10
Yisɩrayɛlɩ tiinə bam dɛɛn nyɩ dɩ vinyə tiukʋlʋ kʋm na lǝgi tiu biə zɔrɔtɔtɔ tɩn mʋ.
Ba nan na tiini ba puli zanzan te tɩn,
ba kaanɩm bimbinə yam dɩ yɩ kʋntʋ mʋ.
Ba tɩga kam maa na fɔgɩ ka kɩ wʋdiiru lanyɩranɩ te tɩn,
ba kandwa yam ba na cwi ba jɩgɩ ba zuli tɩn mʋ
ba fɔgɩ-ya sɩ ya dɩ taa tiini ya lamma.
2 Ba ba jɩgɩ wʋ-dɩdʋa dɩ Wɛ.
Kʋntʋ ŋwaanɩ ba maŋɩ sɩ ba ŋwɩ ba lwarɩm dɩm jɩnɩ.
Baŋa-Wɛ tɩtɩ wʋ́ bwəri ba kaanɩm bimbinə yam,
yɩ DƖ daarɩ DƖ yigi ba jwǝnǝ kandwa yam DƖ dɩ tɩga nɩ.
3 Ba nan wʋ́ taa ŋɔɔnɩ ba wɩ:
«Dɩ́ ba jɩgɩ pɛ,
Baŋa-Wɛ fʋʋnɩ na tǝrǝ dɩbam wʋnɩ tɩn ŋwaanɩ.
Dɩ́ nan ya na jɩgɩ pɛ,
wʋntʋ wʋ́ wanɩ o kɩ bɛɛ mʋ o pa dɩbam?»
4 Ba ni-taanɩ dɩm kʋntʋ yɩ kafɛ mʋ.
Ba maa tɔgɩ vwan baŋa nɩ ba goni ni
yɩ ba ta daarɩ ba yiri-dɩ.
Kʋntʋ ŋwaanɩ, nɔɔna tiini ba jɩgɩ da-taanɩ,
nɩ ga-balwaarʋ na li tɩga te tɩn.
5 Nɔɔna balʋ na zʋʋrɩ Samari tɩʋ wʋnɩ tɩn yɩra saɩ mʋ
yɩ ba wʋ cɔgɩ dɩ nʋa jwəm dɩm
ba ya na zuli Bɛt-Avɛn nɩ tɩn.
Bantʋ dɩ balʋ na kɩ kaanɩm ba pa-kʋ tɩn wʋ́ keeri dɩ ŋwaanɩ,
dɩ na wʋ́ je ba tee nɩ,
dɩdaanɩ dɩ nɩnwaŋa kam maama tɩn.
6 Nɔɔna wʋ́ zɩŋɩ-dɩ ba ja vu Asiiri tɩʋ kʋm
sɩ dɩ ji jɩjɩgɩrʋ dɩ pa pa-farʋ wʋm.
Yisɩrayɛlɩ dwi tiinə bam wʋ́ di ba cavɩɩra
dɩ ba na zuli jwəm dɩlʋ na yɩ da-kʋra tɩn.
7 Cɩga tɩn, baá kalɩ Samari tiinə bam dɩ ba pɛ wʋm
ba ja vu jǝgǝ yigə yigə,
nɩ bu-tʋla na zɩŋɩ daa ka ja viiri te tɩn.
8 Je sɩlʋ Yisɩrayɛlɩ tiinə bam na tʋŋɩ kǝm-balwaarʋ
yɩ ba zuli jwǝnǝ pweeru yuu nɩ mɛ tɩn
wʋ́ ba sɩ cɔgɩ.
Sabarɩ dɩ ga-balwaarʋ wʋ́ nuŋi tɩ li bimbinə yam maama.
Ba laan wʋ́ loori pweeru tɩm dɩ pu-kum sɩm nɩ:
tɩ tʋ ba baŋa nɩ tɩ kwǝli-ba.a
Baŋa-Wɛ wʋ́ waarɩ Yisɩrayɛlɩ tiinə bam
Baŋa-Wɛ maa wɩ:
9 «Yisɩrayɛlɩ tiinə bam, kʋ zɩgɩ maŋa kalʋ á na kɩ lwarɩm Gibea nɩ tɩn sɩ kʋ ba kʋ yi zɩm,
á yɔɔrɩ á tʋŋɩ lwarɩm mʋ maŋa maama.
Kʋ daɩ kǝm dɩm kʋntʋ ŋwaanɩ mʋ
najara dɛɛn yi nɔn-balwaarʋ tɩm Gibea nɩ na?
10 Amʋ wʋbʋŋa yam na jaanɩ ya ti,
a wʋ́ waarɩ nɔn-balwaarʋ tɩntʋ mʋ.
Tɩɩnɩ dɩdonnǝ wʋ́ kɩ ni daanɩ
ba ba ba zaŋɩ najara dɩ ba.
Ba maa wʋ́ vɔ-ba dɩ capʋnnʋ,
ba na tiini ba cɔgɩ ba daŋɩ da-baŋa nɩ tɩn ŋwaanɩ.
11 Efrayim tiinə bam dɛɛn nyɩ dɩ nacwɛn
dɩlʋ na waɩ dɩ nɔnɩ mɩna tɩn mʋ.
Amʋ tɩtɩ laan nan wʋ́ daŋɩ daa dɩ ban nɩ,
sɩ a pa dɩ vaŋɩ naan-vɔrɔ.
Zuda dwi tiinə bam dɩ maŋɩ sɩ ba va!
Zakɔbɩ dwi tiinə bam dɩ wʋ́ cɛ tɩga sɩ kʋ zʋ ba yɩra.
12 Nan kwaanɩ-na á cɛ tɩga,
yɩ á daarɩ á du cɩga á pa á tɩtɩ,
sɩ á wʋ́ na yu-yoŋo á kənə baŋa nɩ.
Maŋa mʋ tɩntʋ sɩ á pipiri á ba amʋ te.
Amʋ Baŋa-Wɛ laan wʋ́ kɩ yu-yoŋo á yuu nɩ,
nɩ dʋa na nɩ te tɩn.
13 Abam nan na kɩ te tɩn,
á dugi lwarɩm yɩranɩ mʋ,
pa á na lɛɛrʋ á kənə baŋa nɩ.
Á na mɩ dɩ vwan fɔm tɩn ŋwaanɩ,
á nɛ nyɔɔrɩ dɩlʋ na maŋɩ dɩ vwan tɩn.
Á kwe á cɩga á daŋɩ á tɩtɩ dam baŋa nɩ,
dɩ á jar-kərə na tiini ba daga te tɩn ŋwaanɩ mʋ.
14 Kʋntʋ ŋwaanɩ najara wʋ́ da ya tʋ á wʋnɩ,
pa á dam je sɩm maama cɔgɩ.
Kʋʋ́ tiini kʋ zʋ á yɩra
nɩ kʋ na kɩ te dɛ dɩm Salɩman na cɔgɩ
Bɛte-Arabɛlɩ tɩʋ kʋm tɩn.
Ba dɛɛn yigi niinə dɩ ba biə
ba dɩ tɩga nɩ
yɩ ba daarɩ ba nɔ-ba ba gʋ.b
15 Kʋ ta lagɩ kʋ kɩ abam Betɛlɩ tiinə bam kʋntʋ doŋ mʋ,
dɩ kǝm-balwaarʋ yalʋ abam na kɩ tɩn ŋwaanɩ.
Dɛ dɩm kʋntʋ na yiǝ,
Yisɩrayɛlɩ tiinə pɛ wʋm wʋ́ yɔɔrɩ o tɩ kʋ nɛ sɩm ni nɩ.»