Yisɩrayɛlɩ tiinə bam jwǝnǝ kaanɩm
8
«Wu-na najara nabwaanʋ!Kaloŋ-zɔŋɔ mʋ jaanɩ wɛyuu nɩ kʋ tʋ kʋ li
sɩ kʋ caalɩ amʋ Baŋa-Wɛ nɔɔna bam.a
Bɛŋwaanɩ, ba cɔgɩ ni dɩlʋ a na goni dɩ ba tɩn.
Ba ta ma nuŋi a zaasɩm dɩm kwaga nɩ.
2 Yisɩrayɛlɩ tiinə bam mʋ loori-nɩ
yɩ ba ta ba wɩ: ‹Nmʋ mʋ yɩ dɩbam Wɛ,
yɩ dɩ́ mɩ dɩ nmʋ.›
3 Bantʋ nɔ́ɔ ta mʋ vɩn sɩ ba taa tɔgɩ cwə-laarʋ.
Kʋntʋ ŋwaanɩ ba dʋna wʋ́ zəli-ba sɩ ba ja.
4 Ba tɩtɩ nɩ mʋ, ba tiŋi ba pwa.
Ba wʋ kɩ amʋ kʋ wʋnɩ.
Ba ta kuri yigǝ tiinǝ
yɩ a wʋ pɛ-ba cwǝŋǝ.
Ba kwe səbu-poŋo dɩ səbu-sɩŋa mʋ ba ma mɔ jwǝnǝ.
Kʋ lagɩ kʋ ja cɔgɩm mʋ kʋ ba kʋ pa ba tɩtɩ.
5 Kʋ na yɩ Samari tiinə bam,
a culi jwəm dɩlʋ ba na mɔɔnɩ
yɩ dɩ jɩgɩ nʋa nyɩnyʋgʋ tɩn.b
A ban-lʋm zaŋɩ ba baŋa nɩ!
Baá taa digimi ba tɩtɩ taan tɩntʋ
sɩ ba vu ba maŋɩ yən mʋ?
6 Yisɩrayɛlɩ tɩʋ tu gɔgɔ mʋ mɔɔnɩ jwəm dɩm,
kʋ daɩ Wɛ cɩga cɩga.
Cɩga tɩn, nʋa jwəm dɩlʋ Samari tiinə na zuli tɩn
lagɩ dɩ ba dɩ cɩcʋgɩ murə-murə mʋ.
7 Ba na dugi kʋlʋ tɩn nyɩ dɩ viu mʋ.
Wʋdiu kʋlʋ ba na wʋ́ na kʋ baŋa nɩ tɩn wʋ́ ji vu-dɩʋ.
Mɩna yalʋ na wʋ́ kɩ ba karɩ sɩm nɩ tɩn
yɩ mɩn-kayala mʋ.
Ya bá wanɩ ya kɩ muni.
Ba ya na maŋɩ ba na wʋdiiru lanyɩranɩ,
vərə mʋ wʋ́ ba ba vrɩ-tɩ.
8 Yisɩrayɛlɩ tɩʋ kʋm wʋ́ ba kʋ ti.
Kʋ daa ba jɩgɩ kuri dwi-gɛ tiinə bam wʋnɩ,
nɩ kɔɔrʋ wʋlʋ nɔɔn-nɔɔnʋ na ba lagɩ tɩn te.
9 Yisɩrayɛlɩ tiinə bam jaanɩ ba tɩtɩ ba vu ba pa Asiiri tɩʋ kʋm tiinə mʋ,
nɩ kagʋa wʋ bɩnaga na ve ka tɩtɩ wʋbʋŋa vəŋə te tɩn.
Kʋ nyɩ dɩ Efrayim tiinə bam kwe səbu mʋ
ba vu ba beeri bɔɔla te.
10 Ba na maŋɩ ba vu ba beeri dwi-gɛ tiinə bam wʋnɩ
sɩ ba na zǝnǝ ba tee nɩ,
amʋ ta lagɩ a la-ba mʋ a kɩ daanɩ sɩ a waarɩ-ba.
Pa-farʋ wʋm wʋ́ zaŋɩ ba baŋa nɩ
o pa kʋ tiini kʋ zʋ ba yɩra.
11 Efrayim dwi tiinə bam lɔgɩ kaanɩm bimbinə zanzan
ba lwarɩm saarɩm ŋwaanɩ.
Bimbinə yam kʋntʋ laan jigi je sɩlʋ
ba na yǝni ba tʋŋɩ lwarɩm da tɩn mʋ.
12 Amʋ pʋpʋnɩ a zaasɩm dɩm zanzan a tiŋi
sɩ ba wanɩ ba lwarɩ ya maama.
Ba nan nii-ya pa ya yɩ wo-vəro mʋ ba tee nɩ.
13 Ba maa yǝni ba ja ba pɛɛra ba ba
ba ma kɩ kaanɩm ba pa-nɩ,
yɩ ba daarɩ ba di ya nwana yam.
Amʋ Baŋa-Wɛ yi nan wʋ su dɩ ba pɛɛra yam kʋntʋ.
A laan wʋ́ guli ba na cɔgɩ te tɩn,
yɩ a daarɩ a waarɩ-ba kʋ ŋwaanɩ.
A ta wʋ́ pa ba joori Ezipi tɩʋ kʋm.
14 Bɛŋwaanɩ, Yisɩrayɛlɩ tiinə bam swe
amʋ wʋlʋ na yɩ ba Kəru wʋm tɩn ni nɩ,
yɩ ba daarɩ ba lɔ sɔ-fwaarʋ ba pa ba tɩtɩ.
Zuda dwi tiinə bam dɩ lɔgɩ dam je zanzan mʋ
ba tɩɩnɩ dɩm wʋnɩ.
Amʋ nan wʋ́ pa mim zwɛ ba tɩɩnɩ dɩm,
dɩ ba dam je sɩm maama kulə!»