7
Amʋ nan na lagɩ sɩ a zǝni a nɔɔna bamsɩ ba joori ba taa jɩgɩ yu-yoŋo,
1 yɩ a na lagɩ sɩ a pa Yisɩrayɛlɩ tiinə bam na yazurə,
a yǝni a joori a na ba lwarɩm dɩm mʋ.
Efrayim dwi tiinə bam dɩ Samari tiinə bam
lwarɩm kənə sɩɩnɩ ya lwarɩ mʋ jaja.
Ba maa yǝni ba ganɩ ba donnǝ.
Ba ma bwəri nɔɔna sam ba zʋʋrɩ ba vrɩ ba wǝǝnu.
Vɩnvɩrna dɩ ma zi nɔɔna tɩʋ kʋm pooni yigə nɩ ba joŋi ba wǝǝnu.
2 Ba nan wʋ maanɩ nɩ amʋ wʋ́ guli ba lwarɩm kikiə yam kʋntʋ.
Ba tɩtʋŋ-balwaarʋ tɩm yɔɔrɩ tɩ ja-ba mʋ.
Tɩ naɩ amʋ yigə nɩ maŋa maama.»
Ba na ganɩ pɛ wʋm te tɩn
Baŋa-Wɛ ta ma ta DƖ wɩ:
3 «Nɔɔna yǝni ba tʋŋɩ lwarɩm mʋ
ba ma poli pɛ wʋm wʋʋ.
Ba maa tɔgɩ vwan baŋa nɩ
ba poli nakwa bam wʋʋ.
4 Ba maama tɔgɩ tʋlʋ tɩtʋŋa mʋ.
Ba maa tiini ba jɩgɩ ban-lʋm,
nɩ jugu digə wʋ mim na guguli te tɩn.
5 Pɛ wʋm na wʋra o di o candiə kam dɛ dɩlʋ nɩ tɩn,
ba pɛ o nakwa bam nyɔ sana mʋ ba su,
pa ba yǝri ba tɩtɩ jǝgǝ.
Pɛ wʋm tɩtɩ dɩ tɔgɩ dɩ nɔn-jwəəru o kwɛɛrɩ mʋ.
6 Ba maa twɛ pɛ wʋm yɩra
yɩ ba bʋŋɩ sɩ ba dɩ‑o.
Tɩga na yi, ba ban-zɔŋɔ kʋm guguli mʋ
nɩ mim na guguli te tɩn.
Tɩga daa na pʋʋrɩ, kʋ ma yɔɔrɩ kʋ di,
nɩ min-vʋgʋ na jaanɩ wɛyuu nɩ te tɩn.
7 Ba banɩ ma tiini dɩ fuli zanzan
pa ba yɔɔrɩ ba gʋ ba yigǝ tiinǝ bam.
Ba pwa bam maama da ma tʋ tɩga nɩ,
yɩ ba wʋlʋwʋlʋ wʋ loori zǝnǝ amʋ tee nɩ.
Yisɩrayɛlɩ dwi tiinə dɩ dwi-gɛ tiinə taanɩ
8 Efrayim tiinə bam gwaanɩ ba tɩtɩ dɩ dwi-gɛ tiinə bam mʋ.a
Ba nyɩ dɩ maasɩ dɩlʋ ba na fɔgɩ ba lɩ
yɩ dɩ wʋ bɩgɩ dɩ ti tɩn mʋ.
9 Nɔn-vəri mʋ tu ba vrɩ ba dam,
yɩ ba wʋ maanɩ kʋ ni nɩ.
Ba yuu dɩ laan pɩɩrɩ
yɩ ba wʋ lwarɩ kʋ ni nɩ.
10 Yisɩrayɛlɩ tiinə bam na brɩ ba tɩtɩ kamunni te tɩn
brɩ nɩ ba ba jɩgɩ bʋra.
Ba nɛ kʋlʋ maama na yi-ba tɩn,
yɩ ba ta vɩn sɩ ba joori ba ba amʋ te.
Amʋ mʋ yɩ ba Tu Baŋa-Wɛ dɩm
yɩ ba ba loori zǝnǝ amʋ tee nɩ.
11 Efrayim tiinə bam ba jɩgɩ swan.
Ba yǝni ba kɩ nɩ kunkwǝŋǝ na kaagɩ ka loŋi tweeru te tɩn mʋ.
Pulim tɩn, ba ve Ezipi tiinə bam te mʋ,
sɩ ba wǝli-ba,
yɩ ba daa lɛɛnɩ ba duri ba vu Asiiri tiinə bam dɩ te.b
12 Ba nan na maa ve tɩn,
a lagɩ a ma cɩgɩrʋ mʋ a cɩ-ba a ja nɩ zunə te.
A ta wʋ́ waarɩ-ba,
lwarɩm dɩm ba na kɩ tɩn ŋwaanɩ.
13 Lɛɛrʋ wʋ ba yuu nɩ!
Bɛŋwaanɩ, ba pipiri ba viiri amʋ tee nɩ.
Cam wʋ́ yi-ba,
ba na lɔgɩ amʋ kwaga nɩ tɩn ŋwaanɩ.
A ya lagɩ a vrɩ-ba mʋ a yagɩ,
ba nan fɔgɩ vwan ba pa-nɩ.
14 Ba ba yǝni ba loori-nɩ dɩ ba wʋʋ maama.
Ba tigi ba gadoru baŋa nɩ
yɩ ba laan coosǝ.
Ba maa yǝni ba bɛ ba yɩra ba wara wʋnɩc
sɩ ba na wʋdiu dɩ sana mʋ.
Ba nuŋi amʋ kwaga nɩ mʋ kʋntʋ.
15 Amʋ mʋ zaasɩ-ba sɩ a pa ba na dam.
Dɩ kʋ dɩ, ba ta jɩgɩ wʋbʋŋ-balwaarʋ dɩ amʋ.
16 Ba na beeri zǝnǝ tɩn,
ba ba kwǝni ba yum wɛɛnɩ.d
Ba nyɩ dɩ taŋa kalʋ na gugwǝli tɩn mʋ.
Ba nakwa bam wʋ́ tʋ najara wʋnɩ,
ba na brɩ ba tɩtɩ kamunni tɩn ŋwaanɩ.
Kʋntʋ ŋwaanɩ Ezipi tiinə bam wʋ́ taa jɩgɩ-ba ba mwana.»