Yisɩrayɛlɩ tiinə na ləri ba wʋ, Wɛ wʋ́ pa ba na yazurə.
14
Yisɩrayɛlɩ tiinə bam, pipiri-naá joori á Tu Baŋa-Wɛ wʋm te.
Á lwarɩm dɩm mʋ pɛ á tri á tʋ tɩga nɩ.
2 Kwe-na wɛ-loro á yi Baŋa-Wɛ te.
Ta-na dɩ DƖ á wɩ:
«Yagɩ dɩ́ lwarɩm dɩm maama n ma n cɛ dɩbam,
sɩ n kɩ dɩbam yu-yoŋo yɩ n joŋi dɩbam.
Dɩ́ laan wʋ́ zuli nmʋ yɩrɩ,
pa kʋ ji pɛɛrɩ kʋ pa nmʋ,
sɩ kʋ ləri na-balɩ sɩm dɩ́ na ma dɩ́ kɩ kaanɩm tɩn yuu nɩ.
3 Asiiri tiinə bam bá wanɩ dɩbam ba joŋi ba yagɩ.
Dɩ́ daa bá di siseŋ-nɔɔna baŋa dɩ́ zʋ najara wʋ.
Kʋ na yɩ wǝǝnu tɩlʋ dɩ́ jɩn na mɔɔnɩ tɩn,
dɩ́ daa bá kwe-tɩ dɩ́ ma ji dɩ́ wa dɩ́ zuli.
Nmʋ yɩranɩ mʋ jɩgɩ yibwənə n paɩ bɩtara.»
Baŋa-Wɛ maa wɩ:
4 «Amʋ wʋ́ sooni a nɔɔna bam,
dɩ ba na nuŋi amʋ kwaga nɩ tɩn dɩ.
A maa wʋ́ taa soe-ba dɩ a wʋ maama.
Amʋ laan pɩɩnɩ a banɩ mʋ
sɩ dɩ daa yɩ zaŋɩ ba baŋa nɩ.
5 Amʋ wʋ́ pa Yisɩrayɛlɩ tiinə bam bɩcara zuri,
nɩ dʋa na zuri tɩ-kʋra te tɩn.
Baá taa jɩgɩ nɩnwaŋa nɩnɛɛnɩ liisi ga-punnu na yɩ te tɩn.
Ba kuri wʋ́ ja tɩga lanyɩranɩ,
nɩ Liban laŋa kam tu-ŋʋnnʋ te.
6 Ba ta wʋ́ puli lanyɩranɩ,
nɩ tiu na kwi vɔɔrʋ te tɩn.
Ba lam dɩ Olivi tiu lam mʋ wʋ́ taa nyɩ daanɩ.
Baá taa jɩgɩ ywəəni,
nɩ Liban tweeru lwəm na ywəmmə te tɩn.
7 Baá joori ba taa zʋʋrɩ amʋ woro kʋm kuri nɩ,
yɩ ba du mɩna ba na wʋdiiru zanzan.
Ba ŋwɩa maa wʋ́ kɩ lanyɩranɩ,
nɩ vinyə tiu na ləri biə zanzan te tɩn.
Ba yɩrɩ dɩ wʋ́ zaŋɩ je maama nɩ,
nɩ Liban tɩʋ sana bam na jɩgɩ yɩrɩ te tɩn.
8 Efrayim tiinə bam, amʋ yigə wʋ jwǝnǝ wʋnɩ na?
Amʋ mʋ wʋ́ joŋi á wara yam,
yɩ a nii á baŋa nɩ.
A jɩgɩ woro a pa abam,
nɩ tiu kʋlʋ na kwi vɔɔrʋ maŋa maama tɩn mʋ.
Á na nɛ wo-laarʋ tɩlʋ tɩn nuŋi amʋ tee nɩ mʋ.»
9 Abam wʋlʋ maama na jɩgɩ wʋbʋŋa,
kʋ tu maŋɩ sɩ o ni taanɩ dɩntʋ kuri.
Wʋlʋ na jɩgɩ yi-pʋrʋ,
kʋ tu maŋɩ sɩ o kɩ-dɩ o bɩcarɩ nɩ.
Baŋa-Wɛ cwe sɩm yɔɔrɩ sɩ yɩ cɩga.
Nɔn-ŋʋna wʋ́ taa tɔgɩ-sɩ.
Kʋ nan na yɩ balʋ na vɩn Wɛ tɩn,
bantʋ wʋ́ cɔɔlɩ ba tʋ sɩ wʋnɩ.