋ́ joori DƖ ŋwɩ ba lwarɩm dɩm jɩnɩ ba yuu nɩ,
ba na yáalɩ‑DƖ te tɩn ŋwaanɩ.