Yisɩrayɛlɩ tiinə bam wʋ́ na waarɩm
9
Yisɩrayɛlɩ tiinə bam, á yɩ taá cakɩ dɩ wʋpolo,nɩ dwi-gɛ tiinə bam na di ba candi yam te tɩn.
Bɛŋwaanɩ, á lɔgɩ á Tu Wɛ dɩm kwaga nɩ,
yɩ á ta tɔgɩ wa-yɔɔrʋ.
Á soe sɩ á taá joŋə boorim kikiə səbu
mɩna fɩrɩm je sɩm maama nɩ.
2 Abam nan na wʋ́ magɩ mɩna yalʋ tɩn bá yi á dim.
Á ta na wʋ́ kan vinyə tiu biə sɩ á na sana balʋ tɩn bá yi abam.
3 Yisɩrayɛlɩ tiinə bam bá na cwǝŋǝ
sɩ ba maŋɩ Baŋa-Wɛ tɩga kam wʋnɩ.
Efrayim tiinə bam wʋ́ joori ba zʋ gabɛɛm wʋnɩ mʋ,
nɩ kʋ dɛɛn na kɩ-ba Ezipi nɩ te tɩn.
Ba badonnǝ wʋ́ vu Asiiri tɩʋ kʋm
yɩ ba di wʋdiu kʋlʋ ya na culi sɩ ba di tɩn.
4 Dáanɩ ba bá taa kwe sana ba kɩ pɛɛra
ba ma ba zuli Baŋa-Wɛ.
Kaanɩm dɩlʋ maama ba na wʋ́ kɩ ba pa‑DƖ tɩn bá su o yi.
Ba pɛɛra yam kʋntʋ wʋ́ taa nyɩ dɩ
wʋdiu kʋlʋ ba na di luə sɔŋɔ nɩ tɩn.
Wʋlʋ maama na di-kʋ,
kʋ tu wʋ́ digimi o tɩtɩ cullu tɩm seeni.
Wʋdiu kʋm kʋntʋ nan wʋ́ su bantʋ kana yɩranɩ mʋ.
Kʋ bá lɛɛnɩ kʋ vu Baŋa-Wɛ digə kam wʋ.
5 Dɛ dɩm na tu dɩ yi sɩ á di candiə á zuli Baŋa-Wɛ
nɩ á ya na yǝni á kɩ te tɩn,
á laan wʋ́ kɩ tɩta mʋ?
6 Nii-na! Ba na maŋɩ ba duri ba jagɩ da yigə nɩ
sɩ ba lu cam wʋnɩ,
Ezipi tiinə bam ta wʋ́ ja-ba.
Ba ta wʋ́ kɩ-ba yibeelə Memfisi tɩʋ wʋnɩ.
Ga-balwaarʋ wʋ́ nuŋi tɩ li ba lu-nyɩnnʋ jɩjɩgɩrʋ tɩm,
yɩ sabarɩ dɩ li ba di sɩm.
7 Yisɩrayɛlɩ tiinə bam waarɩm maŋa kam yi ka ti.
Ba laan wʋ́ joŋi kʋlʋ na maŋɩ dɩ ba lwarɩm kənə yam tɩn.
Ba taa ye kʋ ni nɩ!
Ba bʋŋɩ nɩ Wɛ nijoŋnu wʋm yirisi mʋ.
Ba ta maa nii swan tu pa o yɩ cicoo.
Ba yǝni ba yáalɩ Wɛ tɩntʋŋna kʋntʋ doŋ,
ba lwarɩm kənə na daga
yɩ ba wʋ-lʋŋ-tɩtʋŋa dɩ gaalɩ tɩn ŋwaanɩ.
8 Nijoŋu wʋm nan yɩ Wɛ tɩntʋŋnʋ mʋ.
O tu sɩ o yɩrɩ Efrayim tiinə bam.
O nan na ve mɛ maama,
ba yǝni ba cʋ o cwǝŋǝ.
O na maŋɩ o wʋ Wɛ diga kam nɩ,
ba yǝni ba cul‑o mʋ.
9 Ba tiini ba cɔgɩ ba tɩtɩ dɩ tɩtʋŋ-zɔɔna,
nɩ ba dɛɛn na kɩ te Gibea nɩ tɩn.a
Wɛ nan wʋ́ guli ba lwarɩm kənə yam,
yɩ DƖ daarɩ DƖ waarɩ-ba ya ŋwaanɩ.
Baŋa-Wɛ maa wɩ:
10 «Amʋ dɛɛn na puli a na Yisɩrayɛlɩ tiinə bam tɩn,
ba nyɩ dɩ vinyə tiu biə mʋ na puli ba nuŋi kagʋa wʋnɩ tɩn.
A na nɛ á nabaara bam tɩn,
kʋ nyɩ dɩ a nɛ mɔɔla na bɩga kapʋrʋ yuu nɩ tɩn mʋ.
Ba nan na tu ba yi Baal-Pewɔrɩ je sɩm tɩn,
ba ma kwe ba tɩtɩ ba pa wo-zɔɔnɩ dɩm kʋntʋ.
Ba tɩtɩ laan jigi wo-zɔɔna
sɩ kʋ maŋɩ dɩ jwəm dɩlʋ ba na zuli tɩn.b
11 Efrayim tiinə bam nɩnwaŋa lagɩ ka je mʋ,
nɩ zuŋə na jaanɩ ka di wɛyuu te tɩn.
Bu-lʋrɩ dɩ pu-jara daa bá taa wʋra ba wʋnɩ.
12 Ba na maŋɩ ba lʋ biə yɩ ba kɔnɩ-ba,
amʋ wʋ́ pa ba maama tɩ,
pa ba wʋlʋwʋlʋ daa yɩ daarɩ.
Lɛɛrʋ wʋ́ ba ba baŋa,
amʋ kwaga na wʋ́ ya-ba tɩn ŋwaanɩ.
13 A nɛ Yisɩrayɛlɩ tɩʋ kʋm na zɩgɩ tɩ-ywəŋə je nɩ te,
nɩ Tiiri tɩʋ kʋm na yɩ te tɩn.
Efrayim tiinə bam nan maŋɩ sɩ ba ja ba biə ba nuŋi
sɩ nɔɔna mʋ gʋ-ba.»
14 Amʋ Tu Baŋa-Wɛ,
a nan wʋ́ loori‑m
sɩ n kɩ-ba tɩta mʋ?
Kɔ ba lʋra kam,
sɩ n daarɩ n pa ba yɩlɩ na dɩ kʋ.
Baŋa-Wɛ maa wɩ:
15 «Giligalɩ nɩ mʋ ba maŋɩ ba puli ba lwarɩm kənə yantʋ.
Kʋntʋ ŋwaanɩ a laan culi-ba.
Amʋ lagɩ a zəli-ba sɩ ba nuŋi a tɩga kam baŋa nɩ,
ba lwarɩm tɩtʋŋa yam ŋwaanɩ.
A daa bá taa jɩgɩ ba sono.
Ba nakwa bam maama baarɩ amʋ kwaga.
16 Efrayim tiinə bam ba jɩgɩ yazurə mʋ.
Ba nyɩ dɩ tu-kʋrʋ mʋ na kʋgɩ kʋ zɩgɩ kafɛ
yɩ kʋ ba ləri biə tɩn.
Ba nan na maŋɩ ba lʋ,
a wʋ́ gʋ ba bu-sonnu tɩm kʋntʋ.»
17 Amʋ Wɛ dɩm wʋ́ vɩ-ba,
dɩ ba na wʋ sɛ DƖ zaasɩm dɩm tɩn ŋwaanɩ.
Kʋntʋ ŋwaanɩ, baá taa kaagɩ ba beerǝ
dwi-gɛ tiinə bam wʋnɩ.